Efesofɔ 2 - Bulu Ntam Pɔpwɛ mʋ́a Israel Ɩlʋ

Tsu Nkpa Dadatɔ Ba Pɔpwɛtɔ

¹ Asa mlɩlemli Akristofɔ a, asʋtɔ-ɔnlɩn mʋ́a lakpanbwɛ sʋ mlɩgyi ɔŋɛtɔ aha wuhɛ.

² Alɩ brɛ amʋtɔ a, mlɩletsia ɔmátɔfɔ atsiabi. Mlɩlobuo ɔŋɛ lalahɛ fɛ́ɛ́ owie Ɔbʋnsam. Mʋgyi ɔŋɛ lalahɛá ɩdɛ agyʋma yɔ aha amʋʋ bʋtamabu Bulu amʋtɔ nɩ.

³ Lɛlɛ mʋ́ a, anɩ fɛ́ɛ́ anɩletsia amʋ́ atsiabi, bwɛ lalahɛá anɩ ɔwɔlɩ lekle. Anɩlobuo tɔá anɩ ɔyʋlʋ pʋ́ anɩ agywɩɩn letsia suna anɩ. Tsiatɔ anfɩ sʋ tɛkɩ Bulu ɔbɛ́bɩtɩ anɩ ɩsʋ fɛ aha atrahɛ nɩ.

^4-5 Tamɛ ɩnɩá Bulu nwewun ɩtsɔ, ɔtɛhɩɛ dwɛ anɩ sʋ a, ɔlɔtsʋn anɩa Kristonyɔ ɩkʋlɛbwɛsʋ ha anɩ nkpa, brɛ amʋʋ anɩgyi aha wuhɛ mʋ ansɩtɔ anɩ lakpan sʋ amʋ. Mʋ awɩtɔlɛ sʋ ɔlɔhɔ anɩ nkpa.

⁶ Anɩa Kristo Yesunyɔ ɩkʋlɛbwɛ anfɩ sʋ Bulu lakʋsʋa anɩa mʋnyɔ tsu lowutɔ, alaha anɩ otsiakpa Kristo wa. Anɩa mʋnyɔ abégyi iwie ɔsʋsʋ.

⁷ Bulu lɛlɛ mʋ awɩtɔlɛ kpɔnkpɔɔnkpɔntɩ anfɩ suna anɩ tsʋn Kristo Yesusʋ, mɛnɩ aha ánɩ́ bɛ́tra lɩn fɛ́ɛ́ bówun ánɩ́ mʋ awɩtɔlɛ lomoni dʋn togyitɔ.

⁸ Bulu awɩtɔlɛ pʋ́ mlɩ Kristo hogyisʋ Bulu lɔtsʋn hɔ mlɩ nkpa. Ɩnɩ motsu mlɩ, Bulu atokiehɛ igyi.

⁹ Megyi mlɩ bwɛhɛ wanklaan kʋkʋ sʋ, mɛnɩ mlɩtɔ ɔkʋkʋ mɔ́ɔpʋ ɩbɩ si kantɔ.

¹⁰ Bulu labwɛ anɩ alɩ anfɩ anɩgyi. Alabwɛ anɩ aha pɔpwɛ tsʋn anɩa Kristo Yesunyɔ ɩkʋlɛbwɛsʋ, mɛnɩ abɔ́bwɛ yileá mʋ onuto ɔlɛla yaɩ ha anɩ ɔbɛɛ abwɛ.

Kristotɔ Ɩkʋlɛbwɛ

¹¹ Mʋ́ sʋ mlɩkaɩn ánɩ́ tɛkɩ ɔmátɔfɔ mlɩgyi. Brɛ amʋ a, Yudafɔ bʋtɛtɩ mlɩ bɛɛ, “Aha ánɩ́ bʋmɛtɩn kete,” bʋtɛtɩ amʋ́ ɩwɩ kete atɩnpʋ. (Tamɛ ketetɩn amʋ o a, nyankpʋsa ɔyʋlʋsʋ pʋ́ ɩbɩ ɔnɔ atɔ igyi.)

¹² Mlɩkaɩn ánɩ́ alɩ brɛ amʋtɔ a, mlɩmeyin Kristo. Afɔɔ mlɩgyi. Mlɩmegyi Yudafɔ ɔkpagyiɔkpasʋ. Mlɩmá ogyikpa Bulu nhɩhɩɛ amʋʋ ɔlɛka mʋ́ ɩwɩ ntam ha Yudafɔ amʋtɔ. Mʋ́a ɩdʋn kʋraa a, mlɩ ansɩ mɛdɩn tɔtɔsʋ, mlɩmeyin mʋ ɛ.

¹³ Tamɛ sei a, mlɩa Kristo Yesunyɔ mlɩlabwɛ kʋlɛ. Ɩnɩ sʋ Kristo latsʋn mʋ obugya amʋʋ ɔlɛtsɛɩ wʋlɩ ha anɩa mlɩnyɔ amʋsʋ, kpa mlɩ aha anfɩ tɛkɩ mlɩbʋ ɩfɔ anfɩ ba Bulu wa.

¹⁴ Tsufɛ Kristo onuto lapʋ iwilwii wa Yudafɔ pʋ́ ɔmá bambasʋfɔ nsɩnɛ, bwɛ anɩ afʋnka anyɔ amʋ fɛ́ɛ́ kʋlɛ. Alalɛ olu amʋʋ ɩlɔbwɛ bunti wa anɩ nsɩnɛ amʋ.

¹⁵ Ɔlɛka Yudafɔ mbla pʋ́ amʋ́ amandɩɛtɔ, mɛnɩ afʋnka anyɔ amʋ bɔ́bwɛ ɔpasua pɔpwɛ ɩkʋlɛ mʋtɔ. Fówun mʋa amʋ́nyɔ bɔ́bwɛ kʋlɛ, iwilwii bétsia amʋ́ nsɩnɛ.

¹⁶ Ɔlɔtsʋn mʋ oyikpalihɛsʋ lowu amʋsʋ lɛ olu lɛ amʋ́ nsɩnɛ. Oyikpalihɛ amʋsʋ ɔlɔtsʋn tswɩ amʋ́a Bulunyɔ ɔnɔ ntsu.

¹⁷ Brɛá Kristo lɛba a, ɔlɛda Bulu iwilwii asʋn amʋ ɔkan ha aha fɛ́ɛ́. Mlɩ ɔmátɔfɔá mlɩa Bulunyɔ nsɩnɛ bʋ ɩfɔ pʋ́ Yudafɔá amʋ́a Bulunyɔ nsɩnɛ ma ɩfɔ fɛ́ɛ́tɔ.

¹⁸ Kristo sʋ ɔkpa latii ha anɩ afʋnka anyɔ amʋ fɛ́ɛ́. Ɔŋɛ Wankɩhɛ amʋ sʋ abɛ́talɩ ba anɩ Sɩ Bulu ansɩtɔ.

¹⁹ Ɩnɩ sʋ mlɩtra mlɩmegyi afɔɔ. Mlɩa Bulu aha mlɩlabwɛ ɩkʋlɛ, mlɩgyi Bulu woyi abi.

²⁰ Mlɩgyi fɛ obuá bayi. Yesu sumbi ayɔpʋ amʋ pʋ́ Bulu ɔnɔsʋ atɔɩpʋ amʋ gyi mʋ́ nkpabi. Kristo Yesu onuto gyi obu amʋ ɔtan.

²¹ Mʋ sʋ obu amʋ ɩtsa aba hogyitɔ. Mʋtɛha mʋ́ itomoni bwɛ Bulu ɔtswɛkpa obu wankɩhɛ.

²² Ɩnɩá mlɩa Kristonyɔ mlɩlabwɛ ɩkʋlɛ sʋ a, ɔdɛ mlɩa Yudafɔ amʋ pʋtsa abasʋ, ɔdɛ obuá Bulu obétsia mʋ́tɔ ɔŋɛtɔ yi.