Kolosefɔ 4 - Bulu Ntam Pɔpwɛ mʋ́a Israel Ɩlʋ

¹ Nkpábi awie, mlɩpʋ tɔá ɩbʋ alɛ, igyi ɔnɔkwalɩ kpa mlɩ nkpábi, tsufɛ mlɩ ɛ mlɩbʋ Owie ɔsʋsʋ.

² Mlɩkɩta mpaɩbɔtɔ. Mlɩdɩnka ansɩ ɩwɩsʋ, ɩpanda ɛ itsia mlɩ klʋntɔ.

³ Mlɩbɔ mpaɩ ha anɩ ɛ. Bulu ofinki ɔkpa ha anɩ atalɩ da Kristo ɩwɩ asʋn ŋainhɛ amʋ ɔkan. Mʋ́ sʋ nda obu nɩ.

⁴ Mlɩbɔ mpaɩ mlɩaa, nda mʋ́ ɔkan wanklaan, alɩá ilehian.

⁵ Mlɩkɩ mlɩ natɩtɔ ɔmátɔfɔtɔ. Nɩ ɔkpa ifinki ha mlɩ a, mlɩmáyinta mʋ́.

⁶ Mlɩ ɩtɔɩ ɩwa anulɛ, ɩwa labi, mɛnɩ mlɛ́talɩ lɛ ɔhagyiɔha asʋn fɩtɛhɛ ɔnɔ wanklaan.

Ɩkla

⁷ Anɩa opio ɔdwɛpʋ Tihiko dɛ anɩ Wie agyʋma yɔ. Osumpʋ ɔnɔkwalɩpʋ ogyi. Ɔbɛ́bla mlɩ alɩá mɩ ɩwɩ gyi fɛ́ɛ́.

⁸ Nawa mʋ mlɩ wa mbɛɛ, ɔbɛbla mlɩ alɩá anɩ ɩwɩ gyi, ɔwa mlɩ atɛtɔ-ɔnlɩn.

⁹ Mʋa anɩ pio ɔdwɛpʋ ɔnɔkwalɩpʋ Onesimo, ogyi mlɩ pɩ amʋ ɔbɛ́ba bɛbla mlɩ asʋn ánɩ́ ɩlaba nfɩ fɛ́ɛ́.

¹⁰ Aristarko, mɩ ba ánɩ́ mɩa mʋnyɔ anɩda obu ɔha mlɩ itsia. Alɩ kɛn Marko, ogyi Barnaba mʋ pio amʋ ɛ ɔha mlɩ itsia nɩ. Mlɩhɔ Marko ɔfɔɔ wanklaan, nɩ ɔlɔtsʋn ba mlɩ wa fɛ alɩá nɛbla mlɩ yaɩ.

¹¹ Opio Yesu, bʋtɛtra tɩ mʋ Yusto ɛ ɔha mlɩ itsia. Aha abasa anfɩ pɛ gyi Yudafɔá mɩa amʋ́nyɔ anɩdɛ Bulu iwiegyi amʋ ɩwɩ agyʋma yɔ nɩ. Amʋ́ tɛkɩta klʋn wa mɩ ɩwɩtɔ nɩ.

¹² Epafra, otsu mlɩ wa, ogyi Kristo Yesu osumbi amʋ ɛ ɔha mlɩ itsia. Ɔtɛhɩɛ bɔ mpaɩ ha mlɩ ánɩ́ Bulu ɔwa mlɩ ɔwʋnlɩn, ɔha amlɩfʋn, amlɩtalɩ bwɛ Bulu apɛ kugyikʋ.

¹³ Nɛ́talɩ gyi mʋ ɩwɩ adansɩɛ ánɩ́ ɔhɩɛ ɔdɛ agyʋma yɔ mlɩa Akristofɔá bʋbʋ Laodikea pʋ́ Hierapoli ɩdatɔ.

¹⁴ Anɩ ɔdwɛpʋ Luka, ogyi ɩlɔ ɔtsapʋ mʋa Dema bɛha mlɩ itsia.

¹⁵ Nɛha anɩ apio Laodikeafɔ amʋ itsia. Nɛha Nunfa mʋa ɔpasua amʋʋ ɩbʋ mʋ woyitɔ amʋ ɛ itsia.

¹⁶ Nɩ mlɛkla ɔwʋlʋ anfɩ suna ɔpasua amʋ ta a, mlɩpʋsɩsɩ Laodikeafɔ ɛ. Mlɩkla amʋ́ klɛ amʋʋ nɔpʋsɩsɩ amʋ́ amʋ ɛ.

¹⁷ Mlɩbla Arkipo mlɩaa, ɔmɔ agyʋma amʋʋ Bulu lɔpʋwa mʋ ɩbɩtɔ amʋ ɔnɔ wanklaan.

¹⁸ Mɩ Paulo, onutonuto lawa ɩbɩ ɔwʋlʋ anfɩ asɩ. Mlɩmátan ánɩ́ nda obu. Bulu ogyi mlɩ bʋalɛ.