Kolosefɔ 3 - Bulu Ntam Pɔpwɛ mʋ́a Israel Ɩlʋ

Nkpa Pɔpwɛ Tsia

¹ Mʋ́ sʋ nɩ Bulu lakʋsʋa mlɩa Kristonyɔ ba nkpa pɔpwɛtɔ a, mlɩdunka atɔá ɩbʋ ɔsʋsʋ, ɔtɩnɛ amʋʋ Kristo tsie Bulu gyɔpɩsʋ amʋ.

² Mlɩha agywɩɩn ɩnʋ atɔ ɩwɩ, megyi ɔsʋlʋsʋ klɛ.

³ Tsufɛ mlɩlawu, Bulu lapʋ mlɩa Kristonyɔ nkpa onuto ŋain mʋtɔ.

⁴ Ɛkɛá ɔbɛ́lɛ Kristo amʋʋ ogyi mlɩ nkpa onuto amʋ ɔwan suna ɔyɩ a, ɛkɛ amʋ kɛn ɔbɛ́lɛ mlɩa mʋnyɔ ɔwan mʋ numnyamtɔ nɩ.

Tsiatɔ Dada Mʋ́a Pɔpwɛ

⁵ Mʋ́ sʋ mlɩmɔ tsiatɔ dada amʋʋ ɩbʋ mlɩtɔ amʋ. Mʋ́gyi; atsɩ mʋa ayin asʋnwa, ifintotsia, ɔwɔlɩ lalahɛ mʋ́a pɛlɩla. Ɔyɩ anfɩtɔ atɔ wanklaan ɩmápɛ mlɩ ansɩ, tsufɛ ɔnsɩpɛ igyi fɛ ɔkpɩsum.

⁶ Ntobi anfɩ odu abwɛpʋsʋ Bulu tɛhɩɛ nya ɔblɔ nɩ.

⁷ Mʋ́ aná mlɩtɔbwɛ brɛá mlɩgyi ɔmátɔfɔ nɩ.

⁸ Sei gyi brɛá mlɛ́lɛ ɔblɔ, ɔblɔkpan, olu, abakpɔɩ, asʋkpan blɩ aná lɛ mlɩtɔ nɩ.

⁹ Mlɩmáwa afunu suna aba, tsufɛ mlɩlasi mlɩ tsiatɔ dada amʋ pʋ́ mʋ́ bwɛhɛ fɛ́ɛ́.

¹⁰ Mlɩlalatsu tsiatɔ pɔpwɛ. Bulu gyi mʋ́ Ɔbwɛpʋ, ɔdɛ mʋ́ bwɛ pɔpwɛ lɩan mʋ ɩwɩ brɛ anfɩ mlɩdɛ mʋ bɩ anfɩ.

¹¹ Tsiatɔ pɔpwɛ anfɩ mʋ́ a, ɩmɛfahʋn ánɩ́ Grikiyin ntɛ Yudayin fʋgyi. Fɛtɩn kete ntɛ fʋmɛtɩn, ɔkpʋtɔpʋ ntɛ okudasɩyin, ɔkpábi ntɛ ɔdɩhɩɛ fʋgyi. Kristo gyi togyitɔ, ɔbʋ amʋ́ fɛ́ɛ́tɔ.

¹² Mʋ́ sʋ ɩnɩá Bulu lalɛ mlɩ pʋbwɛ mʋ aha ánɩ́ amʋ́ ɩwɩ latɩn pʋ́ mʋ adwɛpʋ a, mlɩha nwewun, awɩtɔlɛwa, ɩwɩasɩba, ilwii pʋ klʋnya itsia mlɩtɔ.

¹³ Mlɩnya ɩklʋn ha aba. Nɩ ɔkʋ mʋa mʋ ba benya a, mlɩsikie aba fɛ alɩá Kristo lesi mlɩ klɛ kie mlɩ.

¹⁴ Mʋ́á ɩdʋn a, ɔdwɛ tɔbwɛ anɩ fɛ́ɛ́ ɩkʋlɛ. Ɩbwɛ mlɩ tati dɩdahɛ.

¹⁵ Mlɩha Kristo iwilwii igyi mlɩ klʋnsʋ, tsufɛ mʋ́tɔ Bulu latɩ mlɩ bɔwa; mlɩa mʋ nyankpʋsa-oyi amʋ mlɩlabwɛ kʋlɛ nɩ. Mlɩda mʋ ɩpan ɛ bregyibrɛ.

¹⁶ Mlɩha Kristo asʋn amʋ ɩhɩɛ bʋla mlɩ klʋntɔ, ɩha mlɩ nyansa. Mlɩpʋtɔɩ kpla aba, suna aba atɔ. Mlɩwa Israelfɔ ɩlʋ, ɔsankuosʋ ɩlʋ pʋ́ ɔŋɛtɔ ɩlʋ mlɩ klʋntɔ pʋtsu Bulu fʋa, pʋda anɩ Sɩ Bulu ɩpan.

¹⁷ Mlɩ atɔ bwɛhɛ pʋ́ mlɩ asʋn blɩhɛ fɛ́ɛ́ ɩbwɛ anɩ Wie Yesu ɩdatɔ, amlɩpʋ ɩpan ha anɩ Sɩ Bulu tsʋn mʋsʋ.

Akristofɔ Tsiatɔ

¹⁸ Aka, mlɩba ɩwɩasɩ ha mlɩ aklu alɩá ɩlɛkana ha aha ánɩ́ bʋgyi Kristo klɛ.

¹⁹ Aklu, mlɩ ɛ mlɩdwɛ mlɩ aka. Mlɩmábwɛ amʋ́ kpounkpoun.

²⁰ Abi, mlɩbu mlɩ akwɩɩpʋ, tsufɛ mʋ́ Bulu tekle nɩ.

²¹ Akwɩɩpʋ, mlɩmáwa mlɩ abi ɔblɔ, mɛnɩ ɩwɩ móowu amʋ́.

²² Nkpábi, mlɩbu mlɩ ɔsʋlʋsʋ awie togyitɔá mlɔ́bwɛtɔ. Mlɩha amʋ́ ansɩ igyi mlɩ ɩwɩ bregyibrɛ, megyi amʋ́ ansɩtɔ wʋlɛ. Mlɩbwɛ mʋ́ tsu klʋntɔ, tsufɛ mlɩtobu anɩ Wie.

²³ Mlɩbwɛ togyitɔ tsu mlɩ klʋntɔ, fɛ anɩ Wie mlɩdɛ mʋ́ bwɛ ha, megyi anyankpʋsa.

²⁴ Mlɩkaɩn ánɩ́ anɩ Wie ɩbɩtɔ mlénya mlɩ ɩkɔka ánɩ́ alala yaɩ mʋ abi. Tsufɛ Kristo gyi Owieá mlɩdesum.

²⁵ Tamɛ nɩ fɔbwɛ tɔá ɩma alɛ a, ɔbɛ́ka fʋ ɩkɔ, tsufɛ ɔtamakɩ ɔhaa ansɩtɔ.