Kolosefɔ 2 - Bulu Ntam Pɔpwɛ mʋ́a Israel Ɩlʋ

¹ Ndekleá mlɩbɩ ɩprɩá ndɛprɩ ɔwʋnlɩnsʋ, mlɩa ɔpasua amʋʋ ɩbʋ Laodikea pʋ́ aha amʋʋ bʋmɔkʋwun mɩ kɩ amʋ fɛ́ɛ́ nwunsʋ.

² Ndɛ mʋ́ bwɛ pʋwa amʋ́ ɔwʋnlɩn, abʋbwɛ kʋlɛ, dwɛ aba, nu asʋn asɩ wanklaan, mɛnɩ bónu Bulu asʋn ŋainhɛ amʋʋ igyi Kristo amʋ fɛ́ɛ́ asɩ.

³ Kristotɔ Bulu lɔpʋ mʋ atonyahɛá igyi mʋ nyansa pʋ́ mʋ asʋnbɩ fɛ́ɛ́ wa.

⁴ Ndɛ mlɩ asʋn anfɩ bla, mɛnɩ ɔhaa mɔ́ɔpʋ asʋn ánɩ́ ɩbʋ anulɛ kʋkʋ bɛmlɛ mlɩ.

⁵ Ɩbʋ mʋ́tɔá mbʋ ɩfɔ mlɩ wa, tamɛ ntosusu mlɩ ɩwɩ bregyibrɛ. Ansɩ ɛ ɩdɛ mɩ gyi ánɩ́ mlɩtsie wanklaan, mlɩlɩɩ kinkiinkin Kristosʋ hogyitɔ.

⁶ Ɩnɩá mlɩlahɔ Kristo Yesu gyi ánɩ́ mʋgyi mlɩ Wie sʋ a, mlɩyɔ mʋ́sʋ mlɩa mʋnyɔ amlɩbwɛ kʋlɛ.

⁷ Mlɩ ɛ mlɩhɩɛ lɩɩ kinkiinkin Kristo hogyitɔ, amlɩnya ɔwʋnlɩn tsu mlɩa mʋnyɔ ɩkʋlɛbwɛtɔ. Mlɩyɔ mʋ́sʋ amlɩhɔ mʋ ɩwɩ asʋn amʋʋ bʋdɛ mlɩ suna, igyi ɔnɔkwalɩ amʋ, fɛ alɩá oyi nlin tɔyɔ ɔtɔtɔɔtɔ, yodunka ntsu ha mʋ́ ɩtɛdan, amlɩda Bulu ɩpan ɛ bregyibrɛ.

⁸ Mlɩmáha ɔkpa ɔhaa ɔmlɛ mlɩ, pʋ mʋ ansɩtɩn mʋ́a afunu asʋn ánɩ́ igyi amandɩɛá anyankpʋsa bɔwa kʋkʋ, itsu ɔŋɛ ntɛ tumiá ɩdɛ ɔyɩ anfɩsʋ gyi, imotsu Kristo wa bɛha amlɩmli mʋ nkpábi.

⁹ Tsufɛ Kristotɔ Bulu tsiatɔ onutonuto amʋ fɛ́ɛ́ ɩbʋ nyankpʋsa ɔkpasʋ.

¹⁰ Ɩnɩá mlɩa Kristonyɔ mlɩlabwɛ kʋlɛ sʋ mlɩlafʋn. Mʋgyi ɔha ánɩ́ ɔbʋ tumi ɔŋɛtɔ atumipʋ pʋ́ ɩsʋ agyipʋ fɛ́ɛ́sʋ.

¹¹ Mlɩa mʋnyɔ ɩkʋlɛbwɛ sʋ aladɩnkɩ mlɩ tsiatɔ dada amʋ lɛ mlɩsʋ fɛ alɩ amʋʋ bʋtɛtɩn kete, dɩnkɩ awʋlɩ lɛ mʋ́sʋ amʋ.

¹² Brɛá bɔbɔ mlɩ asu a, bopula mlɩ tsiatɔ dada amʋ fɛ alɩá bopula Kristo; Bulu lɔkʋsʋa mlɩ ba nkpatɔ fɛ alɩá ɔlɔkʋsʋa Kristo, tsufɛ mlɩlohogyi ánɩ́ Bulu bʋ tumi kʋsʋa mʋ tsu afulitɔ.

¹³ Tɛkɩ mlɩ lakpan pʋ́ mlɩ tsiatɔ dada amʋʋ bʋmɔkʋdɩnkɩ lɛ mlɩsʋ amʋ sʋ mlɩlowu fɛ ɔha ánɩ́ ɔmɔkʋtɩn kete. Tamɛ sei a, Bulu lakʋsʋa anɩa Kristonyɔ ba nkpa pɔpwɛtɔ, alasi anɩ lakpan fɛ́ɛ́ kie anɩ.

¹⁴ Ɔlɛdɩnkɩ asʋn amʋʋ bɔwanlɩn wa Mose mblatɔ, ɩdɛ anɩ ɩla lɛ amʋ lɛ anɩsʋ, yɛda mʋ́ manta Kristo oyikpalihɛ amʋsʋ.

¹⁵ Bulu lɔswɩɩ ɔŋɛtɔ atumipʋ pʋ́ ɩsʋ agyipʋ tumi, ɔlɛkɩta amʋ́ ndoun, lɛ amʋ́ ɔwan, wa amʋ́ pɛlɩtɔ, brɛá olegyi amʋ́sʋ Kristo oyikpalihɛ amʋsʋ.

¹⁶ Mʋ́ sʋ mlɩmáha ɔhaa ɔlɛ mlɩ ɩla mlɩ atogyihɛ, mlɩ atonunhɛ, nkegyi, ɔtsra pɔpwɛ nkɛ, ntɛ Yudafɔ ɔkpʋnʋ ɔdakɛ aná sʋ.

¹⁷ Yiyi kɛkɛ ɩnɩ fɛ́ɛ́ igyi ha atɔ amʋʋ ɩbɛ́ba amʋ onuto. Mʋ́ onutonuto amʋ lɛlɩn ɔwan Kristotɔ.

¹⁸ Mlɩmáha ɔkpa ɔhaa ɔmlɛ mlɩ amlɩba ɩwɩasɩ sum Bulu-abɔpʋ, amlɩhʋlɩ ɩpan ánɩ́ Bulu lɛhɩɛ yaɩ mlɩ. Nɩ ɔkʋ ɔbɛɛ alawun tɔkʋ tsu mʋ́ ɩwɩ kʋraa po a, ɔyɩtɔ ansɩtɩn laha mʋ ɔdɛ ɩwɩ tsu.

¹⁹ Ɔha anfɩ odu lamaɩn ɩwɩ lɛ Kristo amʋʋ ogyi ɔpasua amʋ nwun amʋsʋ. Tsufɛ ɔpasua amʋtɔ anɩ fɛ́ɛ́ anɩlɛtsa abasʋ, Kristo amʋʋ ogyi nwun amʋ dɛ anɩ ɔwʋnlɩn wa, mɛnɩ abɛ́dan alɩá Bulu dekle.

²⁰ Mlɩa Kristonyɔ lowu. Mʋ́ sʋ mlɩtra mlɩmá ɔyɩtɔ tumi kʋkʋ asɩ. Ntogyi sʋ mlɩtra mlɩdɛ mbla anfɩ anásʋ gyi?

²¹ Bɛɛ, “Mágyi ɩnɩ. Mápʋ ɩbɩ da ɩnɩ, mátsu ɩnɩ ɛ!”

²² Nɩ bɔpʋ ntobi anfɩ fɛ́ɛ́ bwɛ atɔ ta a, iteyinta. Anyankpʋsa onuto mbla pʋ́ amʋ́ atosunahɛ igyi.

²³ Anɩdɛ mbla anfɩ kɩ fɛ tɔá nyansa bʋ mʋ́tɔ, ɩbɛ́ha abɔ́wa alɛ Bulu ansɩtɔ. Abɛ́ba ɩwɩasɩ ha mʋ, wa ɩwɩ ɔsɩn anɩaa ɩbɛ́ha abɛ́bɩ gyi ɩwɩsʋ. Tamɛ ɩnɩ aná fɛ́ɛ́ ɩmɛ́ɛtalɩ ha anɩméegyi ɩwɩsʋ.