2 Timoteo 3 - Bulu Ntam Pɔpwɛ mʋ́a Israel Ɩlʋ

Nkɛ Trahɛ Amʋtɔ Asʋn

¹ Tamɛ mɩ bi Timoteo, bɩá ɔyɩtɔ ɩbɔ́wa ɔnlɩn nkɛ trahɛ amʋtɔ.

² Tsufɛ aha bɔ́bwɛ awʋnsɩpʋ, bɔ́bwɛ kɔba adwɛpʋ. Bɔ́hɔ amʋ́ ɩwɩsʋ gyi, bótsu ɩwɩ, bésia aha, bʋmóonu amʋ́ akwɩɩpʋ asʋn, bʋméeyi aha ayɛ, amʋ́ ɩwɩ mɛ́ɛtɩn,

³ bʋmɔ́ɔdwɛ aha, bʋméesi asʋn kie, bɔ́bwɛ aha ɩwɩ asʋn ablɩpʋ, bʋmɛ́ɛtalɩ gyi ɩwɩsʋ, bɔ́bwɛ awuntɔlɩnpʋ, bʋmɔ́ɔdwɛ ɩtɔ wanklaan kʋkʋ.

⁴ Bɛ́lɛ aha ha, bʋmóosusu asʋn ɩwɩ, bɛ́kɩ amʋ́ ɩwɩá bʋdʋn ɔhagyiɔha, bɔ́dwɛ ɔyɩtɔ ansigyi si Bulu.

⁵ Bɔ́bwɛ ɩwɩ fɛ Bulu bʋdesum, tamɛ békina mʋ tumi. Lɛ ɩwɩ lɛ aha anfɩ odutɔ.

⁶ Amʋ́ odu bʋtebitiwie aha woyitɔ, damli atsɩá amʋ́ ansɩtɔ ma ɔnlɩn agywɩɩn. Atsɩ amʋ odu a, lakpan lamli amʋ́ atɔ sʋrahɛ, ɔwɔlɩ lalahɛ labʋla amʋ́tɔ.

⁷ Bʋtekleá bónu ɔhagyiɔha atosunahɛ, tamɛ bʋmɛ́ɛtalɩ bɩ ɔnɔkwalɩ amʋ ɛkɛkɛɛkɛ.

⁸ Alɩ amʋʋ Yane mʋa Yambre bɔkʋsʋ lɩɩ anɩ nain Mosesʋ amʋ a, alɩ aha anfɩ ɛ bakʋsʋ lɩɩ ɔnɔkwalɩ asʋn amʋsʋ nɩ. Amʋ́ agywɩɩn lawu. Hogyitɔ ɛ a, bʋma ɔlɩɩkpa.

⁹ Tamɛ bʋmɔ́ɔyɔ nkpa dʋn alɩ, tsufɛ amʋ́ mimla bɛ́lɩn ɔwan, ɔhagyiɔha obówun. Alɩ ɩlɛba Yane mʋa Yambresʋ nɩ.

Paulo Asʋn Trahɛ

¹⁰ Timoteo, fʋ mʋ́ fʋyin mɩ atosunahɛ fɛ́ɛ́, mɩ tsiatɔ, tɔá ɔkpa ngya, mɩ hogyi, mɩ ɩklʋnya, mɩ aha ɩwɩ ɔdwɛ pʋ́ alɩá notomi wun ipian,

¹¹ alɩá aha bɛdɩnka mɩsʋ pʋ́ mɩ asʋn wunhɛ. Mʋ́a ɩlɛba mɩsʋ Antiokia, Ikonion pʋ́ Listra ɔmátɔ. Notomi, anɩ Wie lɛlɛ mɩ tsu mʋ́ fɛ́ɛ́tɔ.

¹² Lɛlɛ mʋ́ a, ɔhagyiɔha ánɩ́ odekleá obóbuo anɩ Wie Kristo Yesu, ɔbwɛ Bulu apɛ a, aha bʋtɛdɩnka mʋsʋ.

¹³ Tamɛ aha lalahɛ pʋ́ aha asisipʋ mʋ́ a, bɔ́yɔ amʋ́ lalahɛbwɛsʋ dʋn alɩ. Bɛ́natɩ mlɛ aha, aha ɛ bɛ́mlɛ amʋ́.

¹⁴ Tamɛ fʋ mʋ́ a, kɩta fʋ ɔnɔkwalɩ amʋʋ fakasɩ, fʋ onuto fahɔ mʋ́sʋ gyi amʋtɔ kinkiinkin, tsufɛ fʋyin aha amʋʋ bosuna fʋ atɔ amʋ wanklaan.

¹⁵ Tsu fʋ nyebitɔ ɔpá fɛbɩ Bulu asʋn wanlɩnhɛ amʋ. Mʋ́ ɔbɛ́talɩ ha fʋ nyansa fɔ́pʋhɔ Kristo Yesu gyi nɩ. Mʋ́ sʋ Bulu ɔbɔ́hɔ fʋ nkpa ɛ nɩ.

¹⁶ Bulu asʋn wanlɩnhɛ amʋ fɛ́ɛ́ itsu Bulu onuto wa. Ɩbʋ alɛá bɔ́pʋsuna ɔha, pʋkina asʋn ha ɔha, pʋtswii ɔha, pʋbʋla ɔha, ɩbɛ́ha yilebwɛ bɛ́manta mʋ,

¹⁷ mɛnɩ ɩbɛ́la Bulu ɔha bwɛ wanklaan, ɔbɔ́fʋn ha gyumagyihɛ wanklaan kugyikʋ.