2 Timoteo 2 - Bulu Ntam Pɔpwɛ mʋ́a Israel Ɩlʋ

Ɩsa Ɔkɔpʋ Wanklaan

¹ Ɩnɩ sʋ mɩ bi, ha Bulu awɩtɔlɛ amʋʋ ɔlɔpʋtsʋn Kristo Yesusʋ amʋ ɩwa fʋ ɔwʋnlɩn.

² Pʋ asʋn amʋʋ nɛblɩ, fonu aha tsɔtsɔɔtsɔ ansɩtɔ amʋ wa aha ánɩ́ bʋbʋ ɔnɔkwalɩ ɩbɩtɔ, mɛnɩ amʋ́ ɛ bɛ́talɩ suna aha bamba.

³ Tomi afʋwun ɩwɩɔsɩn amʋʋ anɩdewun amʋ, fɛ Kristo Yesu ɩsa ɔkɔpʋ wanklaan.

⁴ Ɩsa ɔkɔpʋ ɔkʋkʋ tamatra kɩ ɔma, tsufɛ odekleá obégyi mʋ ɔhandɛ ansɩ.

⁵ Alɩ kɛn ɔsrɩ otsiipʋ ɔkʋkʋ tamanya ɩsʋgyi atokiehɛ, nkɛtɩ alagyi ɔsrɩ amʋ mblasʋ nɩ.

⁶ Ɔdɔtɔpʋá ɔbʋ nsi tegyankpa da atɔ pɔpwɛ ɔnɔ.

⁷ Gywɩɩn asʋn anfɩ nabla fʋ anfɩ ɩwɩ. Anɩ Wie ɛ ɔbɛ́ha fónu mʋ́ fɛ́ɛ́ asɩ.

⁸ Kaɩn Yesu Kristo, Owie Dawid mʋ na amʋsʋ. Mʋ Bulu lɔkʋsʋa tsu afulitɔ. Mʋ́gyi asʋn wanklaan amʋʋ ndɛblɩ amʋ nɩ.

⁹ Asʋn anfɩ sʋ ndɛ ɩwɩɔsɩn wun, bawa mɩ ɩkan fɛ lalahɛ ɔbwɛpʋ nɩ. Tamɛ bʋmɔkʋwa Bulu asʋn amʋ mʋ́ ɩkan.

¹⁰ Aha amʋʋ Bulu lalɛ amʋ sʋ natomi ɔkpagyiɔkpasʋ ndɛ ɩwɩɔsɩn wun, mɛnɩ Bulu ɔbɔ́tsʋn Kristo Yesusʋ hɔ amʋ́ nkpa, amʋ́ ɩbɩ bɛ́da numnyam amʋʋ ɩtamata amʋ.

¹¹ Asʋn anfɩ bʋ mʋ́tɔ. “Nɩ anɩa mʋnyɔ awu a, anɩa mʋnyɔ obétsia nkpa.

¹² Nɩ atomi wun ɩwɩɔsɩn a, anɩa mʋnyɔ abégyi iwie. Nɩ akina mʋ a, mʋ ɛ obékina anɩ.

¹³ Nɩ anɩmá ɔnɔkwalɩ a, mʋ mʋ́ a, ɔnɔkwalɩpʋ ogyi. Tsufɛ ɔtamatu atsʋnɔ tswɩ, lapʋ mʋ ɔdandʋ tsu mʋ́ ɛkɛkɛɛkɛ.”

Agyʋma Ɔyɔpʋá Olegyi Bulu Ansɩ

¹⁴ Tsia kaɩn amʋ́ asʋn anfɩ. Tɔɩ kpla amʋ́ Bulu ansɩtɔ fɛɛ, bʋmátsia trɛ asʋnsʋ. Labi kʋkʋ ɩma mʋ́tɔ, tsufɛ mʋ́ odu abwɛpʋ bʋtɛhɩ.

¹⁵ Bɔ mbɔdɩ afʋhɔ ɩda Bulu ansɩtɔ, fɛ agyʋma ɔyɔpʋá mʋ agyʋma ma mʋ pɛlɩ, otosuna ɔnɔkwalɩ asʋn amʋ wanklaan.

¹⁶ Asʋn ánɩ́ ɩma asɩ, imosuna Bulusum ɩmádalɩ fʋ ɔnɔ, tsufɛ ɩtɛha ɔha mʋa Bulunyɔ nsɩnɛ tɔwa ɩfɔ.

¹⁷ Alɩ amʋʋ ɔlɔ tɛklɛɩ amʋ a, alɩ asʋn anfɩ ablɩpʋ asʋn ɛ tɛklɛɩ nɩ. Amʋ́ akʋ gyi Himeneo mʋa Fileto.

¹⁸ Bafwɩ dalɩ ɔnɔkwalɩ ɔkpa amʋsʋ yɔ bʋdɛblɩ bɛɛ, kʋsʋ tsu afulitɔ laba bɔtsʋn, bʋdɛ akʋ hogyi yinta.

¹⁹ Tamɛ ntswɩasɩ amʋʋ Bulu lɔwa ha hogyi amʋ ɩlɩɩ kinkiinkin. Asʋn ánɩ́ bɔwanlɩn dɩnka ntswɩasɩ amʋsʋ gyi, “Anɩ Wie yin aha ánɩ́ bʋgyi mʋ klɛ.” Nyɔsɩ ɛ gyi, “Ɔhagyiɔha ánɩ́ ɔtɛtɩ mʋ ɩwɩ ɔbɛɛ Okristoyin a, osi lalahɛ bwɛ.”

²⁰ Megyi sika pɛpɛ mʋ́a sika fututu atɔ pɛ tetsia woyi yiletɔ. Oyi mʋ́a ɩsɩ atɔ ɛ tetsia ɩnʋ. Bʋtobu ɩkʋ dʋn kʋ.

²¹ Nɩ ɔkʋ ɔlɛ mʋ ɩwɩ lɛ lalahɛbwɛtɔ a, Bulu tɛlɛ mʋ yaɩ. Alabwɛ ɔha ánɩ́ alasi ɩwɩ ha, ɔbʋ labi. Mʋ Wie Bulu ɔbɔ́pʋ mʋ gyi gyʋma wanklaan kugyikʋ.

²² Ɩnɩ sʋ lɛ fʋ ɩwɩ tsu nyasubi mʋ́a mbitebi mbagyitɔ. Fówun fʋa aha amʋʋ bʋtɔpʋ ɩklʋn wankɩhɛ kpoli Bulu amʋ ansɩ bɛ́dɩnka yilebwɛ, hogyi, ɔdwɛ pʋ́ iwilwiisʋ.

²³ Lɛ fʋ ɩwɩ tsu nwɛngyiá ɩma labi, ɩtɔ wanklaan kʋkʋ mɛ́ɛdalɩ tsu mʋ́tɔtɔ, tsufɛ fʋyin ánɩ́ ɩtrɛ pɛ ɩtɛtɩ.

²⁴ Ɩma alɛá anɩ Wie osumpʋ ɔbɔ́bwɛ ɔtrɛpʋ. Mboun ilehian ánɩ́ ɔbɔ́wa awɩtɔlɛ ha ɔhagyiɔha, ɔbɔ́bwɛ osunapʋ wanklaan, otenya klʋn ha aha ánɩ́ amʋ́ asʋn bʋ ɔnlɩn.

²⁵ Ilehian ánɩ́ obénya klʋn tɔɩ kpla aha ánɩ́ bʋtɔkʋsʋ lɩɩ Bulu asʋn amʋsʋ. Fialɩ Bulu obówun amʋ́ nwɛ, ha amʋ́ bɛ́damli klʋntɔ, bɩ ɔnɔkwalɩ amʋ,

²⁶ ɩha amʋ́ ansɩ ɩba asɩ. Fialɩ ɩbɛ́ha amʋ́ bɛ́dalɩ tsu Ɔbʋnsam amʋʋ ɔbɛɛ bʋgyi mʋ asʋnsʋ, abʋbwɛ mʋ apɛ amʋ ayibitɔ.