2 Tesalonikafɔ 3 - Bulu Ntam Pɔpwɛ mʋ́a Israel Ɩlʋ

Mpaɩbɔ

¹ Ɩtrahɛ-trahɛ a, apio, mlɩbɔ mpaɩ ha anɩ, anɩ Wie asʋn amʋ ɩkɔsɩ klɛɩ. Aha abʋpʋ obú hɔ mʋ́ fɛ alɩ amʋʋ mlɩ ɛ mlɩlɔhɔ mʋ́ amʋ.

² Mlɩbɔ mpaɩ, Bulu ɔlɛ anɩ tsu awuntɔlɩnpʋ pʋ́ aha lalahɛ ɩbɩtɔ. Tsufɛ megyi aha fɛ́ɛ́ lɔhɔ anɩ Wie gyi.

³ Tamɛ anɩ Wie bʋ ɔnɔkwalɩ. Ɔbɔ́wa mlɩ ɔwʋnlɩn, hɔ mlɩ lɛ Lalahɛ Ɔbwɛpʋ amʋ ɩbɩtɔ.

⁴ Anɩ Wie laha anɩlahogyiá mlɩdɛ ntobi amʋʋ anɩlosuna mlɩ amʋ fɛ́ɛ́ bwɛ, mlɩméesi bwɛ ɛ.

⁵ Ɔkpa mlɩ, amlɩnu ɔdwɛá Bulu bʋ asɩ yɔ ɔtɔtɔɔtɔ; ɔha amlɩtomi fɛ Kristo.

Tsiatɔ Wanklaan

⁶ Apio, anɩdɛ mlɩ ɔla da anɩ Wie Yesu Kristo ɩdatɔ anɩaa, mlɩmápʋ Akristofɔ amʋʋ bʋna bʋdɛtsʋn, bʋtamakle agyʋma, bʋmɛdɛ atosunahɛ amʋʋ anɩlosuna mlɩ amʋsʋ gyi wa mba.

⁷ Mlɩ onuto mlɩyin ánɩ́ ilehian ánɩ́ mlétsia anɩ atsiabi. Tsufɛ anɩmɔwa ɔwʋlɩyɔ, natɩ tsʋntsʋn brɛá anɩbʋ mlɩ wa.

⁸ Anɩmegyi atɔ ɔhaa wa, kina mʋ́ ɩkɔ ka. Mboun anɩlɔyɔ agyʋma ɔpa mʋ́a onye kinkiinkin, mɛnɩ anɩméesi ipian tswɩ mlɩtɔ ɔkʋkʋʋkʋsʋ.

⁹ Megyi bɛɛ, anɩmá ɔkpa bla mlɩ anɩaa, mlɩkɩ anɩsʋ, sʋ anɩlɔbwɛ mʋ́ alɩ. Mboun anɩlɔbwɛ mʋ́ suna mlɩ, mɛnɩ mlɩ ɛ mlɔ́bwɛ mʋ́ odu.

¹⁰ Brɛá anɩbʋ mlɩ wa kʋraa a, anɩlɔwa mbla ha mlɩ anɩaa, “Ɔha ánɩ́ ɔmɔyɔ agyʋma mágyi atɔ.”

¹¹ Anɩlanuá mlɩtɔ akʋ bʋtsie kpaalɩ, bʋmɛdɛ agyʋma kʋkʋʋkʋ yɔ. Okengye bʋna bʋdɛwa tsʋn.

¹² Anɩdɛ amʋ́ ɔla da anɩ Wie Yesu Kristo ɩdatɔ anɩaa, bʋsi natɩ tsʋn, abʋyɔ agyʋma nya amʋ́ atogyihɛ.

¹³ Tamɛ apio, mlɩ mʋ́ a, yilebwɛ ɩmáta mlɩ ɔŋɛ.

¹⁴ Nɩ ɔkʋ megyi asʋn anfɩ anɩlawanlɩn sɩsɩ mlɩ anfɩsʋ a, mlɩkɩ mʋ wanklaan. Mlɩa mʋnyɔ mlɩmágyi mba, mɛnɩ pɛlɩ bɛ́kɩta mʋ.

¹⁵ Tamɛ mlɩmálu mʋ, mboun mlɩtɔɩ kpla mʋ fɛ mlɩ pio.

Ɩkla

¹⁶ Iwilwii Owie amʋ onuto ɔha mlɩ iwilwii brɛ fɛ́ɛ́tɔ ɔkpagyiɔkpasʋ. Anɩ Wie otsia mlɩ fɛ́ɛ́ wa.

¹⁷ Mɩ Paulo onuto lapʋ mɩ ɩbɩ wanlɩn ɩnɩ. Mɩ ɩda anfɩ ntɔwanlɩn wa mɩ nwʋlʋ fɛ́ɛ́ asɩ, pʋsuna ánɩ́ itsu mɩ onuto wa nɩ.

¹⁸ Anɩ Wie Yesu Kristo ogyi mlɩ fɛ́ɛ́ bʋalɛ.