2 Tesalonikafɔ 2 - Bulu Ntam Pɔpwɛ mʋ́a Israel Ɩlʋ

Yesu Mʋa Mblasʋ Mágyipʋ Amʋ

^1-2 Mɩ apio, nobwii ɩpa ha mlɩ. Anɩ Wie Yesu Kristo ɩba, pʋ́ alɩá abɔ́bwɛ kʋlɛ yefia mʋ asʋn ánɩ́ mlɩlanu ɩmákɔsɩ kpɩnkɩ mlɩ klʋn, ntɛ ɩha opuni itsii mlɩ. Nɩ akʋ bɛɛ, Ɔŋɛ Wankɩhɛ lalɛ suna amʋ́ loo, ntɛ ɩbʋ anɩ asʋn blɩhɛ ntɛ anɩ ɔwʋlʋ ɩkʋtɔ ánɩ́ anɩ Wie ɔbakɛ amʋ laba dodo kʋraa a, mlɩmáhogyi.

³ Mlɩmáha ɔhaa ɔmlɛ mlɩ ɔkpagyiɔkpasʋ. Ɛkɛ kpɔnkpɔntɩ anfɩ ɩmɛ́ɛba, nkɛtɩ aha bakʋsʋ lɩɩ Bulusʋ, ɔha amʋʋ ɔtamagyi Bulu mblasʋ, ɔbɛ́hɩ amʋ lalɩn ɔwan asa.

⁴ Obótsu ɩwɩ fʋa, kʋsʋ lɩɩ Bulu, ɩkpɩ pʋ́ togyitɔá anyankpʋsa bʋtosumsʋ, blɩá ɔdʋn amʋ́ fɛ́ɛ́. Obéyetsia Bulu ɔtswɛkpa ɩnʋ kʋraa, blɩ ɔbɛɛ mʋgyi Bulu.

⁵ Mlɩmɔkʋkaɩn ánɩ́ ntɛbla mlɩ asʋn anfɩ brɛá mbʋ mlɩ wa?

⁶ Mlɩyin tɔá ɩdɛ mʋ ɔkpa tin dodo. Nkɛtɩ mʋ ɔwanlɛbɩ lafʋn.

⁷ Tsufɛ Bulu mblasʋmágyi tumi anfɩ ɩdɛ agyʋma yɔ ŋaintɔ dodoodo, tamɛ ɔkʋ dɛ mʋ́ ɔkpa tin. Mʋ́ sʋ nkɛtɩ ɔha amʋ ladalɩ ɩnʋ.

⁸ Ɩnʋ mblasʋ mágyipʋ amʋ ɔbɛ́lɩn ɔwan nɩ. Tamɛ anɩ Wie Yesu oyinki ba a, mʋ ɔnɔtɔ afu kɛkɛ ɩbɔ́mɔ mʋ. Mʋ numnyam ɛ ɩbɔ́wankɩ wʋlɩ mʋsʋ yinta mʋ.

⁹ Nɩ mblasʋ mágyipʋ anfɩ ɔlɩn ɔwan a, ɔbɔ́pʋ Satan afunu tumi kpɔnkpɔntɩ bwɛ osuna pʋ́ ofula.

¹⁰ Ɔbɔ́tsʋn owuntɔlɩn ɔkpa ɔtsan-ɔtsansʋ mlɛ aha amʋʋ Bulu ɔbɛ́hɩ amʋ́ amʋ. Bulu ɔbɛ́hɩ amʋ́, tsufɛ bʋmekle ɔnɔkwalɩ amʋ asʋn, mɛnɩ Bulu ɔbɔ́hɔ amʋ́ nkpa.

¹¹ Ɩnɩ sʋ Bulu ɔbɔ́pʋ afunu ɔŋɛá mʋ́ ɔnɔ bʋ ɔnlɩn wa amʋ́tɔ, mɛnɩ bɔ́hɔ afunu asʋnsʋ gyi.

¹² Ɔbɛ́ha aha anfɩ bʋmɔhɔ ɔnɔkwalɩ amʋsʋ gyi, bʋtekle lakpan bwɛ anfɩ fɛ́ɛ́ ɩpɔn.

Mlɩ Nkpahɔ Sʋ Bulu Lɛlɛ Mlɩ

¹³ Apioá anɩ Wie tɔdwɛ, ilehian ánɩ́ abɛ́da Bulu ɩpan mlɩ nwunsʋ bregyibrɛ. Tsufɛ tsu brɛá ɔyɩ lɛlɩn ɔpá Bulu lɛlɛ mlɩ ánɩ́ ɔbɔ́tsʋn mʋ Ɔŋɛ amʋ pʋ́ mʋ ɔnɔkwalɩ asʋn amʋʋ mlɩlahogyi amʋsʋ tɩn mlɩ ɩwɩ, pʋhɔ mlɩ nkpa.

¹⁴ Ɩnɩ sʋ ɔlɔtsʋn asʋn wanklaan amʋʋ anɩlɛbla mlɩ amʋsʋ tɩ mlɩ ɔbɛɛ, mlɩbetsia anɩ Wie Yesu Kristo numnyam amʋtɔ nɩ.

¹⁵ Mʋ́ sʋ apio, mlɩlɩɩ kinkiinkin, amlɩkɩta ɔnɔkwalɩ amʋʋ anɩlosuna mlɩ amʋtɔ, mʋ́á anɩlɛbla mlɩ pʋ́ mʋ́á anɩlɔwanlɩn sɩsɩ mlɩ fɛ́ɛ́.

^16-17 Anɩ Wie Yesu Kristo onuto mʋa anɩ Sɩ Buluá ɔtɔdwɛ anɩ, alawa awɩtɔlɛ wa anɩ atɛtɔ-ɔnlɩn ánɩ́ ɩmɔ́ɔmɔ ɔnɔ ɛkɛkɛɛkɛ. Anɩdɛ ɩtɔ wanklaan ɔkpa kɩ. Mʋ́ sʋ ɔwa mlɩ ɔwʋnlɩn mlɩ asʋn blɩhɛ pʋ́ mlɩ bwɛhɛ kugyikʋtɔ.