2 Korintofɔ 9 - Bulu Ntam Pɔpwɛ mʋ́a Israel Ɩlʋ

Akristofɔá Bʋma Tɔtɔ Bʋa

¹ Imehian ánɩ́ nɔ́wanlɩn mlɩ ɔwʋlʋ tsu alɩá mlɩdɛ Bulu aha ánɩ́ bʋbʋ Yerusalem bʋa ɩwɩ.

² Tsufɛ nyin ánɩ́ mlɩhɩɛ mlɩdekleá mlɔ́bʋa amʋ́. Nagyi mlɩ ɩwɩ adansɩɛ suna amʋ́ mbɛɛ, tsu ofikʋ ɔpá Akristofɔá bʋbʋ Akaia ɔsʋlʋsʋ bɛda ɩwɩsʋ yaɩ ánɩ́ bɔ́bʋa. Mlɩ nsiwa laha ogya kʋ lawie amʋ́ ɔdʋdʋɔtɔ. Mʋ́ sʋ amʋ́ ɛ bafi mʋ́ asɩ.

³ Tamɛ ndɛ apio anfɩ wa sɩsɩ mlɩ, isuna ánɩ́ megyi kpaalɩ negyi mlɩ ɩwɩ adansɩɛ suna amʋ́. Mlɩda ɩwɩsʋ, fɛ alɩá nɛbla mlɩ yaɩ, amlɩka mlɩ tswɩtswɩ fɛ́ɛ́.

⁴ Tsufɛ nɩ Makedonia Akristofɔ amʋtɔ akʋ bobuo mɩ ba ɩnʋ, bowun ánɩ́ mlɩmɔkʋda ɩwɩsʋ fɛ alɩá nɛbla amʋ́ a, abɔ́sʋpa amʋ́ ansɩtɔ, tamɛ mlɔ́sʋpa dʋn mɩ.

⁵ Mʋ́ sʋ nabwɛ agywɩɩn ánɩ́ nɛ́ha Tito mʋa mʋ aba amʋ abʋgyankpa ba mlɩ wa, ɩha amlɩdunka tɔá mlɩlɛhɩɛá mlɛ́ha yaɩ. Tamɛ mlɩha mʋ́ tsu mlɩ klʋntɔ, megyi ɔhɩɛ igyi.

⁶ Mlɩkaɩn ánɩ́ ɔha ánɩ́ odu kpalobi a, kpalobi ɔtɔkpɔtɩ, tamɛ ɔha ánɩ́ odu tsɔtsɔ tɔkpɔtɩ tsɔtsɔ.

⁷ Mlɩtɔ okugyiɔkʋ ɔhaa mʋ́á ɔbɛ́talɩ tsu mʋ klʋntɔ. Ɩmábwɛ ɔhɩɛ, tsufɛ ɔha ánɩ́ ɔtɔpʋ ɔdwɛ kie atɔ asʋn Bulu tekle.

⁸ Bulu tɛha mlɩ tɔá mlɩdehian bregyibrɛ, dʋn alɩá ilehian mlɩ. Mʋ́ sʋ mlénya tɔá ɩdɛ mlɩ hian bregyibrɛ. Ɩbɔ́fʋn mlɩ sian, mlɔ́pʋbwɛ yile ha aha bamba.

⁹ Fɛ alɩá bɔwanlɩn wa Bulu asʋn amʋtɔ bɛɛ, “Bulu ɔha tɛlɛ ɩwɩtɔ kie ahianfɔ atɔ. Mʋ yilebwɛ tamata.”

¹⁰ Bulu tɛha adɔtɔpʋ atɔ-abi bʋtodu, ɔtɛha aha atogyihɛ. Mlɩgyi fɛ amʋ́. Ɔbɛ́ha mlɩ atɔ-abiá mlɔ́pʋ ɩkʋ kie aha, atogyihɛ tsɔtsɔɔtsɔ bɛ́dalɩ tsu mlɩ yilebwɛ amʋtɔ.

¹¹ Ɔbɛ́hɩɛ yula mlɩ ɔkpagyiɔkpasʋ, mɛnɩ mlɔ́wa awɩtɔlɛ ha aha bregyibrɛ. Ɩnɩ ɩbɛ́ha aha amʋ bɛ́da Bulu ɩpan, atɔ amʋʋ mlɩlapʋtsʋn anɩsʋ ha amʋ́ amʋ sʋ.

¹² Tsufɛ atoku anyɔ ɔbɛ́dalɩ tsu mlɩ atɔ hahɛ anfɩtɔ. Megyi atɔ amʋʋ mlɩlapʋha Bulu aha amʋʋ atɔ dɛ amʋ́ hian, bʋbʋ Yerusalem amʋ nkʋlɛ, mboun ɩbɛ́ha aha tsɔtsɔɔtsɔ bɛ́hɩɛ da Bulu ɩpan.

¹³ Tsufɛ nɩ mlɛha amʋ́ a, ɩbɛ́ha bɛ́kanfʋ Bulu. Ibósuna ánɩ́ lɛlɛ mlɩdɛ Kristo asʋn wanklaan amʋʋ mlɩlɔhɔ amʋsʋ gyi, mlɩdɛ awɩtɔlɛ ɛ wa ha amʋ́a aha bamba.

¹⁴ Bɛ́hɩɛ kaɩn mlɩsʋ, bɔ mpaɩ ha mlɩ, tsu awɩtɔlɛ kpɔnkpɔntɩ amʋʋ Bulu lapʋha mlɩ amʋ sʋ.

¹⁵ Ada Bulu ɩpan ha mʋ atokiehɛ anfɩ ɩdʋn blɩ anfɩ!