2 Korintofɔ 7 - Bulu Ntam Pɔpwɛ mʋ́a Israel Ɩlʋ

¹ Mɩ apio adwɛpʋ, Bulu lahɩɛ ntobiá igyi alɩ yaɩ anɩ. Mʋ́ sʋ mlɩha afwɩ ɩbɩ lɛ togyitɔá ɩbɔ́kpɔɩ anɩ ɔyʋlʋ pʋ́ anɩ ɔkla fɛ́ɛ́tɔ. Mlɩha anya Bulu ifu, mɛnɩ ɩbɛ́ha anɩ ɩwɩ bɛtɩn, ifin kʋkʋ mɛ́ɛtra tsia anɩ ɩwɩ.

Paulo Ansigyi

² Kokoli, mlɩmákʋla ɩwɩ anɩsʋ! Anɩmɔkʋpʋ lalahɛ gyi ɔhaa. Anɩmɔkʋyinta ɔhaa, anɩmɔkʋsisi ɔhaa ɛ.

³ Megyi ɩpɔn ndɛ mlɩ ha sʋ ndɛ asʋn anfɩ blɩ. Tsufɛ nablɩ bɔtsʋn mbɛɛ, anɩtekle mlɩ asʋn. Lowutɔ o, nkpatɔ o, anɩmɛ́ɛtan mlɩsʋ ɛkɛkɛɛkɛ.

⁴ Ntɛtalɩ bla mlɩ mɩ klʋntɔ asʋn, ndɛ ɩwɩ ɛ tsu mlɩsʋ wanklaan. Anɩ ipian fɛ́ɛ́ ɔma a, mlɩlawa mɩ atɛtɔ-ɔnlɩn. Ansigyi kpɔnkpɔntɩ kʋ labʋla mɩ klʋntɔ.

⁵ Tsufɛ brɛá anɩlowie Makedonia a, anɩmenya ɔkpa da ɔkpʋnʋ. Atsʋn nfɩ asʋn, ayinki nfɩ ɩtrɛ. Mʋ́ sʋ ifu letsia anɩ ayetɔ.

⁶ Tamɛ Buluá otolwii aha amʋʋ ɩwɩ lawu amʋ́ ɩklʋn amʋ lɛkpa Tito ba anɩ, pʋlwii anɩ ɩklʋn.

⁷ Megyi mʋ ɩba amʋ nkʋlɛ lɛha ɩklʋn lolwii anɩ, mboun asʋn ánɩ́ ɔlɔpʋtsua ɩnʋ ba ɛ. Ɔlɛbla anɩ ɔbɛɛ, mlɩhɩɛ mlɩdekleá mlówun mɩ. Alɩá asʋn amʋ ɩlahan mlɩ, mlɩlanu ɩwɩasɩ ánɩ́ mlɩmɛbɩ bwɛ pʋ́ alɩá mlɩlahɩɛ tsula dɩnka mɩ klɛsʋ, sʋ ansɩ lɛtra gyi mɩ tsɩa.

⁸ Tsufɛ nɩ mɩ ɔwʋlʋ amʋtɔ asʋn lɛhan mlɩ kʋraa a, mɩ mʋ́ ɩmɛhan mɩ. Ɩbʋ mʋ́tɔá ɩlɛhan mɩ brɛ kʋtɔ, tsufɛ nowun ánɩ́ ɩlɛha awɩrɛhɔ lɛkɩta mlɩ kpalobi.

⁹ Ansɩ dɛ mɩ gyi sei. Megyi alɩá ɩlɔwa mlɩ awɩrɛhɔ sʋ. Mboun alɩá awɩrɛhɔsu amʋ ɩlaha mlɩladamli klʋntɔ sʋ. Tsufɛ mlɩ awɩrɛhɔsu anfɩ odu Bulu tekle nɩ. Mʋ́ sʋ mɩ asʋn amʋ imeyinta tɔtɔ tsu mlɩ ɩwɩ.

¹⁰ Tsufɛ awɩrɛhɔsuá igyi Bulu apɛ tɔpʋ klʋntɔdamli ba. Ɩtɛha anɩtenya nkpa. Mʋ́ odu bʋ ɔsɩn, tamɛ ɩma ɔsɩn. Ɔyɩtɔ awɩrɛhɔsu mʋ́ a, lowu ɩtɔpʋba.

¹¹ Mlɩkɩ tɔá awɩrɛhɔsuá igyi Bulu apɛ latɩ ha mlɩ! Ɩlaha mlɩlatsu ɩkʋ lɛ asʋn amʋtɔ, mlɩdesuna ánɩ́ mlɩ asʋn da ɔkpa sʋ ɔblɔ ɛ dɛ mlɩ. Ɩlatsii mlɩ opuni, ɩlaha mlɩhɩɛ mlɩdekleá mlówun mɩ. Mlɩlatsula dɩnka mɩ klɛsʋ. Mlɩhɩɛ mlɩdedunka ánɩ́ mlɛbɩtɩ lalahɛ ɔbwɛpʋ amʋ ɩsʋ. Lɛlɛ, mlɩlalɛ suna ánɩ́ mlɩmegyi ɩpɔn asʋn anfɩtɔ.

¹² Nɔwanlɩn ɔwʋlʋ sɩsɩ mlɩ, tamɛ megyi aha anfɩ sʋ. Megyi ɔha amʋʋ ɔlɔbwɛ ɩla, ntɛ ɔha amʋʋ ɔlɔpʋ ɩla gyi mʋ amʋ sʋ. Alɩá nɛ́lɛ suna mlɩ Bulu ansɩtɔ ánɩ́ mlɩlatsula dɩnka mɩ klɛsʋ mboun sʋ.

¹³ Ɩnɩ lahɩɛ wa anɩ atɛtɔ-ɔnlɩn. Mʋ́a ɩdʋn kʋraa a, ansɩ legyi anɩ, brɛá anɩlowun ánɩ́ mlɩ fɛ́ɛ́ mlɩlaha ansɩ dɛ Tito gyi, tsufɛ mlɩlaha ɩklʋn ladɩ mʋ asɩ.

¹⁴ Nɩ nɛkanfʋ mlɩ mʋ ansɩtɔ kʋraa a, mlɩmɛha pɛlɩ mɛkɩta mɩ. Alɩ amʋʋ asʋn amʋʋ anɩlɛbla mlɩ amʋ fɛ́ɛ́ igyi ɔnɔkwalɩ amʋ a, alɩ kanfʋ amʋʋ nɛkanfʋ mlɩ mʋ ansɩtɔ amʋ ɛ laba mʋ́tɔ nɩ.

¹⁵ Nɩ Tito ɔkaɩn alɩá mlɩ fɛ́ɛ́ mlɩtɛyaa asʋ ha mʋ, hɔ mʋ asʋn blɩhɛ, pʋ́ alɩá mlɩtenya ifu kpɩnkɩ mʋ ansɩtɔ a, ɔtɛtra nya mlɩ ɩwɩ ɔdwɛ tsɩa.

¹⁶ Ansɩ ɩhɩɛ dɛ mɩ gyiá nɛ́talɩ pʋ ansɩ dɩnka mlɩsʋ ɔkpagyiɔkpasʋ.