2 Korintofɔ 5 - Bulu Ntam Pɔpwɛ mʋ́a Israel Ɩlʋ

¹ Anɩ ɔyʋlʋ anfɩ igyi fɛ kantankpa ánɩ́ anɩtsie mʋ́tɔ. Nɩ bobwie mʋ́ a, Bulu ɔbɛ́ha anɩ obu bamba ɔsʋsʋ. Mʋmʋ a, megyi nyankpʋsa leyi mʋ́. Mʋ onuto leyi mʋ́, imóobwie ɛkɛkɛɛkɛ.

² Tsufɛ sei kʋraa ɩdɛ anɩ ipian ɔsʋlʋsʋ-ɔyʋlʋ anfɩtɔ. Anɩhɩɛ anɩgyo ɛkɛá ɔbɔ́pʋ anɩ ɔsʋsʋ-ɔyʋlʋ wa anɩ fɛ atadɩɛ.

³ Mʋmʋ anɩmɔ́ɔbwɛ fɛ ɔŋɛá ɩma ɔyʋlʋ, anɩna yaya.

⁴ Ɩdɛ anɩ pian, anɩdɛkɩmɩ brɛ anfɩ anɩtra anɩbʋ anɩ ɔyʋlʋ dada anfɩtɔ. Megyi bɛɛ anɩdekleá awu, adalɩ ɔyʋlʋ anfɩtɔ. Mboun anɩdekleá Bulu ɔwa anɩ ɔsʋsʋ klɛ amʋʋ ɩtamawu plɔ amʋ, mɛnɩ ibégyi mʋ́ anfɩ itowu plɔ anfɩsʋ.

⁵ Bulu onuto lɛla anɩ yaɩ ha mʋ́, ɔlɔpʋ Ɔŋɛ Wankɩhɛ amʋ wa anɩtɔ. Mʋ́gyi ibwiá ɔlɛdɩnka mʋ́sʋ nɩ.

⁶ Mʋ́ sʋ anɩtɔwa klʋn bregyibrɛ. Ɩbʋ mʋ́tɔá brɛ anfɩ anɩbʋ ɔsʋlʋsʋ-ɔyʋlʋ anfɩtɔ a, anɩbʋ ɩfɔ anɩ Wie wa.

⁷ Ɩnɩ sʋ hogyi anɩlapʋ anɩtsie nkpa, megyi tɔá ansibi dewun.

⁸ Ee! Anɩhɩɛ anɩdɛ klʋn wa, tsufɛ tɔá anɩhɩɛ anɩdedunka gyi abɔ́wa ɩfɔ ɔsʋlʋsʋ-ɔyʋlʋ anfɩ wa, ayetsia anɩ Wie wa.

⁹ Mʋ́ sʋ nɩ anɩbʋ ɔsʋlʋsʋ nfɩ o, ɔtɩnɛ bamba o, tɔá ɩdɩn anɩ klʋnsʋ brɛ fɛ́ɛ́ gyi, abɔ́bwɛ tɔá ibégyi anɩ Wie ansɩ.

¹⁰ Tsufɛ anɩ fɛ́ɛ́ abɛ́yɛlɩɩ Kristo ansɩtɔ, obégyi anɩtɔ okugyiɔkʋ asʋn, ka mʋ ɩkɔ anɩ ɔsʋlʋsʋ-ɔyʋlʋ anfɩ bwɛhɛ ɔnɔ. Yile igyi o, lalahɛ igyi o.

Bulu Onyawielɛ

¹¹ Anɩhɩɛ anɩyin ánɩ́ ilehian ánɩ́ abénya anɩ Wie ifu. Mʋ́ sʋ anɩdɛtɔɩ kpla aha anɩaa, amʋ́ ɛ bʋnya mʋ ifu. Bulu hɩɛ oyin anɩ. Nahogyiá mlɩ ɛ mlɩyin anɩ mlɩ klʋntɔ.

¹² Megyi ɩwɩ anɩtra anɩdetsu suna mlɩ. Mboun anɩdɛ mlɩ ɔkpa suna, mɛnɩ mlótsu ɩwɩ anɩ sʋ. Fówun nɩ aha bʋdɛ ɩwɩ tsu tɔá ɔha tɔpʋ ansibi wun sʋ, imegyi tɔá ɩbʋ ɔha klʋntɔ sʋ a, mlénya ɩkʋ bla amʋ́.

¹³ Tsufɛ nɩ bɛɛ anɩ nwun layinta kʋraa a, Bulu asʋn igyi. Tamɛ nɩ bɛɛ anɩ ansɩtɔ da mʋ́ a, ɩda ha mlɩ.

¹⁴ Ɔdwɛ amʋʋ Kristo bʋ ha anɩ amʋ dɛ anɩ kpa, tsufɛ anɩlanu ɩwɩasɩá mʋ nkʋlɛ lowu ha aha fɛ́ɛ́. Mʋ́ sʋ mʋa aha fɛ́ɛ́ bawu.

¹⁵ Olowu ha aha fɛ́ɛ́ lɛlɛ, mɛnɩ aha ánɩ́ bénya nkpa pɔpwɛ amʋ bʋmɛ́ɛtra tsia nkpa alɩá bʋdekle. Mboun bétsia nkpa ha Kristo amʋʋ olowu, Bulu lɔkʋsʋa mʋ ha amʋ́ amʋ.

¹⁶ Ɩnɩ sʋ anɩtra anɩmɛdɛ ɔhaa kɩ fɛ alɩá ɔyɩtɔ aha bʋtɛkɩ mʋ. Ɩbʋ mʋ́tɔá brɛ amʋ anɩletsia kɩ Kristo fɛ alɩá ɔyɩtɔ aha bʋtɛkɩ mʋ, tamɛ anɩtra anɩmɛdɛ mʋ kɩ alɩ.

¹⁷ Mʋ́ sʋ nɩ ɔha mʋa Kristo bɔbwɛ ɩkʋlɛ a, alabwɛ ɔha pɔpwɛ. Mʋ tsiatɔ dada amʋ fɛ́ɛ́ ɩlatsʋn. Mʋ tsiatɔ labwɛ pɔpwɛ!

¹⁸ Nkpa pɔpwɛ anfɩ itsu Bulu wa. Mʋlɔtsʋn Kristosʋ bwɛ anɩ anfɩ anɩgyi mʋ alupʋ anfɩ mʋ anyawie. Alapʋ agyʋma anfɩ wa anɩ ɩbɩtɔ, ɔbɛɛ alɛ aha bamba ɛ anyawie ha mʋ.

¹⁹ Tsufɛ Bulu lɔtsʋn Kristosʋ ɔdɛ ɔyɩtɔ aha damli bwɛ mʋ anyawie. Ɔtra ɔmɛdɛ amʋ́ lakpan ɩwɩ akunta bu ha amʋ́. Ɩnɩ ɔlɔpʋwa anɩ ɩbɩtɔ ɔbɛɛ, abla aha nɩ.

²⁰ Kristo atsɩamɩ anɩgyi, Bulu dɛtɔɩ tsʋn anɩsʋ ha mlɩ. Mʋ́ sʋ anɩlɩɩ Kristo ɔlɩɩkpa anɩdɛ mlɩ kokoli anɩaa, “Mlɩha Bulu ɔbwɛ mlɩ mʋ anyawie!”

²¹ Tsufɛ Kristo mɔbwɛ lakpan kʋkʋ! Tamɛ Bulu lɔpʋ mʋ bɔ afɔdɩɛ anɩ lakpan sʋ, mɛnɩ ɔbɔ́tsʋn anɩa mʋnyɔ ɩkʋlɛbwɛsʋ tsu anɩ ánɩ́ anɩ asʋn da ɔkpa mʋ ansɩtɔ.