2 Korintofɔ 4 - Bulu Ntam Pɔpwɛ mʋ́a Israel Ɩlʋ

Ɔlɔtɔ Siadɩɛ

¹ Bulu lawun anɩ nwɛ pʋ agyʋma anfɩ wa anɩ ɩbɩtɔ. Mʋ́ sʋ abatɔ tamawu anɩ.

² Anɩlakina tɔá ɩbʋ pɛlɩ pʋ́ okluntɔ atɔ fɛ́ɛ́. Anɩmɛdɛ aha mlɛ, anɩmɛdɛ Bulu asʋn amʋ ɛ damli bun. Mboun anɩdɛ ɔnɔkwalɩ amʋ onuto blɩ pʋlɛ ɩwɩ suna aha fɛ́ɛ́, ɩwankɩ amʋ́ alɩá anɩgyi Bulu ansɩtɔ.

³ Nɩ tɔkʋ ibun asʋn wanklaan amʋʋ anɩdɛblɩ amʋsʋ kʋraa a, aha amʋʋ bʋdɛfwɩ amʋ nkʋlɛ ibun ha.

⁴ Ɔbʋnsam gyi ɔyɩ lalahɛ anfɩsʋ ogyipʋ. Mʋlapʋ atɔ tin aha anfɩ bʋtamahɔ Bulu gyi anfɩ ansibi. Mʋ́ sʋ bʋmɛdɛ asʋn wanklaan amʋʋ igyi wankɩ amʋ asɩ nu nɩ. Wankɩ amʋ gyi Kristo. Mʋlɛhɩɛ lɩan Bulu numnyam nɩ.

⁵ Tsufɛ anɩmɛna anɩmɛdɛ anɩ onuto ɩwɩ asʋn ɔkan da. Yesu Kristo ɩwɩ asʋn ɔkan anɩdɛda anɩaa, mʋgyi anɩ Wie. Tɔá anɩtɛblɩ tsu anɩ ɩwɩ gyi, Yesu sʋ anɩlabwɛ mlɩ asumpʋ.

⁶ Tsufɛ Bulu amʋʋ ɔlɛblɩ ɔbɛɛ, “Wankɩ ɩdalɩ tsu okluntɔ!” amʋ kɛn laha mʋ wankɩ amʋ ɩdɛwankɩ anɩ klʋntɔ. Ɩlaha anɩlabɩ ánɩ́ mʋ numnyam amʋ ɩdɛwankɩ Yesu Kristo ansɩtɔ.

⁷ Tamɛ anɩgyi fɛ nlɔ pwɛhɛá siadɩɛ bʋ mʋ́tɔ. Siadɩɛ amʋ gyi wankɩ mʋ́a tumi anfɩ ɩdɛwankɩ anɩ klʋntɔ. Idesuna ánɩ́ tumi kpɔnkpɔɔnkpɔntɩ anfɩ imotsu anɩ, Bulu wa itsu.

⁸ Bʋdɛ anɩ han ɔkpagyiɔkpasʋ, tamɛ bʋmɔkʋtalɩ sa anɩ tin. Ɩwɩ dɛ anɩ klɩ, tamɛ ɩmɔkʋkpɔn anɩ.

⁹ Bʋdɩn anɩsʋ, tamɛ Bulu mɔkʋsi anɩ ha. Bʋtɛfɩn anɩ da, tamɛ Bulu sʋ anɩmɔkʋwu.

¹⁰ Anɩlatsula ɩdɛ anɩ ɔyʋlʋ anfɩ ipian bregyibrɛ. Anɩdewu fɛ Yesu, mɛnɩ mʋ nkpa amʋ ɩbɛ́lɩn ɔwan anɩtɔ.

¹¹ Yesu sum sʋ anɩ nkpa atsiapʋ anfɩ anɩtefia lowu bregyibrɛ. Alɩá ɩbɔ́bwɛ mʋ nkpa bɛlɩn ɔwan anɩ ɔyʋlʋ anfɩ idewu anfɩtɔ sʋ.

¹² Ɩnɩ desuna ánɩ́ lowu dɛ anɩ lala, mlɩ ɛ mlɩdɛ nkpa ánɩ́ ɩtamata nya.

¹³ Tamɛ anɩbʋ mʋ́sʋ anɩdɛ Bulu asʋn amʋ ɔkan da. Tsufɛ anɩlɔhɔ mʋ gyi fɛ alɩá Israel ɩlʋ ɔwapʋ amʋ lɔwanlɩn wa Bulu asʋn amʋtɔ ɔbɛɛ, “Nɔhɔ Bulu gyi. Mʋ́laha sʋ ndɛ mʋ́ ɔkan da nɩ.”

¹⁴ Anɩyin ánɩ́ alɩ amʋʋ Bulu lɔkʋsʋa anɩ Wie Yesu tsu afulitɔ amʋ a, alɩ kɛn ɔbɔ́kʋsʋa anɩ, ɔbɛ́kpa anɩa mlɩnyɔ fɛ́ɛ́ ba mʋ ɩwɩ wa nɩ.

¹⁵ Ɩnɩ fɛ́ɛ́ bɔ́wa labi ha mlɩ, mɛnɩ nɩ Bulu hɩɛ ɔdɛ awɩtɔlɛ wa, kpa aha ɔdʋdʋɔ ba Kristo wa a, bɛ́hɩɛ da mʋ ɩpan, wa mʋ numnyam.

Hogyi Pʋtsia

¹⁶ Mʋ́ sʋ abatɔ tamawu anɩ. Ɩbʋ mʋ́tɔá anɩ ɔyʋlʋ anfɩ idewu mʋ́, tamɛ Bulu dɛ anɩ ɔkla ɔwʋnlɩn wa ekekegyiɛkɛ.

¹⁷ Tsufɛ ɩwɩɔsɩn kpalobi anfɩ anɩdewun sei anfɩ ɩbɛ́ha abénya numnyam kpɔnkpɔɔnkpɔntɩá ɩtamata, ɩdʋn ɩwɩɔsɩn anfɩ.

¹⁸ Mʋ́ sʋ anɩmɛdɛ ɩwɩɔsɩn anfɩ anɩdewun anfɩ bu. Mʋ́á nyankpʋsa ansibi tamawun ɔkpa anɩdɛkɩ. Tsufɛ ɩwɩɔsɩn anfɩ ɩbɛ́ba bɔtsʋn. Ansigyi amʋʋ ɩbʋ ɔma, ibétsia brɛ fɛ́ɛ́ amʋ ɔkpa anɩdɛkɩ.