2 Korintofɔ 2 - Bulu Ntam Pɔpwɛ mʋ́a Israel Ɩlʋ

¹ Mʋ́ sʋ nabwɛ agywɩɩn ánɩ́ mmɛ́ɛtra ba bɔwa mlɩ awɩrɛhɔ.

² Tsufɛ nɩ nɛba bɔwa mlɩ awɩrɛhɔ a, ma ɔbɛ́ha ansɩ bégyi mɩ dʋn mlɩ amʋʋ nawa awɩrɛhɔ amʋ?

³ Mʋ́ sʋ nɔwanlɩn ɔwʋlʋ gyankpapʋ amʋ sɩsɩ mlɩ nɩ. Fówun nɩ nɛba a, mlɩ amʋʋ mlɛ́ha ansɩ bégyi mɩ amʋ mlɩmɛ́ɛla ha awɩrɛhɔ mboun ɩkɩta mɩ. Tsufɛ mɩ ansɩ dɩn mlɩ fɛ́ɛ́sʋ ánɩ́ nɩ ansɩ dɛ mɩ gyi a, mlɩ ɛ ansɩ bégyi mlɩ.

⁴ Megyi ansigyi nɔpʋwanlɩn ɔwʋlʋ amʋ. Asʋn ɩhɩɛ dɛ mɩ han, ndesu asa nɔwanlɩn mʋ́! Tamɛ megyi alɩá nɛ́ha mlégyi awɩrɛhɔ sʋ nɔwanlɩn mʋ́. Mboun alɩá mlɛ́bɩá ntɛhɩɛ dwɛ mlɩ sʋ.

Lakpansikie

⁵ Ɔha amʋʋ ɔlɔpʋ asʋn ba ɔpasua amʋtɔ amʋ mɔkʋpʋ ɔlala gyi mɩ. Nɩ bɛɛ bʋkɩ mʋ́ a, ɔpasua amʋ fɛ́ɛ́ alapʋ asʋn gyi. (Mmedekleá nɔ́dʋn mʋ́ blɩ.)

⁶ Ɩsʋbɩtɩ amʋʋ mlɩ ɔdʋdʋɔ mlɩlɛbɩtɩ mʋ amʋ ɩtsɔ mʋ.

⁷ Ɩlafʋn ánɩ́ mlésikie mʋ, yia mʋ klʋn ngya. Fowun asʋn mɔ́ɔdʋn mʋ, ɩwɩ móowu mʋ.

⁸ Mʋ́ sʋ nokokoli mlɩ, mlɩlɛ suna mʋ ánɩ́ mlɩtra mlɩbʋ mʋ ɩwɩ ɔdwɛ.

⁹ Ndekleá nɛ́bɩ nɩ mlɩtegyi mɩ asʋn amʋ fɛ́ɛ́sʋ. Mʋ́ sʋ nɔwanlɩn ɔwʋlʋ amʋ nɩ.

¹⁰ Nɩ mlesikie ɔkʋ a, mɩ ɛ nasikie mʋ. Nɩ nesikie mʋ ɛ a, mlɩ sʋ nasikie mʋ Kristo ɩdatɔ, nɩ ilehian nɩ.

¹¹ Mɛnɩ Ɔbʋnsam oméenya anɩ ɩwɩ ɔkpa, tsufɛ anɩyin ɩkpa ánɩ́ ɔtɔtsʋn mʋ́sʋ fɛ́ɛ́.

Paulo Klʋn Mɛdɩ Mʋ Asɩ

¹² Brɛá nɛba Kristo asʋn wanklaan amʋ ɔkan ɔdakpa Troa wulutɔ a, nowun ánɩ́ anɩ Wie lafinki ɔkpa ha mɩ.

¹³ Tamɛ mɩ klʋn mɛdɩ mɩ asɩ, tsufɛ mmɔtʋ mɩ pio Tito ɩnʋ. Mʋ́ sʋ nɛkla amʋ́ ka tsʋn yɔ Makedonia nsaɩntɔ.

Ɩsʋgyi Kristo Ɩdatɔ

¹⁴ Tamɛ ndɛ Bulu ɩpan da ánɩ́ Kristo ɩsʋgyi sʋ alabwɛ anɩ ndoun, alakpa anɩ buo ɩwɩ, anɩdɛ mʋ ɩsʋgyi amʋ nkɛ gyi. Nɩ ayɔ ɔtɩnɛgyiɔtɩnɛ a, ɔtɔtsʋn anɩsʋ bla aha amʋ Kristo asʋn wanklaan amʋ, fɛ alɩá ofobi fanfan tɔwa ɔfan yɔ tsutsuutsu.

¹⁵ Lɛlɛ mʋ́ a, Kristo gyi atɔ tɔhɛ, anɩgyi mʋ́ ɔfan ánɩ́ ɩdɛkʋsʋ ha Bulu, ha aha ánɩ́ bʋdɛ nkpa nya pʋ́ amʋ́á bʋdɛfwɩ fɛ́ɛ́.

¹⁶ Itobon aha ánɩ́ bʋdɛfwɩ, kpa amʋ́ ya lowutɔ, ɩtɔwa aha ánɩ́ ɔdɛ amʋ́ nkpa hɔ ɔfan, kpa amʋ́ ya nkpatɔ. Ma mɛɛ lɔfʋn ha gyʋma anfɩ odu yɔ? Ɔhaa má ɩnʋ.

¹⁷ Anɩ mʋ́ anɩmegyi fɛ aha ɔdʋdʋɔá bʋdɛ Bulu asʋn amʋ fɛ pʋkle kɔba. Ɩnɩá Bulu lɔwa anɩ sʋ a, anɩtɛblɩ mʋ́ ɔnɔkwalɩsʋ, fɛ Kristo asumbiá bʋlɩɩ Bulu ansɩtɔ.