2 Korintofɔ 13 - Bulu Ntam Pɔpwɛ mʋ́a Israel Ɩlʋ

Ɩkla Pʋ́ Ɔlada

¹ Otse sasɩ nɛba mlɩ wa a. Bulu asʋn lɛblɩ ɔbɛɛ, “Asa mlɛ́ha ɔkʋ ɩpɔn a, mlɩnu adansɩfɔ abanyɔ ntɛ abasa ɔnɔ.”

² Brɛá nɛba mlɩ wa otse nyɔsɩ a, nɛda aha amʋʋ bʋdɛ lakpan bwɛ amʋ fɛ́ɛ́ ɔla. Ntra ndɛ amʋ́a aha trahɛ fɛ́ɛ́ ɔla da, tsufɛ nɩ nɛba ɩnʋ a, nɛ́hɩɛ bɩtɩ amʋ́ ɩsʋ.

³ Tsufɛ mlɩdekleá mlɛ́bɩá lɛlɛ Kristo dɛtɔɩ tsʋn mɩsʋ. Kristo ɔwʋnlɩn ɔnɔ mɔkʋba asɩ mlɩtɔ. Mʋ tumi ɛ ɩhɩɛ tsɔ mlɩtɔ.

⁴ Ɩbʋ mʋ́tɔá mʋ oyikpalihɛsʋ lowu ilosuna ánɩ́ alapɔn, tamɛ sei a, otsie nkpa Bulu tumitɔ. Brɛá anɩa mʋnyɔ anɩlɔbwɛ kʋlɛ a, anɩlɔpɔn, tamɛ sei anɩa mʋnyɔ anɩtsie nkpa Bulu tumitɔ. Mʋ́ anɩdɛpʋkpa mlɩ nɩ.

⁵ Mlɩyɔ mlɩ nwuntɔ kɩ bɛɛ, ahogyipʋ onuto mlɩgyi? Mlɩkapʋ mlɩ ɩwɩ kɩ bɛɛ, lɛlɛ Kristo Yesu bʋ mlɩtɔ? Mlɩlawun ánɩ́ ɔbʋ mlɩtɔ? Nɩ mlɩmɔkʋwun mʋ mlɩtɔ mʋ́ a, mʋmʋ megyi ahogyipʋ onuto mlɩgyi.

⁶ Nahogyiá mlɛ́ba bɛbɩ ánɩ́ Kristo ahogyipʋ onuto anɩgyi.

⁷ Anɩdɛ Bulu kokoli anɩaa, mlɩmátra bwɛ lalahɛ kʋkʋ. Megyi alɩá ibósuna ánɩ́ anɩgyi Kristo ahogyipʋ onuto sʋ. Tamɛ nɩ aha bʋdɛkɩ bɛɛ megyi Kristo ahogyipʋ onuto anɩgyi o a, ɔha mlɩ mʋ́ amlɩbwɛ tɔá ɩda ɔkpa.

⁸ Tsufɛ anɩ mʋ́ anɩmɛ́ɛtalɩ kʋsʋ lɩɩ ɔnɔkwalɩ asʋn amʋsʋ, dʋn ánɩ́ abɛ́ha mʋ́ ɩbɔ́yɔ nkpa wʋlɛ.

⁹ Nɩ anɩ mʋ́ anɩ ɔwʋnlɩn ɔnɔ laba asɩ, mlɩ klɛ ɩlawa ɔnlɩn a, ansɩ bégyi anɩ. Tɔá anɩdɛ Bulu kʋlɩ gyi, ɔha amlɩlalɩɩ kinkiinkin, amlɩdan Kristo hogyitɔ.

¹⁰ Ɩnɩ sʋ nagyankpa ndɛ ɔwʋlʋ anfɩ wanlɩn sɩsɩ mlɩ, asa amba ɩnʋ nɩ. Mɛnɩ nɩ nɛba a, mmóobotsu ɩbɩ mlɩsʋ. Tsufɛ ndekleá nɔ́pʋ tumi amʋʋ anɩ Wie lapʋha mɩ amʋ bʋa mlɩ amlɩdan. Mmɔ́ɔpʋyinta mlɩ.

¹¹ Apio, ɩtrahɛ a, ansɩ igyi mlɩ. Mlɩbɔ mbɔdɩ amlɩlɩɩ kinkiinkin, amlɩdan Kristo hogyitɔ. Mlɩwa aba ɔwʋnlɩn. Mlɩ agywɩɩn ɩbwɛ kʋlɛ, amlɩtsia iwilwiitɔ, mɛnɩ Bulu amʋʋ ɔtɔdwɛ anɩ, ɔtɛha anɩ iwilwii amʋ obétsia mlɩtɔ brɛ fɛ́ɛ́. Nɛha mlɩ itsia gyagyagya.

¹² Mlɩha aba itsia, amlɩlata aba puta ɔdwɛsʋ. Bulu aha amʋʋ bʋbʋ nfɩ amʋ fɛ́ɛ́ bɛha mlɩ itsia gyagyagya.

¹³ Anɩ Wie Yesu Kristo bʋalɛgyi, Bulu ɔdwɛ pʋ́ Ɔŋɛ Wankɩhɛ kʋlɛbwɛ itsia mlɩ fɛ́ɛ́sʋ.