2 Korintofɔ 12 - Bulu Ntam Pɔpwɛ mʋ́a Israel Ɩlʋ

Paulo Atowunhɛ Pʋ́ Mʋ Atɔ Lɛsunahɛ

¹ Ilehian ánɩ́ nótsu ɩwɩ, tamɛ tɔtɔɔtɔ ɩma ɩwɩtsutɔ. Tamɛ mblɩ atɔá nowun pʋ́ tɔá anɩ Wie lalɛ suna mɩ.

² Nfi duana (14) nɩ, bɔwan mɩ ya ɔsʋsʋ sasɩtɔ. (Mɩ nyankpʋsa-oyi lɔyɔ ɩnʋ o, mɩ ɔkla o, mmɛ́ɛtalɩ bɩ. Bulu nkʋlɛ yin.)

^3-4 Fɛ alɩá nakʋblɩ a, bɔwan mɩ ya Paradiso. (Mɩ nyankpʋsa-oyi lɔyɔ ɩnʋ o, mɩ ɔkla o, mmɛ́ɛtalɩ bɩ. Bulu nkʋlɛ yin.) Nonu asʋn ánɩ́ ɩma blɩtɔ, ɔhaa ɛ má ɔkpa blɩ mʋ́.

⁵ Nɛ́talɩ pʋ ɩtɔ amʋʋ nowun amʋ tsu ɩwɩ, tamɛ mmɔ́ɔpʋ mɩ atɔ bwɛhɛ tsu ɩwɩ. Ntobiá ɩtɛha mɩ ɔwʋnlɩn ɔnɔ tɛba asɩ ntɔpʋtsu ɩwɩ.

⁶ Nɩ mbɛɛ nótsu ɩwɩ kʋraa a, mmóotsu ɩwɩ fɛ ɔha mimlahɛ, tsufɛ nɛ́blɩ ɔnɔkwalɩ. Tamɛ mmɔ́ɔbwɛ. Mmedekleá ɔhaa ɔkɩ mɩ dafa alɩá mɩ tsiatɔ gyi, ntɛ asʋn amʋʋ nɔpʋba amʋ.

⁷ Alɩá mmɔ́ɔpʋ ntobi anfɩ ɩbʋ ifu, ɩbʋ wanwan, Bulu lalɛ suna mɩ anfɩ tsu ɩwɩ sʋ a, ɔlɔpʋ owu kʋ wa mɩ awutɔ, igyi Ɔbʋnsam-ɔbɔpʋ. Ɩtɛda wɔ mɩ, mɛnɩ mmóotsu ɩwɩ.

⁸ Nakokoli anɩ Wie Yesu tse sa kɛkɛ mbɛɛ, ɔlɛ ɩtɔ amʋ mɩtɔ.

⁹ Tamɛ asʋn ánɩ́ ɔtɛbla mɩ bregyibrɛ gyi, “Mɩ awɩtɔlɛ pɛ gyi tɔá fehian. Tsufɛ ɔha ánɩ́ mʋ ɔwʋnlɩn ɔnɔ laba asɩtɔ mɩ tumi tɛhɩɛ lɩn ɔwan.” Ɩnɩ sʋ ɩbʋ mɩ ansigyiá nɔ́pʋ tɔá ɩtɛha mɩ ɔwʋnlɩn ɔnɔ tɛba asɩ tsu ɩwɩ, mɛnɩ Kristo tumi amʋ ɩbɛ́hɩɛ bun mɩsʋ.

¹⁰ Kristo sʋ ansɩ bégyi mɩ bregyibrɛ. Nɩ mɩ ɔwʋnlɩn ɔnɔ ɩba asɩ, bʋdɛ mɩ sia, mbʋ ɩkplantɔ, bʋdɩn mɩsʋ, ntɛ ɩwɩ dɛ mɩ ɔsɩn. Tsufɛ nɩ mɩ ɔwʋnlɩn ɔnɔ ɩba asɩ a, mʋ́ ntɛlanya ɔwʋnlɩn nɩ.

Korinto Ɔpasua Ɩwɩ Asʋn

¹¹ Nabwɛ ɩwɩ fɛ ɔha mimlahɛ, tamɛ mlɩlaha ɩlaba alɩ. Tɛkɩ ilehian ánɩ́ mlɛ́blɩ asʋn wanklaan tsu mɩ ɩwɩ. Tsufɛ ɩbʋ mʋ́tɔá mmegyi tɔtɔ, tamɛ ndʋn “sumbi ayɔpʋ akpɔnkpɔntɩ” anfɩ mʋ́.

¹² Brɛá mbʋ mlɩ wa a, notomi bwɛ tɔá ɩbʋ wanwan pʋ́ osuna mʋ́a ofula ɔtsan-ɔtsan, pʋsuna mlɩ ánɩ́ lɛlɛ sumbi ɔyɔpʋ ngyi.

¹³ Ntɔ dɛ mlɩ han? Tɔá nɔbwɛ mlɩtɔ, mmɔbwɛ ɔpasua bambatɔ gyi, mmesi ɩwɩ tswɩ mlɩsʋ. Kokoli, mlɩsikie mɩ!

¹⁴ Sei a, otse sasɩ ndɛbwɛá nɛ́ba mlɩ wa a. Mmɛ́ɛba besi ɩwɩ tswɩ mlɩsʋ, tsufɛ mmɛdɛ tɔtɔ fɩtɛ tsu mlɩ wa. Mlɩ onuto ndehian. Kebi tamatsu mʋ sɩ wa akɔnkɔ, mʋ sɩ totsu mʋ wa akɔnkɔ.

¹⁵ Ɩbʋ mɩ ɔdwɛá néyinta togyitɔá mbʋ mlɩ sʋ, si mɩ ɩwɩ fɛ́ɛ́ kʋraa ha mlɩ. Ɩnɩá ndɛ mlɩ dwɛ dʋbɩ alɩ a, ntogyi sʋ ɔdwɛá mlɩ mʋ́ mlɩbʋ ha mɩsʋ dɛdɩnkɩ?

¹⁶ Fialɩ mlɩlawun ánɩ́ lɛlɛ, mmɛba besi ɩwɩ tswɩ mlɩsʋ, tamɛ mlɩdɛblɩ mlɩaa, nofwifwi ansɩ. Ndɛpʋ atɔ tsʋn mlɩ omua wa mlɩ ɔnɔ.

¹⁷ Ɔkpa ɔmɔmʋsʋ? Nɔtsʋn aha amʋʋ nɔwa mlɩ wa amʋtɔ ɔkʋsʋ sisi mlɩ loo?

¹⁸ Brɛá nokokoli Tito, nɔwa mʋa anɩ pio Okristoyin amʋ mlɩ wa mɛ, olebesisi mlɩ? Ɛkɛkɛɛkɛ! Tsufɛ agywɩɩn kʋlɛ mɩa mʋnyɔ anɩdɛpʋbwɛ toku kʋlɛ.

¹⁹ Fialɩ mlɩdɛ mʋ́ tsu brɛ anfɩtɔ fɛ́ɛ́ mlɩaa, anɩdɛtɔɩ pʋka ɩwɩ lɛ. Megyi alɩ igyi. Akristofɔ anɩgyi, anɩdɛtɔɩ Bulu ansɩtɔ. Mɩ adwɛpʋ, anɩdɛ togyitɔ bwɛ pʋwa mlɩ ɔwʋnlɩn.

²⁰ Tsufɛ ifu dɛ mɩá nɛ́ba mlɩmetsie wanklaan. Mʋ́ sʋ mɩ asʋn blɩhɛ bɔ́wɔ mlɩ asʋtɔ. Fialɩ nɔ́bɔtʋ ɩtrɛ, ɔnsɩpɛ, ɔblɔ, olu, ahasia, aha ɩwɩ asʋnblɩ, ɩwɩtsu pʋ́ abasʋda mlɩtɔ.

²¹ Nhɩɛ ndɛ ifu nya ánɩ́ nɩ nɛba ɩnʋ a, mɩ Bulu ɔbɛ́tra ba mɩ asɩ mlɩ sʋ. Nósu, tsufɛ mlɩtɔ akʋ mlɩmɔkʋsi mlɩ lakpan dada amʋ bwɛ, damli klʋntɔ si mbʋatɔ, hakpanla pʋ́ ɔwɔlɩ lalahɛ amʋ.