2 Korintofɔ 11 - Bulu Ntam Pɔpwɛ mʋ́a Israel Ɩlʋ

Paulo Mʋa Sumbi Ayɔpʋ Afunupʋ

¹ Mlɩnya klʋn, amlɩnu mɩ mimlala kpalobi anfɩ asɩ! Kokoli, mlɩnya klʋn ha mɩ.

² Mmesi mlɩ tswɩ, fɛ alɩá Bulu tamasi mlɩ tswɩ. Tsufɛ mlɩgyi fɛ obitebiá omeyin oyin, napʋ mlɩ ha oyin ɔkʋlɛ, ogyi Kristo.

³ Tamɛ alɩ amʋʋ ɩwɔ amʋ lɔpʋ mʋ alapɛ mlɛ Hawa amʋ a, ifu dɛ mɩá ɔkʋ ɔbɛ́mlɛ mlɩ, mlɩ ansɩ bɛ́dɩnkɩ ɔnɔkwalɩwa pʋ́ ɔdwɛ wankɩhɛ amʋʋ mlɩbʋ ha Kristo amʋsʋ.

⁴ Tsufɛ nyin ánɩ́ nɩ ɔkʋ ɔba bɛda Yesu bamba ɔkʋ ɩwɩ asʋn ɔkan suna mlɩ, imegyi ɔmʋamʋʋ anɩlɛda mʋ ɩwɩ asʋn ɔkan suna mlɩ amʋ a, mlɔ́kɔsɩ hogyi. Nɩ mlenya ɔŋɛ bamba kʋá ɩna ɔtsan ha mʋamʋʋ mlɩlegyankpa nya amʋ ɛ a, mlɔ́hɔ mʋ́ gyi. Alɩ kɛn nɩ mlonu asʋn bamba ánɩ́ ɩna ɔtsan ha mʋamʋʋ anɩlɛbla mlɩ amʋ ɛ a, mlɔ́kɔsɩ hɔ mʋ́sʋ gyi nɩ!

⁵ Mmedehogyiá aha anfɩ bʋdɛ ɩwɩ tɩ “Sumbi ayɔpʋ akpɔnkpɔntɩ” anfɩ bʋdʋn mɩ ɔkpa ɔkʋkʋsʋ.

⁶ Nɩ mmeyin tɔɩ kʋraa a, nyin asʋn ánɩ́ ndɛblɩ. Nahogyiá anɩlaha asʋn anfɩtɔ ɩlawankɩ mlɩ ɔkpagyiɔkpasʋ.

⁷ Ɩnɩá nɔpʋ ɩwɩasɩba pʋ́ obú ha mlɩ brɛá nɛda Bulu asʋn wanklaan amʋ ɔkan suna mlɩ, mmɔhɔ mlɩ tɔtɔ sʋ yɛ tsitsa nɔbwɛ a?

⁸ Ɔpasua bamba atɔ nɔswɩɩ, pʋba bɔyɔ agyʋma ha mlɩ. Mʋ́ sʋ nɛtalɩ sum mlɩ, mmɔhɔ mlɩ tɔtɔ nɩ.

⁹ Brɛá mbʋ mlɩ wa, ɩwɩ lɛklɩ mɩ a, mmesi ipian tswɩ mlɩtɔ ɔkʋkʋsʋ. Mboun apio amʋʋ botsu Makedonia ba amʋ lɛha mɩ mɩ atohianhɛ. Ɩnɩ sʋ mmesi ipian dɩnka mlɩtɔ ɔkʋkʋsʋ, mméesi dɩnka ɛ.

¹⁰ Ɩnɩá ɔnɔkwalɩ nenya ndɛblɩ tsu Kristo ɩwɩ mʋ́ a, ɔhaa mɛ́ɛtalɩ ka mɩ itin ɔbɛɛ, mmápʋ asʋn anfɩ tsu ɩwɩ Akaia ɔsʋlʋsʋ fɛ́ɛ́.

¹¹ Ntogyi sʋ? Ntamadwɛ mlɩ loo? Ɛkɛkɛɛkɛ! Bulu yin ánɩ́ ntɔdwɛ mlɩ!

¹² Nɔ́bwɛ mɩ agyʋma fɛ alɩá ndɛ mʋ́ bwɛ dodo. Nɔ́bwɛ mʋ́ pʋtin amʋ́ ɔkpa, nɩ bʋdɛ ɩwɩ tsu bɛɛ, gyʋma kʋlɛ anɩa amʋ́nyɔ anɩdɛbwɛ.

¹³ Afunupʋ bʋgyi. Bapina bwɛ ɩwɩ fɛ Kristo sumbi ayɔpʋ, bʋna bʋdɛ mlɩ mlɛ.

¹⁴ Tamɛ ɩma wanwan! Tsufɛ Ɔbʋnsam kʋraa tɛkɩ ansɩ bwɛ ɩwɩ fɛ Bulu-ɔbɔpʋ wankɩhɛ!

¹⁵ Mʋ́ sʋ ɩma wanwan ánɩ́ mʋ asumpʋ anfɩ ɛ bapina bwɛ ɩwɩ fɛ yile abwɛpʋ. Amʋ́ ɔnɔmɔ ɩbɛ́lɛ amʋ́ bwɛhɛ kugyikʋ ɔwan.

Paulo Asʋn Wunhɛ

¹⁶ Ntra ndɛ mlɩ bla mbɛɛ, ɔhaa mábu mɩ ɔha mimlahɛ. Tamɛ nɩ mlɩdɛ mɩ bu alɩ o a, mlɩtsu mʋ́ alɩ, mɩ ɛ anya ɔkpa tsu ɩwɩ kpalobi.

¹⁷ Anɩ Wie tamatɔɩ alɩ, tamɛ nabwɛ ɩwɩ fɛ ɔha mimlahɛ.

¹⁸ Aha tsɔtsɔɔtsɔ bʋtotsu ɩwɩ fɛ ɔyɩtɔ aha, sʋ mɩ ɛ nótsu ɩwɩ.

¹⁹ Ee a, ɩnɩá mlɩaa atɩansɩpʋ mlɩgyi o a, mlɩtotsula ha aha mimlahɛ.

²⁰ Tsufɛ nɩ ɔkʋ ɔpʋ mlɩ bwɛ nkpábi kʋraa a, mlɩtotsula. Nɩ ɔpʋ mlɩ nya ɩwɩ, ogyi iwie mlɩsʋ, obu mlɩ tɔkʋ odu, ɔda mlɩ ɩsʋtɔ kʋraa a, mlɩtotsula ha mʋ.

²¹ Mlɩaa, mma ansɩtɔ-ɔnlɩn. Ee, natsula. Mɩ klɛ ma ɩnʋ. Tamɛ togyitɔá ɔkʋ labwɛ ɔdɛpʋtsu ɩwɩ a, mɩ ɛ nɛ́talɩ pʋ́ mɩ klɛ tsu ɩwɩ. (Tamɛ nahogyiá igyi mimlala.)

²² Nɩ bɛɛ Hebrifɔ bʋgyi a, mɩ ɛ Hebriyin ngyi. Nɩ Israelfɔ ɛ bʋgyi a, Israelyin mɩ ɛ ngyi. Nɩ bɛɛ, botsu Abraham abi-anátɔ a, ɩnʋ mɩ ɛ notsu nɩ.

²³ Bɛɛ Kristo asumpʋ bʋgyi? Mblɩ mʋ́ mimlasʋ, ndʋn amʋ́! Nayɩrɩ ɩwɩ yɔ agyʋma dʋn amʋ́. Nadɩ obu dʋn amʋ́. Bada mɩ dʋn amʋ́. Nesian wu brɛ tsɔtsɔɔtsɔtɔ.

²⁴ Yudafɔ banwɛn mɩ mplɩ tse adʋasa-kweba (39) tse nu kɛkɛ.

²⁵ Romafɔ ɛ bapɩtɩ mɩ atɔ tse sa kɛkɛ. Bɛda mɩ abwi ɔtsawʋlɛ. Tse sa kɛkɛ ntsusʋ-yibi labun mɩ, nasin ntsutso ɛkɛwʋlɛ owitɔ.

²⁶ Mɩ ɔkpa tsɔtsɔɔtsɔ tutɔ a, nafa ntsu akpɔnkpɔntɩ, natsʋn ogyo atswapʋ ɩbɩtɔ dalɩ. Natsʋn ɔmá bambasʋfɔ pʋ́ anɩ pɩ Yudafɔ fɛ́ɛ́ ɩbɩtɔ dalɩ. Natsʋn awulusʋ pʋ́ adimbisʋ, nafa ɔpʋ. Natsʋn aha amʋʋ bʋdɛ amʋ́ ɩwɩ tɩ bɛɛ, Akristofɔ amʋ aná fɛ́ɛ́ ɩbɩtɔ dalɩ.

²⁷ Nayɔ agyʋma kpekple, ɩlapian mɩ kɩ. Ntamadɩdɩ nkɛkʋ. Ntetsia akʋn mʋ́a ɔmɛwʋlɩ. Ntɛklɩ ɔnɔ, ntɛdɩ atsalɩ, natɩ yaya aná fɛ́ɛ́.

²⁸ Ɩnɩ fɛ́ɛ́ ɔma a, tɔá ɩdɩn mɩ klʋnsʋ, ntɔgywɩɩn mʋ́ ɩwɩ ekekegyiɛkɛ gyi ɔpasua amʋ fɛ́ɛ́ alɛwa.

²⁹ Ma lɔpɔn, mmotsu kʋkʋ lɛ mʋ asʋntɔ? Ma bɛkpa wa lakpantɔ, ɩmɔwa mɩ ɔblɔ.

³⁰ Nɩ bɛɛ ntsu ɩwɩ a, ntobiá ɩtɛha mɩ hogyi tɛba asɩ nɔ́pʋtsu ɩwɩ.

³¹ Bulu, ogyi anɩ Wie Yesu mʋ Sɩ, ɔlɛkana kanfʋ brɛ fɛ́ɛ́tɔ amʋ yin ánɩ́ mmɛdɛ afunu wa.

³² Owie dɛhɛn Areta lɛha mʋ ɔmásʋ ɔkɩpʋ lɛyɛtɛ mɩ Damasko wulu ɔnɔ, ɔkɩta mɩ.

³³ Tamɛ bɔpʋ mɩ wa lakpatɔ, lɛ mɩ tsʋn ikwitɔ, kplɩ mɩ yi buntiá bɔpwɛ wa wulu amʋ ɔma, nɛsrɩ si mʋ.