1 Yohane 5 - Bulu Ntam Pɔpwɛ mʋ́a Israel Ɩlʋ

Tsiatɔ Lalahɛsʋgyi

¹ Ɔhagyiɔha ánɩ́ olohogyi ɔbɛɛ, Yesu gyi Kristo, (ɔha ánɩ́ Bulu lada mʋ ofuli amʋ) a, Bulu mʋ Bi ogyi. Nɩ fʋtɔdwɛ ɔkwɩɩpʋ a, fɔ́dwɛ mʋ bi ɛ.

² Mʋ́ sʋ nɩ anɩdɛ Bulu dwɛ, anɩdɛ mʋ mblasʋ gyi a, mʋ́ abɔ́pʋbɩá anɩdɛ mʋ abi dwɛ nɩ.

³ Nɩ anɩdɛ Bulu dwɛ a, abégyi mʋ mblasʋ. Mʋ mbla amʋsʋ gyi ɛ ɩma ɔnlɩn.

⁴ Tsufɛ Bulu mʋ bi okugyiɔkʋ tɛtalɩ gyi tsiatɔ lalahɛsʋ. Anɩ hogyi anɩtɔpʋgyi mʋ́sʋ.

⁵ Ma ɔbɛ́talɩ gyi tsiatɔ lalahɛsʋ? Ɔha ánɩ́ olohogyiá Yesu gyi Bulu mʋ Bi amʋ nkʋlɛ ɔbɛ́talɩ gyi mʋ́sʋ.

Yesu Kristo Ɩwɩ Adansɩɛgyi

⁶ Yesu Kristo gyi ɔha ánɩ́ ɔlɔtsʋn ntsu mʋ́a obugyatɔ ba. Megyi ntsu nkʋlɛtɔ ɔlɔtsʋn. Ɔlɔtsʋn obugyatɔ ɛ. Ɔŋɛ Wankɩhɛ amʋ legyi asʋn anfɩ ɩwɩ adansɩɛá igyi ɔnɔkwalɩ. Ɔtamawa afunu.

⁷ Atɔ asa legyi Yesu ɩwɩ adansɩɛ.

⁸ Mʋ́gyi, Ɔŋɛ Wankɩhɛ, ntsu pʋ́ obugya. Atɔ asa anfɩ fɛ́ɛ́ lɛblɩ toku kʋlɛ.

⁹ Nɩ aha begyi adansɩɛ suna anɩ, anɩtohogyi a, mʋmʋ ilehian ánɩ́ abɔ́hɔ Bulu klɛ dʋn. Tsufɛ mʋ onuto legyi mʋ Bi amʋ ɩwɩ adansɩɛ.

¹⁰ Ɔhagyiɔha ánɩ́ ɔlɔhɔ Bulu mʋ Bi amʋ gyi lahɔ Bulu adansɩɛ anfɩsʋ gyi mʋ klʋntɔ. Alɩ kɛn ɔhagyiɔha ánɩ́ ɔmɔhɔ Bulu adansɩɛ anfɩsʋ gyi dɛ mʋ afunutɔ wa nɩ. Tsufɛ ɔmɔhɔ adansɩɛ amʋʋ Bulu legyi tsu mʋ Bi ɩwɩ amʋsʋ gyi.

¹¹ Adansɩɛ amʋ gyi, Bulu lapʋ nkpa ánɩ́ ɩtamata ha anɩ tsʋn mʋ Bi amʋsʋ.

¹² Ɔhagyiɔha ánɩ́ ɔbʋ Bulu mʋ Bi amʋ bʋ nkpa ánɩ́ ɩtamata. Alɩ kɛn ɔhagyiɔha ánɩ́ ɔma Bulu mʋ Bi amʋ má nkpa ánɩ́ ɩtamata nɩ.

Asʋn Trahɛ

¹³ Mlɩlahɔ Bulu mʋ Bi amʋ gyi. Mʋ́ sʋ ndɛ ɔwʋlʋ anfɩ wanlɩn sɩsɩ mlɩ, mɛnɩ mlɛ́bɩá mlɩbʋ nkpa ánɩ́ ɩtamata.

¹⁴ Tɔá ɩtɛha anɩtɔwa klʋn yɔ Bulu ansɩtɔ gyi, akʋlɩ mʋ togyitɔá igyi mʋ apɛ a, otonu anɩ ɔmɛ.

¹⁵ Nɩ anɩyin ánɩ́ otonu anɩ ɔmɛ a, mʋmʋ akʋlɩ mʋ togyitɔ a, anɩyin ánɩ́ ɔbɛ́ha anɩ.

¹⁶ Mʋ́ sʋ nɩ ɔkʋ owun mʋ ba Okristoyin dɛ lakpan bwɛ a, ɔbɔ mpaɩ ha mʋ. Bulu ɔbɛ́ha mʋ nkpa. Aha ánɩ́ amʋ́ lakpan mɛ́ɛkpa amʋ́ wa lowutɔ asʋn ndɛblɩ. Lakpan kʋ bʋ ɩnʋá ɩtɛkpa ɔha wa lowutɔ. Megyi ɔha ánɩ́ ɔbwɛ lakpan amʋ odu mbɛɛ, mlɩbɔ mpaɩ ha.

¹⁷ Lalahɛ kugyikʋ igyi lakpan, tamɛ lakpan kʋ bʋ ɩnʋá ɩtamakpa ɔha wa lowutɔ.

¹⁸ Anɩyin ánɩ́ ɔha ánɩ́ alabwɛ Bulu mʋ bi ɔkʋkʋ tamatsia bwɛ lakpan, tsufɛ Bulu mʋ Bi amʋ togyo mʋ ɩwɩ. Ɩnɩ sʋ Ɔbʋnsam tamatalɩ bwɛ mʋ tɔtɔ.

¹⁹ Anɩyin ánɩ́ Bulu aha anɩgyi, tamɛ Ɔbʋnsam dɛ ɔyɩtɔ aha fɛ́ɛ́sʋ gyi.

²⁰ Anɩyin ánɩ́ Bulu mʋ Bi amʋ laba. Alaha anɩlanu asʋn asɩ, mɛnɩ abɛ́bɩ Bulu Ɔnɔkwalɩpʋ amʋ. Anɩa mʋnyɔ anɩlabwɛ kʋlɛ, anɩa mʋ Bi Yesu Kristo ɛ anɩlabwɛ kʋlɛ. Lɛlɛ a, mʋ nkʋlɛ pɛ gyi Bulu Ɔnɔkwalɩpʋ pʋ́ nkpa ánɩ́ ɩtamata amʋ nɩ.

²¹ Mʋ́ sʋ mɩ abi adwɛpʋ, mlɩkɩ mlɩ ɩwɩ wanklaan ɩkpɩsumsʋ.