1 Yohane 4 - Bulu Ntam Pɔpwɛ mʋ́a Israel Ɩlʋ

Ɔŋɛ Wankɩhɛ Pʋ́ Ɔŋɛ Lalahɛ

¹ Apio adwɛpʋ, mlɩmáhɔ aha fɛ́ɛ́á bɛɛ, bʋbʋ Ɔŋɛ Wankɩhɛ amʋ asʋnsʋ gyi. Mboun mlɩsɔ ɔŋɛ amʋʋ bʋdɛpʋsuna atɔ amʋ kɩ. Tsufɛ Bulu ɔnɔsʋ atɔɩpʋ afunupʋ tsɔtsɔɔtsɔ babʋla ɔyɩ anfɩtɔ.

² Ɩnɩ apʋbɩá ɔŋɛ amʋ itsu Bulu wa nɩ. Nɩ ɔkʋ dɛ atɔ suna, ɔlɛblɩ ɔbɛɛ, Yesu Kristo lɛlɩn fɛ nyankpʋsa a, mʋmʋ mʋ atosunahɛ amʋ itsu Bulu wa.

³ Tamɛ nɩ ɔkʋ lɛblɩ ɔbɛɛ, Yesu mɛlɩn fɛ nyankpʋsa a, mʋmʋ Ɔŋɛ Wankɩhɛ amʋ má mʋtɔ. Kristo olupʋ ɔŋɛ amʋʋ mlɩlonuá bɛɛ, ɩbɛ́ba amʋ nɩ. Ɩlaba ɔyɩtɔ dodo.

⁴ Mɩ abi adwɛpʋ, Bulu aha mlɩgyi. Mlɩlagyi Bulu ɔnɔsʋ atɔɩpʋ afunupʋ amʋsʋ. Tsufɛ Ɔŋɛ amʋʋ ɩbʋ mlɩtɔ amʋ bʋ ɔnlɩn dʋn mʋamʋʋ ɩdɛ ɔyɩ anfɩtɔ ahasʋ gyi amʋ.

⁵ Yesu alupʋ amʋ bʋmeyin Bulu. Ɩnɩ sʋ amʋ́ atosunahɛ fɛ́ɛ́ igyi aha ánɩ́ bʋmeyin Bulu atosunahɛ. Mʋ́ sʋ aha ánɩ́ bʋmeyin Bulu tɔhɔ amʋ́ asʋnsʋ gyi.

⁶ Anɩ mʋ́ a, Bulu aha anɩgyi. Mʋ́ sʋ ɔhagyiɔha ánɩ́ oyin Bulu tɔhɔ anɩ asʋnsʋ gyi. Tamɛ ɔha ánɩ́ omeyin Bulu tamahɔ anɩ asʋn. Ɩnɩ anɩtɔpʋbɩ ɔnɔkwalɩ Ɔŋɛ amʋ pʋ́ afunu klɛ nɩ.

Bulu Gyi Ɔdwɛ

⁷ Mɩ adwɛpʋ, mlɩha adwɛ aba, tsufɛ ɔdwɛ itsu Bulu wa. Ɔhagyiɔha ánɩ́ ɔtɔdwɛ aha a, Bulu mʋ bi ogyi, oyin Bulu.

⁸ Ɔhagyiɔha ánɩ́ ɔtamadwɛ aha meyin Bulu, tsufɛ Bulu gyi ɔdwɛ.

⁹ Alɩá Bulu lɛlɛ mʋ ɔdwɛ suna anɩ gyi, ɔlɔpʋ mʋ Bi ɔkʋkʋnʋ ɔkʋlɛ amʋ sɩsɩ ɔyɩtɔ, mɛnɩ abɔ́tsʋn mʋsʋ nya nkpa ánɩ́ ɩtamata.

¹⁰ Megyi alɩá anɩtɔdwɛ Bulu gyi Bulu-dwɛ ɔnɔkwalɩsʋ. Mboun alɩá ɔlɔdwɛ anɩ, pʋ mʋ Bi sɩsɩ anɩá ɔbɔpʋ mʋ obugya lɛ anɩ ɩwɩ mbusuo gyi ɔdwɛ.

¹¹ Apio adwɛpʋ, ɩnɩá Bulu lɛhɩɛ dwɛ anɩ alɩ sʋ a, ilehian ánɩ́ anɩ ɛ abɔ́dwɛ aba.

¹² Ɔhaa mɔkʋhɩɛ wun Bulu kɩ. Nɩ anɩdɛ aba dwɛ a, idesuna ánɩ́ Bulu bʋ anɩ klʋntɔ. Mʋ́ sʋ mʋ ɔdwɛ lɔfʋn anɩtɔ.

¹³ Bulu lapʋ Ɔŋɛ Wankɩhɛ amʋ ha anɩ. Mʋ́ sʋ anɩlabɩá anɩa mʋnyɔ anɩlabwɛ kʋlɛ, ɔbʋ anɩ klʋntɔ.

¹⁴ Anɩlawun mʋ́ alɩ. Mʋ́ sʋ anɩdɛ adansɩɛ gyi anɩaa, anɩ Sɩ Bulu lɔwa mʋ Bi Yesu Kristo ɔbɛɛ, ɔbɛ́lɛ anyankpʋsa fɛ́ɛ́ tsu amʋ́ lakpantɔ.

¹⁵ Ɔhagyiɔha ánɩ́ olohogyi, ɔlɛblɩ ɔbɛɛ Yesu gyi Bulu mʋ Bi amʋ a, Bulu bʋ mʋtɔ, mʋ ɛ ɔbʋ Bulutɔ.

¹⁶ Mʋ́ sʋ anɩyin ɔdwɛá Bulu bʋ ha anɩ, anɩlɔhɔ mʋ́sʋ gyi. Bulu gyi ɔdwɛ. Mʋ́ sʋ nɩ ɔkʋ tɔdwɛ Bulu pʋ́ mʋ aba a, ɔbʋ Bulutɔ, Bulu ɛ bʋ mʋtɔ.

¹⁷ Ɩnɩ desuna ánɩ́ Bulu ɔdwɛ lɔfʋn anɩtɔ nɩ. Mʋ́ sʋ anɩméenya pɛlɩ mʋ asʋn ogyikɛ, tsufɛ anɩlatsia nkpa ɔyɩ anfɩtɔ fɛ Yesu.

¹⁸ Ɔha ánɩ́ Bulu ɔdwɛ bʋ mʋtɔ tamanya ifu. Mʋ́ sʋ nɩ anɩdɛ Bulu pʋ́ anɩ aba dwɛ a, anɩméenya Bulu ifu. Tsufɛ aha ánɩ́ bʋyin ánɩ́ Bulu ɔbɛ́bɩtɩ amʋ́ ɩsʋ tenya ifu. Ɩnɩ sʋ nɩ ɔkʋ dɛ Bulu ifu nya a, ilosuna ánɩ́ Bulu ɔdwɛ mɔfʋn mʋtɔ.

¹⁹ Anɩtɔdwɛ Bulu pʋ́ anɩ aba, tsufɛ Bulu legyankpa dwɛ anɩ.

²⁰ Nɩ ɔkʋ lɛblɩ ɔbɛɛ “Ntɔdwɛ Bulu,” tamɛ otolu mʋ ba a, ofunupʋ ogyi. Tsufɛ ɔha ánɩ́ otolu mʋ ba ánɩ́ otowun, mɛ́ɛtalɩ dwɛ Buluá ɔmɔkʋwun kɩ.

²¹ Mbla ánɩ́ Yesu Kristo lɔwa ha anɩ gyi, “Ɔha ánɩ́ ɔtɔdwɛ Bulu ɔdwɛ mʋ ba ɛ.”