1 Yohane 3 - Bulu Ntam Pɔpwɛ mʋ́a Israel Ɩlʋ

Bulu Abi

¹ Mlɩkɩ alɩá anɩ Sɩ Bulu tɛhɩɛ dwɛ anɩ, sʋ bʋtɛtɩ anɩ mʋ abi. Lɛlɛ a, mʋ abi anɩgyi. Tamɛ tɔá sʋá ɔyɩ anfɩtɔ aha bʋmeyin anɩ gyi, bʋmeyin anɩ Sɩ Bulu.

² Mɩ apio adwɛpʋ, sei a, Bulu aha anɩgyi. Alɩá abébemli wʋlɛ ɔmɔkʋnya lɛ suna anɩ. Tamɛ anɩyin ánɩ́ Kristo ɔba a, abɛ́lɩan mʋ, tsufɛ abówun alɩá ogyi.

³ Ɔhagyiɔha ánɩ́ ɔdɩn ansɩá mɛlɩan mʋ tɛha mʋ ɩwɩ tɛtɩn, fɛ alɩá mʋ ɩwɩ lɛtɩn.

⁴ Ɔhagyiɔha ánɩ́ ɔtɔbwɛ lakpan a, ɔdɛkʋsʋ lɩɩ Bulu mblasʋ. Tsufɛ lakpan gyi Bulu mblasʋmágyi.

⁵ Mlɩyin ánɩ́ Kristo lɛba ɔyɩtɔ bɛlɛ anɩ tsu anɩ lakpantɔ, tamɛ mʋ mʋ́ ɔmɔbwɛ lakpan kʋkʋ.

⁶ Ɩnɩ sʋ ɔha ánɩ́ mʋa Kristo bʋdɛ mbagyi tamatra bwɛ lakpan. Mʋ́ sʋ ɔhagyiɔha ánɩ́ ɔtra ɔdɛ lakpan bwɛ mɔkʋwun Kristo, ɔmɔkʋbɩ mʋ ɛ.

⁷ Mɩ abi adwɛpʋ, mlɩmáha ɔhaa ɔmlɛ mlɩ. Ɔhagyiɔha ánɩ́ ɔtɔbwɛ yile a, mʋ asʋn da ɔkpa Bulu ansɩtɔ fɛ Yesu.

⁸ Tamɛ Ɔbʋnsam mʋ bi ɔha ánɩ́ ɔtra ɔdɛ lakpan bwɛ gyi. Tsufɛ Ɔbʋnsam dɛ lakpan bwɛ tsu brɛá ɔyɩ lefi asɩ ɔpá. Bulu mʋ Bi Yesu Kristo lɛba ɔyɩtɔ beyinta Ɔbʋnsam gyumagyihɛ kugyikʋ.

⁹ Aha ánɩ́ babwɛ Bulu aha bʋtamatra bwɛ lakpan, tsufɛ Bulu tsiatɔ bʋ amʋ́tɔ. Mʋ́ sʋ bʋmɛ́ɛtalɩ tra bwɛ lakpan.

¹⁰ Tɔá abɔ́pʋbɩ Bulu-abi pʋ́ Ɔbʋnsam-abi gyi, ɔhagyiɔha ánɩ́ ɔtamabwɛ yile, ntɛ dwɛ mʋ ba megyi Bulu mʋ bi.

Abadwɛ

¹¹ Asʋn ánɩ́ mlɩlonu tsu brɛá mlɩlemli Akristofɔ gyi, adwɛ aba.

¹² Mlɩmábwɛ mlɩ ɩwɩ fɛ Kain. Ɔlɔbwɛ Ɔbʋnsam mʋ bi, mɔ mʋ gyama. Ntɔ lɛha sʋ ɔlɔmɔ mʋ? Ɔlɔbwɛ ɩtɔ lalahɛ, mʋ gyama mʋ́ lɔbwɛ ɩtɔ wanklaan sʋ ɔlɔmɔ mʋ.

¹³ Mɩ apio Akristofɔ, ɩmáwa mlɩ wanwan nɩ ɔyɩ anfɩtɔ aha bʋtolu mlɩ.

¹⁴ Anɩ mʋ́ anɩyin ánɩ́ anɩladalɩ lowu asɩ yɔ nkpa ánɩ́ ɩtamatatɔ, tsufɛ anɩdɛ anɩ aba dwɛ. Ɔha ánɩ́ ɔtamadwɛ mʋ aba lasin lowutɔ.

¹⁵ Ɔha ánɩ́ otolu mʋ ba gyi aha ɔmɔpʋ. Mlɩyin ánɩ́ aha ɔmɔpʋ ɔkʋkʋ má nkpa ánɩ́ ɩtamata.

¹⁶ Alɩ amʋʋ Kristo lotsula wu ha anɩ amʋ ɩlasuna anɩ alɩá ɔdwɛ gyi. Mʋ́ sʋ ilehian ánɩ́ anɩ ɛ abówu ha anɩ aba alɩ kɛn.

¹⁷ Nɩ ɔkʋ bʋ atɔ, alawun ánɩ́ ɩkʋ dɛ mʋ ba hian, tamɛ omowun mʋ nwɛ ha mʋ a, mʋmʋ ɔmɛ́ɛtalɩ blɩ ɔbɛɛ, mʋtɔdwɛ Bulu.

¹⁸ Mɩ abi adwɛpʋ, nɩ igyi alɩ a, mlɩmápʋ ɔnɔkpan dwɛ aba. Mboun mlɩha apʋ anɩ bwɛhɛ pʋ́ ɔnɔkwalɩ dwɛ aba.

Ɩklʋnwa Bulu Ansɩtɔ

¹⁹ Nɩ anɩtɔdwɛ aba alɩ a, mʋ́ abɛ́bɩá anɩbuo ɔnɔkwalɩ amʋ nɩ. Mʋ́ sʋ nɩ anɩlɩɩ Bulu ansɩtɔ a, tɔtɔ mɛ́ɛhan anɩ.

²⁰ Nɩ anɩ klʋn ɩha anɩ pɔn kʋraa a, Bulu yin asʋn dʋn anɩ klʋn, oyin anɩ bwɛhɛ kugyikʋ.

²¹ Apio adwɛpʋ, nɩ anɩ klʋn mɛha anɩ pɔn brɛá anɩlɩɩ mʋ ansɩtɔ a, ifu mɛ́ɛkɩta anɩ.

²² Bulu ɔbɛ́ha anɩ tɔá anɩdɛ mʋ kʋlɩ, tsufɛ anɩdɛ mʋ mblasʋ gyi, anɩ tsiatɔ ɛ legyi mʋ ansɩ.

²³ Mbla ánɩ́ Bulu lɔwa ha anɩ gyi, ahɔ mʋ Bi Yesu Kristo gyi, adwɛ aba fɛ alɩá Yesu lɛbla anɩ.

²⁴ Ɔha ánɩ́ ɔdɛ Bulu mblasʋ gyi mʋa Bulu babwɛ kʋlɛ. Bulu bʋ mʋ klʋntɔ. Tɔá itosuna anɩá ɔbʋ anɩ klʋntɔ gyi Ɔŋɛ Wankɩhɛ amʋʋ ɔlɔpʋha anɩ amʋ.