1 Yohane 2 - Bulu Ntam Pɔpwɛ mʋ́a Israel Ɩlʋ

Anɩ Bʋalɛ Ogyipʋ

¹ Mɩ abi adwɛpʋ, ndɛ asʋn anfɩ wanlɩn sɩsɩ mlɩ, mɛnɩ mlɩmɛ́ɛtra bwɛ lakpan. Tamɛ nɩ mlɩtɔ ɔkʋ ɔbwɛ lakpan a, anɩbʋ ɔha ánɩ́ otokokoli anɩ Sɩ amʋ ha anɩ. Mʋgyi yile ɔbwɛpʋ Yesu Kristo.

² Tsufɛ mʋlowu, pʋ mʋ obugya lɛ anɩ nwunsʋ mbusuo. Megyi anɩ nkʋlɛ pɛ lakpan, tamɛ ɔyɩtɔ aha fɛ́ɛ́ klɛ.

³ Nɩ anɩdɛ Bulu mblasʋ gyi a, mʋ́ ɔbɛ́ha abɛ́bɩá anɩlabɩ mʋ nɩ.

⁴ Nɩ ɔkʋ ɔblɩ ɔbɛɛ, “Nyin Bulu,” tamɛ ɔtamagyi mʋ mblasʋ a, ofunupʋ ogyi. Ɔma ɔnɔkwalɩ.

^5-6 Tamɛ nɩ ɔkʋ tegyi Bulu mblasʋ a, idesuna ánɩ́ mʋ Bulu-dwɛ lɔfʋn. Tɔá ɩbɛ́ha abɛ́bɩá ɩkʋlɛbwɛ bʋ anɩa Bulu nsɩnɛ gyi, anɩtsie nkpa fɛ Yesu Kristo.

Mbla Pɔpwɛ Amʋ

⁷ Apio adwɛpʋ, megyi mbla pɔpwɛ kʋkʋ ndɛwanlɩn sɩsɩ mlɩ. Mbla dada amʋʋ mlɩyin tsu brɛ amʋʋ mlɩlɔtsɔ hogyi amʋ nɩ. Mbla dada anfɩ igyi asʋn ánɩ́ mlɩlanu dodo.

⁸ Tamɛ mbla pɔpwɛ igyi. Tsufɛ Kristo tsiatɔ pʋ́ mlɩ klɛ lalɛ mʋ́ suna ánɩ́ mbla pɔpwɛ igyi. Oklun amʋ ɩdɛtsʋn. Wankɩ amʋ onuto ɩdɛwankɩ dodo.

⁹ Mʋ́ sʋ ɔha ánɩ́ ɔbɛɛ, ɔna wankɩ amʋtɔ, tamɛ ɔdɛ mʋ ba Okristoyin lu a, idesuna ánɩ́ ɔtra ɔbʋ okluntɔ.

¹⁰ Ɔha ánɩ́ ɔtɔdwɛ mʋ ba Okristoyin na wankɩ amʋtɔ. Mʋ́ sʋ tɔtɔɔtɔ ɩmɛ́ɛha mʋ ɔbwɛ lakpan.

¹¹ Tamɛ ɔha ánɩ́ otolu mʋ ba Okristoyin mʋ́ tsie okluntɔ. Ɔna okluntɔ, sʋ omeyin ɔtɩnɛá ɔyɔ; tsufɛ oklun amʋ ɩlatin mʋ ansɩ.

¹² Mɩ abi adwɛpʋ, ndɛ ɔwʋlʋ anfɩ wanlɩn sɩsɩ mlɩ, tsufɛ Yesu Kristo sʋ Bulu lasi mlɩ lakpan kie mlɩ.

¹³ Mɩ asɩ, ndɛ ɔwʋlʋ anfɩ wanlɩn sɩsɩ mlɩ, tsufɛ mlɩlabɩ ɔha amʋʋ ɔbʋ ɩnʋ tsu ɔyɩ nfiasɩ amʋ. Nyasubi, ndɛ ɔwʋlʋ anfɩ wanlɩn sɩsɩ mlɩ, tsufɛ mlɩlagyi Ɔbʋnsamsʋ.

¹⁴ Mɩ abi adwɛpʋ, ndɛ ɔwʋlʋ anfɩ wanlɩn sɩsɩ mlɩ, tsufɛ mlɩlabɩ Ɔsɩ amʋ. Mɩ asɩ, ndɛ ɔwʋlʋ anfɩ wanlɩn sɩsɩ mlɩ, tsufɛ mlɩlabɩ ɔha amʋʋ ɔbʋ ɩnʋ asa Bulu lɔbwɛ ɔyɩ amʋ. Nyasubi, ndɛ ɔwʋlʋ anfɩ wanlɩn sɩsɩ mlɩ, tsufɛ mlɩ hogyi ɔnɔ bʋ ɔnlɩn, Bulu asʋn bʋ mlɩtɔ. Mlɩlagyi Ɔbʋnsamsʋ.

¹⁵ Mʋ́ sʋ ndɛ mlɩ fɛ́ɛ́ bla mbɛɛ, mlɩmápʋ mlɩ klʋn dɩnka ɔyɩ pʋ́ mʋ́tɔ atɔsʋ. Nɩ ɔkʋ dɛ ɔyɩ anfɩ dwɛ a, ɔmɛ́ɛtalɩ tra dwɛ anɩ Sɩ Bulu ɛ.

¹⁶ Ɔyɩtɔ atɔ amʋ ɩkʋ gyi, atɔ lalahɛá ɩtɛdɩnka ɔha ɔwɔlɩ; atɔá ɔha towun, ɩtɛdɩnka mʋ ɔwɔlɩ pʋ́ ntobiá ɔha tɔpʋtsu ɩwɩ. Ɩnɩ anfɩ odu kʋkʋʋkʋ imotsu anɩ Sɩ Bulu wa. Ɔyɩ anfɩtɔ itsu.

¹⁷ Ɔyɩ anfɩ pʋ mʋ́tɔ atɔá ɩtɛdɩnka ɔha ɔwɔlɩ fɛ́ɛ́ dɛtsʋn. Tamɛ ɔha ánɩ́ ɔtɔbwɛ tɔá Bulu tekle obétsia nkpa ánɩ́ ɩtamata.

Kristo Alupʋ

¹⁸ Mɩ abi adwɛpʋ, brɛ trahɛ nɩ. Mlɩkaɩn ánɩ́ bɛbla mlɩ bɛɛ, Kristo olupʋ amʋ ɔbɛ́ba. Sei anfɩ a, Kristo alupʋ tsɔtsɔɔtsɔ baba. Ɩnɩ desuna ánɩ́ lɛlɛ brɛ trahɛ nɩ.

¹⁹ Kristo alupʋ anfɩ betsia anɩtɔ asa bɛdalɩ. Nɩ lɛlɛ anɩ klɛ bʋgyi a, tɛkɩ besi tsia anɩtɔ. Amʋ́ anɩtɔdalɩ losuna ánɩ́ bʋmegyi anɩ apio Kristotɔ. Mʋ́ sʋ bɛdalɩ anɩtɔ nɩ.

²⁰ Tamɛ mlɩ mʋ́ a, Kristo lapʋ mʋ Ɔŋɛ Wankɩhɛ amʋ wa mlɩtɔ. Mʋ́ sʋ mlɩ fɛ́ɛ́ mlɩlabɩ ɔnɔkwalɩ amʋ.

²¹ Megyi bɛɛ, mlɩmeyin ɔnɔkwalɩ amʋ, sʋ ndɛ asʋn anfɩ wanlɩn sɩsɩ mlɩ. Mboun alɩá mlɩyin ɔnɔkwalɩ amʋ, pʋ́ alɩ amʋʋ mlɩyin wanklaan ánɩ́ ɔtɩnɛá ɔnɔkwalɩ amʋ bʋ a, afunu kʋkʋʋkʋ ma ɩnʋ amʋ sʋ.

²² Ma gyi ofunupʋ kpɔnkpɔntɩ anfɩ? Mʋgyi ɔha ánɩ́ olekina ɔbɛɛ, “Megyi Yesu gyi Kristo, (ɔha amʋʋ Bulu lada mʋ ofuli amʋ).” Idesuna ánɩ́ alakina Ɔsɩ Bulu mʋa mʋ Bi Yesu Kristo amʋ. Mʋ́ sʋ mʋgyi Kristo olupʋ amʋ nɩ.

²³ Tsufɛ ɔha ánɩ́ okina Bulu mʋ Bi amʋ lakina mʋ Sɩ Bulu ɛ nɩ. Tamɛ ɔha ánɩ́ ɔlɔhɔ mʋ Bi amʋ lahɔ mʋ Sɩ amʋ ɛ.

²⁴ Mʋ́ sʋ mlɩha asʋn amʋʋ mlɩlonu tsu brɛ amʋʋ mlɩlɔtsɔ hogyi amʋ isin mlɩtɔ. Tsufɛ nɩ isin mlɩtɔ a, mʋmʋ ɩkʋlɛbwɛ bétsia mlɩa Yesu pʋ́ Ɔsɩ Bulu nsɩnɛ.

²⁵ Ɩnɩgyi tɔá Kristo lɛhɩɛ ɔbɛɛ, mɛ́ha anɩ, igyi nkpa ánɩ́ ɩtamata amʋ nɩ.

²⁶ Aha amʋʋ bʋdekleá bɛ́mlɛ mlɩ amʋ, sʋ ndɛ asʋn anfɩ wanlɩn sɩsɩ mlɩ.

²⁷ Mlɩ mʋ́ a, Ɔŋɛ Wankɩhɛ amʋʋ Kristo lɔpʋwa mlɩtɔ amʋ bʋ mlɩtɔ. Mʋ́ sʋ imehian ánɩ́ ɔhaa ɔbɛ́tra suna mlɩ atɔ. Tsufɛ Ɔŋɛ Wankɩhɛ amʋ tosuna mlɩ togyitɔ. Mʋ atosunahɛ ɛ igyi ɔnɔkwalɩ onuto. Ɩnɩ sʋ mlɩkɩta tɔá olosuna mlɩtɔ, amlɩtsia Kristotɔ.

²⁸ Ɩnɩ sʋ mɩ abi adwɛpʋ, mlɩtsia Kristotɔ. Fówun nɩ ɔba a, pɛlɩ mɛ́ɛkɩta anɩ, abɛ́talɩ fia mʋ.

²⁹ Nɩ mlɩyin ánɩ́ yile ɔbwɛpʋ Yesu gyi a, mʋmʋ mlɩbɩá yile ɔbwɛpʋ Bulu mʋ bi okugyiɔkʋ gyi.