1 Timoteo 6 - Bulu Ntam Pɔpwɛ mʋ́a Israel Ɩlʋ

¹ Ilehian ánɩ́ nkpábiá bʋbʋ ɔpasua amʋtɔ bɛ́hɩɛ bu amʋ́ awie, mɛnɩ ɔhaa mɔ́ɔkpɔɩ Bulu mʋa anɩ atosunahɛ amʋ.

² Ilehian ánɩ́ amʋ́á amʋ́ awie bʋbʋ ɔpasua amʋtɔ bóbu amʋ́ awie amʋ dʋn. Sei kʋraa ilehian ánɩ́ bóbu amʋ́ dʋn nɩ. Tsufɛ ahogyipʋ bʋgyi, bʋtɔdwɛ amʋ́ ɛ. Ɩnɩ aná gyi tɔá fʋsuna amʋ́, afʋwa amʋ́ atɛtɔ-ɔnlɩn abʋbwɛ nɩ.

Afunu Atosunahɛ Pʋ́ Atonyahɛ Onuto

³ Nɩ ɔkʋ losuna atɔ lalahɛ kʋ, mʋ́a anɩ Wie Yesu Kristo asʋn blɩhɛ pʋ́ Bulusum atosunahɛ amʋ ɩmɛna a,

⁴ idesuna ánɩ́ ɔha amʋ dɛ ɩwɩ tsu. Omeyin tɔtɔ, nwɛnkpangyi labʋla mʋtɔ. Mʋ́á ɩtɛdalɩ tsu mʋ́tɔ gyi ɔnsɩpɛ, ɩtrɛ, isia pʋ́ agywɩɩn lalahɛ.

⁵ Asʋn ánɩ́ imedehian ɩwɩ nwɛn aha anfɩ odu bʋtɛnatɩ gyi. Amʋ́ agywɩɩn lawu, bʋtamablɩ ɔnɔkwalɩ. Amʋ́ odu bʋtosusuá Bulusum igyi ɔkpa kʋá fɔ́tsʋn mʋ́sʋ nya ɩwɩ.

⁶ Labi kpɔnkpɔntɩ bʋ Bulusumtɔ nɩ tɔá anɩbʋ yaɩ legyi anɩ ansɩ.

⁷ Tsufɛ anɩmɔpʋ tɔtɔ ba ɔyɩtɔ, anɩmɛ́ɛtalɩ pʋ tɔtɔɔtɔ ɛ natɩ.

⁸ Mʋ́ sʋ nɩ anɩbʋ atogyihɛ pʋ́ atɔ dɩdahɛ a, mlɩha mʋ́ kpan igyi anɩ ansɩ.

⁹ Aha ánɩ́ bʋtekleá bʋnya atɔ a, ɩbwɛbwɛbwɛ bʋtɛkpa wie ɩsɔkɩ pʋ́ ayibitɔ. Amʋ́ mimlala tɛkpa amʋ́ yowie ɩwɩɔsɩn mʋ́a lalahɛtɔ, hɩ amʋ́.

¹⁰ Tsufɛ kɔbadwɛ tɔpʋ lalahɛ kugyikʋ ba. Mʋ́ ɔma akʋ bagya alɩɩ, bafwɩ dalɩ hogyi amʋtɔ, ɩlaha amʋ́ bʋdɛ awɩrɛhɔ tsɔtsɔɔtsɔ gyi nɩ.

Paulo Asʋn Trahɛ

¹¹ Timoteo, fʋ mʋ́ a, Bulu ɔha fʋgyi. Mʋ́ sʋ ha ɩnɩ aná ɩwa ɩfɔ fʋ wa. Hɩɛ fʋ ɩwɩ, afʋbwɛ tɔá ɩda ɔkpa. Bɔ mbɔdɩ afʋha yilebwɛ, Bulusum, hogyi, ɔdwɛ, klʋnya pʋ́ ɩwɩasɩba itsia fʋtɔ.

¹² Kɔ hogyi ɩkɔ wanklaan amʋ. Fʋ ɩbɩ bɛ́da nkpa amʋʋ ɩtamata, Bulu obékie anɩ mʋ́ ɔma amʋ. Nkpa anfɩ sʋ Bulu lɛtɩ fʋ nɩ. Mʋ́ sʋ fobwii ɔnɔ aha tsɔtsɔɔtsɔ ansɩtɔ, gyi fʋ hogyi ɩwɩ adansɩɛ nɩ.

¹³ Nlɩɩ Bulu, ogyi togyitɔ nkpa Ɔhapʋ mʋa Kristo Yesuá olegyi ɩwɩ adansɩɛ wanklaan Pontio Pilato ansɩtɔ. Ndɛ fʋ hɩɛ

¹⁴ mbɛɛ, fʋkɩta mbla anfɩ fɛ́ɛ́tɔ wanklaan. Mási mʋ́tɔ kpɛfʋn ɛkɛá anɩ Wie Yesu Kristo ɔbɛ́lɛ ɩwɩ ɔwan.

¹⁵ Bulu ɔkʋkʋnʋ ɔkʋlɛ amʋ ilehian ánɩ́ abɛ́kanfʋ. Mʋ nkʋlɛ pɛ gyi Otumipʋ, awie fɛ́ɛ́tɔ Owie. Mʋ ɔbɛ́lɛ Kristo suna brɛ wanklaan amʋʋ mʋ onuto ɔlɛhɩɛ yaɩ amʋtɔ.

¹⁶ Mʋ nkʋlɛ pɛ tamawu, otsie ɔwankɩkpa ánɩ́ ɔhaa tamatalɩ kpʋkpɛ manta mʋ. Ɔhaa mɔkʋwun mʋ kɩ, ɔhaa móowun mʋ ɛ ɛkɛkɛɛkɛ. Mʋ klɛ gyi obu mʋ́a tumi brɛ fɛ́ɛ́! Amen!

¹⁷ Bla ɔyɩ anfɩtɔ ɩwɩ anyapʋ fɛɛ, bʋmátsu ɩwɩ. Bʋmápʋ ansɩ dɩnka kɔba anfɩ iméetsia yɔ anfɩsʋ. Mboun bʋpʋ ansɩ dɩnka Bulusʋ. Mʋtɛha anɩ togyitɔá abɔ́pʋnya ansigyi ɔyɩ anfɩtɔ.

¹⁸ Bla amʋ́ fɛɛ, bʋpʋ amʋ́ kɔba bwɛ yile, amʋ́ yilebwɛ imoni. Bʋsankɩ ɩbɩtɔ abʋkie atɔ.

¹⁹ Nɩ bʋdɛ ɩnɩ bwɛ a, bʋdɛ atonyahɛ yaɩ ha brɛ amʋʋ ɩba amʋ. Amʋ́ ɩbɩ bɛ́da nkpa onuto amʋ.

²⁰ Timoteo, kɩta ɩtɔ amʋʋ Bulu laha fʋ amʋ wanklaan. Asʋn ánɩ́ ɩma asɩ, imosuna Bulusum mádalɩ fʋ ɔnɔ. Máwa ɩwɩ mimla nwɛngyiá ɩtamasuna Bulusumtɔ. Akʋ bʋtɔwa afunu bɛɛ, asʋnbɩ igyi.

²¹ Tsufɛ akʋ batsʋn mʋ́sʋ si Kristo hogyi. Bulu ogyi mlɩ bʋalɛ.