1 Timoteo 5 - Bulu Ntam Pɔpwɛ mʋ́a Israel Ɩlʋ

Tɔá Abɔ́bwɛ Ha Ahogyipʋ

¹ Mákplʋn wa oyin dɛhɛn. Mboun tɔɩ bla mʋ asʋn fɛ fʋ sɩ. Kɩta nyasubi amʋ fɛ alɩá fɛ́kɩta fʋ apio yinhɛ.

² Kɩta atsɩ dɛhɛn amʋ fɛ fʋ yin, afʋkɩta mbitebi amʋ ɛ fɛ fʋ apio tsɩhɛ. Máwa amʋ́ mba.

³ Ɔpasua amʋ bʋkɩ asʋrapʋá bʋhɩɛ bʋma ɔbʋapʋsʋ.

⁴ Tamɛ nɩ ɔsʋrapʋ ɔkʋ bʋ abi ntɛ aná a, ha amʋ́ abʋbɩ tɔá ilehian ánɩ́ bégyankpa bwɛ ha amʋ́ akwɩɩpʋ ntɛ amʋ́ aná Bulusum ɔkpasʋ, pʋka amʋ́ akɔ. Mʋ́gyi amʋ́sʋ kɩ, tsufɛ mʋ́tegyi Bulu ansɩ nɩ.

⁵ Ɔsʋrapʋá ɔhɩɛ ɔma ɔhaa tɔpʋ ansɩ dɩnka Bulusʋ, tsia bɔ mpaɩ ɔpa onye, kʋlɩ Bulu tɔá ɩdɛ mʋ hian.

⁶ Ɔsʋrapʋá mʋ klɛ gyi nkpagyi kotoo mʋ́ lawu asa ɔna ɔyɩtɔ.

⁷ Bla ɔpasua amʋ asʋn anfɩ, mɛnɩ ɔhaa mɛ́ɛblɩ ɔsʋrapʋ ɔkʋkʋ ɩwɩ asʋn lalahɛ.

⁸ Nɩ ɔkʋ mɛkɩ mʋ abusuanfɔsʋ, titriu mʋ woyitɔ ahasʋ a, mʋmʋ aladamli ɔma ha hogyi amʋ. Ɩnɩ sʋ mʋ lakpan dʋn ɔha ánɩ́ ɔmɔhɔ Bulu gyi.

⁹ Ɔsʋrapʋ oduá mʋ ɩda bétsia asʋrapʋ ada ɔwʋlʋtɔ gyi, ɔsʋrapʋá alahɔ tsu nfi aduesie pʋya, ɔlɔwa ɔnɔkwalɩ ha mʋ klu.

¹⁰ Ɔbwɛ ɔha ánɩ́ aha bʋyin ánɩ́ ɔlɔbwɛ yile, fɛ abisʋkɩ, afɔɔhɔ, olosum Bulu aha, ɔtɔbʋa aha ánɩ́ bʋdɛ ɩwɩɔsɩn wun, ɔlɔbwɛ agyʋma wanklaan kugyikʋ.

¹¹ Máwanlɩn asʋrapʋá bʋmɔkʋdan ada wa ɔwʋlʋ amʋtɔ, tsufɛ nɩ amʋ́ ɔwɔlɩ ɩha amʋ́ bɔbwɛ agywɩɩn ánɩ́ bɛlatsia aklu a, bʋmɛ́ɛtra talɩ sum Kristo ɔnɔkwalɩsʋ.

¹² Ɩnɩ ɩbɛ́ha bégyi pɔn, tsufɛ batʋn amʋ́ ntam ánɩ́ bɛka ha Bulu.

¹³ Ɔma a, bʋtɛbɩ ɔwʋlɩyɔ wa, yinta brɛ natɩ ki aha woyitɔ. Megyi ɔwʋlɩyɔ wʋlɛ, bʋtemli aha ɩwɩ asʋn ablɩpʋ, natɩ wa ɔnɔ aha asʋntɔ, blɩ asʋn ánɩ́ imehian ánɩ́ bɛ́blɩ.

¹⁴ Ɩnɩ sʋ ndekleá asʋrapʋ amʋʋ bʋmɔkʋdan amʋ bʋwuna tsia aklu kwɩɩ abi, abʋkɩ amʋ́ woyisʋ, mɛnɩ bʋmɛ́ɛha anɩ alupʋ ɔkpa abʋblɩ anɩ ɩwɩ asʋn lalahɛ kʋkʋ.

¹⁵ Ndɛ asʋn anfɩ blɩ, tsufɛ asʋrapʋ akʋ badamli yɔ bʋbuo Ɔbʋnsam dodo.

¹⁶ Nɩ Okristoyintse ɔkʋ bʋ asʋrapʋ mʋ abusuantɔ a, ɔkɩ amʋ́sʋ. Ɔmási amʋ́ tswɩ ɔpasua amʋsʋ, mɛnɩ ɔpasua amʋ bénya ɔkpa kɩ amʋ́á bʋma ɔhaasʋ.

¹⁷ Ilehian ánɩ́ ɔpasua amʋ bɛ́ka ɔpasua ahandɛá bʋdɛ amʋ́ kpa akɔ wanklaan, wa amʋ́ numnyam. Titriu amʋ́á bʋtɔbɔ mbɔdɩ Bulu asʋn amʋ ɔkanda pʋ́ mʋ́ suna ɩwɩ.

¹⁸ Tsufɛ Bulu asʋn wanlɩnhɛ amʋ ɩlɛblɩ ɔbɛɛ, “Bʋtamawa ɔnantswieá ɔdɛ ayo da ɔnɔ ɩkan.” Ɩlɛtra blɩ ɔbɛɛ, “Agyʋma ɔyɔpʋ bʋtɛka ɩkɔ.”

¹⁹ Nɩ ɔkʋ ɔda ɔpasua ɔhandɛ asʋn suna fʋ a, máhɔ mʋ́, nkɛtɩ fanu mʋ́ tsu aha abanyɔ-abasa ɔnɔ asa.

²⁰ Wa ɩyɩn wa ɔhandɛ amʋʋ ɔdɛ lalahɛ bwɛ amʋ ɔpasua amʋ ansɩtɔ, mɛnɩ atrahɛ bénya ifu.

²¹ Nlɩɩ Bulu mʋa Kristo Yesu pʋ́ Bulu-abɔpʋá alalɛ ansɩtɔ, ndɛ fʋ hɩɛ mbɛɛ, fʋgyi asʋn anfɩsʋ wanklaan. Mákɩ ɔhaa ansɩtɔ ntɛ futi fɩtatɔ kɩ.

²² Mákɔsɩ tsia yaɩ ɔha ɔpasua ɔhandɛ. Máwa ɩbɩ ɔha bamba lalahɛbwɛtɔ. Ha fʋ ɩwɩ ɩtɩn bregyibrɛ.

²³ Fʋ ɔmɛtɔ ɩlɔ amʋ sʋ mátsia nun ntsu wʋlɛ, tsia nun nta kpalobi-kpalobi.

²⁴ Akʋ lakpan meŋain. Mʋ́ sʋ bʋtɔkɔsɩ wun mʋ́ bɩtɩ amʋ́ ɩsʋ. Akʋ klɛ ɛ leŋain, ɔma asa ɩtɛlɩn ɔwan.

²⁵ Alɩ kɛn yilebwɛ tamaŋain nɩ. Nɩ ɩmɔkɔsɩ lɩn ɔwan kʋraa a, ɩtɛbɛlɩn ɔwan ɔma.