1 Timoteo 3 - Bulu Ntam Pɔpwɛ mʋ́a Israel Ɩlʋ

Ɔpasua Ɔhandɛ Bwɛ

¹ Asʋn anfɩ bʋ mʋ́tɔ. Nɩ ɔha ɔbwɛ agywɩɩn ánɩ́ mɔ́bwɛ ɔpasua ɔhandɛ a, alakle agyʋma wanklaan.

² Imehian ánɩ́ ɔlala bétsia ɔpasua ɔhandɛ ɩwɩ. Ɔbwɛ ɔka ɔkʋlɛ otsiapʋ, mʋ agywɩɩntɔ da, otegyi ɩwɩsʋ, obú bʋ mʋsʋ, ɔtɔhɔ afɔɔ, otosuna atɔ ɛ wanklaan.

³ Ɔmábwɛ nta ɔbʋpʋ ntɛ ɔha ánɩ́ ɔbʋ ɩyɩn. Ɔbwɛ ɔha ánɩ́ ɔlɛba ɩwɩasɩ, mʋ asʋn lolwii. Ɔmábwɛ ɔtrɛpʋ, ɔmábwɛ kɔba ɔdwɛpʋ.

⁴ Ɔbwɛ ɔha ánɩ́ ɔtɛkɩ mʋ woyisʋ wanklaan, mʋ abi bɛba ɩwɩasɩ, bʋtobu mʋ ɔkpagyiɔkpasʋ.

⁵ Tsufɛ nɩ ɔha meyin mʋ woyisʋ kɩ wanklaan a, nkalɩ ɔbɛ́talɩ kɩ Bulu ɔpasua amʋsʋ?

⁶ Ɔmábwɛ ɔha ánɩ́ ɔlɛdamli klʋntɔ ɩmɔkʋwa ɔpá. Nɩ megyi alɩ a, ɩbɛ́ha mʋ obótsu ɩwɩ, Bulu ɔbɛ́bɩtɩ mʋ ɩsʋ fɛ Ɔbʋnsam.

⁷ Ɩnɩ fɛ́ɛ́ ɔma a, ilehian ánɩ́ aha ánɩ́ bʋma ɔpasua amʋtɔ kʋraa bɛ́tɩ mʋ ɩdayile. Nɩ megyi alɩ a, ɔbɛ́kpa wie Ɔbʋnsam yibitɔ sʋpa.

Ɔpasua Ɔhandɛ Ɔbʋapʋ

⁸ Ɔpasua ɔhandɛ ɔbʋapʋ ɛ ɔbwɛ ɔha ánɩ́ obú bʋ mʋsʋ. Ɔma nnonyɔ, ɔtamabʋ nta, ɔma sika ɔnsɩpɛ.

⁹ Ilehian ánɩ́ ɔbɛ́kɩta hogyi asʋn amʋʋ ɩlalɩn ɔwan amʋtɔ wanklaan, mʋ klʋn ɛ mɛ́ɛtra ha mʋ ɩpɔn.

¹⁰ Mlɩgyankpa pʋ agyʋma ɩkʋ wa mʋ ɩbɩtɔ, pʋsɔ mʋ kɩ bɛɛ, ɔlala ma mʋ ɩwɩ, asa amlɩha mʋ ɔbwɛ ɔpasua ɔhandɛ ɔbʋapʋ.

¹¹ Alɩ kɛn mʋ ka ɛ ɔbwɛ ɔtsɩá obú bʋ mʋsʋ, ɔtamablɩ aha ɩwɩ asʋn lalahɛ, otegyi ɩwɩsʋ, ɔbʋ ɔnɔkwalɩ togyitɔtɔ nɩ.

¹² Ɔpasua ɔhandɛ ɔbʋapʋ ɔbwɛ ɔka ɔkʋlɛ otsiapʋ, ɔtɛtalɩ kɩ mʋ abi pʋ́ mʋ woyisʋ wanklaan.

¹³ Aha bʋtobu ɔpasua ɔhandɛ ɔbʋapʋá ɔtɔyɔ mʋ agyʋma wanklaan. Ɩtɛha mʋ ɔtɛtalɩ tɔɩ tsu mʋ hogyiá ɔbʋ Kristo Yesutɔ.

Asʋn Ŋainhɛ Kpɔnkpɔɔnkpɔntɩ

¹⁴ Ndɛ ɔwʋlʋ anfɩ wanlɩn sɩsɩ fʋ, tamɛ ndɩn ansɩá nɔ́kɔsɩ ba ɩnʋ.

¹⁵ Mʋmʋ nɩ ndɛ ɔpá wa kʋraa a, ɔwʋlʋ anfɩ ɩbɛ́ha fɛ́bɩ tsiatɔ oduá ilehian ánɩ́ ɔha obétsia Bulu woyi, igyi Bulu Ɔkɩankpapʋ ɔpasua amʋtɔ. Ɔpasua amʋ gyi ɔtan pʋ́ ntswɩasɩ kpekplekpe ha ɔnɔkwalɩ asʋn amʋ nɩ.

¹⁶ Ɔnɔkwalɩ, anɩ Bulusum ɩwɩ asʋn amʋʋ ɩlalɩn ɔwan amʋ lomoni. Mʋ́gyi, Kristo lɛlɛ mʋ ɩwɩ suna fɛ nyankpʋsa. Ɔŋɛ Wankɩhɛ lɛlɛ mʋ suna ánɩ́ yile ɔbwɛpʋ ogyi. Bulu-abɔpʋ bowun mʋ, aha bɛda mʋ asʋn ɔkan suna ɔmá fɛ́ɛ́. Ɔyɩtɔ aha bɔhɔ mʋ gyi, Bulu lotsu mʋ ya ɔsʋsʋ numnyamtɔ.