1 Timoteo 2 - Bulu Ntam Pɔpwɛ mʋ́a Israel Ɩlʋ

Bulusum Mbla

¹ Ɩtɔá ndedunka ánɩ́ mlɩgyankpa bwɛ gyi, mlɩkokoli Bulu aha fɛ́ɛ́ nwunsʋ, amlɩbɔ mpaɩ ha amʋ́. Mlɩkʋlɩ Bulu atɔ ha amʋ́, amlɩda mʋ ɩpan ɔhagyiɔha nwunsʋ.

² Ilehian ánɩ́ mlɔ́bwɛ mʋ́ alɩ ha awie pʋ́ ahandɛ ɛ, mɛnɩ asʋtɔ bólwii anɩ, abétsia iwilwiitɔ, atalɩ sum Bulu ɔkpagyiɔkpasʋ.

³ Ɩnɩ bʋ alɛ, anɩ Nkpa Ɔhɔpʋ Bulu tekle nɩ.

⁴ Tsufɛ odekleá ɔbɔ́hɔ aha fɛ́ɛ́ nkpa, mɛnɩ bɛ́bɩ ɔnɔkwalɩ amʋ.

⁵ Bulu ɔkʋkʋnʋ ɔkʋlɛ bʋ ɩnʋ. Nsɩnɛ ɔlapʋ ɔkʋlɛ pɛ ɛ bʋ Bulu mʋa anyankpʋsa nsɩnɛ. Mʋgyi Kristo Yesu, ogyi nyankpʋsa amʋ.

⁶ Mʋlesi mʋ nkpa ha pʋhɔ aha fɛ́ɛ́ nkpa. Asʋn anfɩ Bulu lɔpʋha ɔyɩ fɛ́ɛ́ mʋ́ brɛ wanklaantɔ nɩ.

⁷ Ɔnɔkwalɩ ndɛ mlɩ bla, mmɛdɛ afunu wa. Ɩnɩ sʋ Bulu lɛlɛ mɩ ɔbɛɛ, mbwɛ mʋ asʋn ɔkan ɔdapʋ, mʋ sumbi ɔyɔpʋ pʋ́ osunapʋ ha aha ánɩ́ bʋmegyi Yudafɔ, mɩ ambla amʋ́ ɔnɔkwalɩ asʋn tsu Yesu hogyi ɩwɩ nɩ.

⁸ Ndekleá ɔpasua kugyikʋtɔ a, ayin ánɩ́ amʋ́ ɩwɩ lɛtɩn bʋtsu ɩbɩ fʋa bɔ mpaɩ. Ɔblɔ ntɛ nwɛngyi mátsia amʋ́tɔ.

⁹ Atsɩ amʋ ɛ bʋdɩda tati ɔkpa wanklaansʋ. Amʋ́ atɔ dɩdahɛ máwɔ ansibi. Bʋmádʋn imi bwɛ, wa sika atɔ, dɩda atatiá ɩbʋ ibia dʋbɩ.

¹⁰ Atsɩá bɛɛ bʋtenya Bulu ifu bʋbwɛ yile. Mʋ́ ɔbɛ́ha bɔ́wa akɩlɛ nɩ.

¹¹ Ilehian ánɩ́ bétsia asɩ diin, ba ɩwɩasɩ suan atɔ.

¹² Mmɔkʋha atsɩ ɔkpa mbɛɛ, bʋsuna ayin atɔ, ntɛ bʋgyi ayinsʋ. Mboun bʋtsia diin.

¹³ Tsufɛ Adam Bulu legyankpa bwɛ asa ɔlɔbwɛ Hawa.

¹⁴ Megyi Adam ɛ Satan lɛmlɛ, mboun Hawa ɔlɛmlɛ, ɔlɔkʋsʋ lɩɩ Bulu mblasʋ.

¹⁵ Tamɛ Bulu ɔbɔ́hɔ ɔtsɩ nkpa tsʋn ɩkwɩɩsʋ. Nɩ ɔlɛtalɩ kɩta mʋ hogyi pʋ́ mʋ abadwɛtɔ, ɔlɛha mʋ ɩwɩ lɛtɩn, oletsia nkpa ɛ wanklaan.