1 Petro 3 - Bulu Ntam Pɔpwɛ mʋ́a Israel Ɩlʋ

Aklu Mʋ́a Aka

¹ Atsɩ, mlɩbu mlɩ aklu alɩ kɛn, mɛnɩ nɩ amʋ́tɔ akʋ bʋmɔhɔ Bulu asʋnsʋ gyi kʋraa, bowun mlɩ tsiatɔ a, ɩbɛ́tsɛ amʋ́, megyi mlɩ obétepi tra bla amʋ́ asʋansʋ.

² Tsufɛ bówun mlɩ tsiatɔ wanklaan pʋ́ alɩá mlɩtɛhɩɛ bu atɔ.

³ Mlɩ alɛ ɩmátsu mlɩ imi bwɛ, atati yile dɩda ntɛ sika atɔá ɩbʋ ibia watɔ.

⁴ Mboun mlɩha mlɩ alɛ itsu mlɩ klʋntɔ. Alɛá ɩtamayinta gyi mʋ́á ɩbʋ alɛ, ilolwii. Mʋ́tɛhɩɛ gyi Bulu ansɩ nɩ.

⁵ Tsufɛ alɩ kɛn bɩmbɩ amʋ atsɩá bɔpʋ amʋ́ ɩwɩ ha Bulu, pʋ ansɩ dɩnka mʋsʋ bobu amʋ́ aklu, sʋ bɔwa akɩlɛ nɩ.

⁶ Alɩ kɛn Sara lobu mʋ klu, oletsia tɩ mʋ ɔbɛɛ, “Mɩ wie” nɩ. Mʋ abi mlɩgyi, nɩ mlɔbwɛ yile, mlɩmenya tɔtɔ ifu.

⁷ Alɩ kɛn mlɩ ayin ɛ, nɩ mlɩa mlɩ aka mlɩbʋ ɩnʋ a, mlɩbɩá bʋma awutɔ-ɔwʋnlɩn fɛ mlɩ. Mlɩwun amʋ́ nwɛ, amlɩpʋ obú ha amʋ́. Tsufɛ mlɩa amʋ́nyɔ obénya Bulu atokiehɛ amʋʋ igyi nkpa amʋ. Mlɩkɩta mlɩ aka tsʋn ɔkpa anfɩsʋ, mɛnɩ nɩ mlɩdɛ mpaɩ bɔ a, tɔtɔ méetin mlɩ ɔkpa.

Ipianwun Yilebwɛ Sʋ

⁸ Ɩtrahɛ-trahɛ a, mlɩ fɛ́ɛ́ mlɩha mlɩ agywɩɩn ɩbwɛ kʋlɛ. Mlɩsu ha aba, amlɩdwɛ mlɩ aba Akristofɔ. Mlɩwun aba nwɛ, amlɩba ɩwɩasɩ ha aba.

⁹ Mlɩmápʋ lalahɛ ka lalahɛ ɩkɔ. Ntɛ nɩ aha besia mlɩ a, mlɩmásia amʋ́ ka ɩkɔ. Mboun mlɩyula amʋ́, tsufɛ Bulu lɛtɩ mlɩ ánɩ́ mlɩboyula aha, mɛnɩ obóyula mlɩ.

¹⁰ Bɔwanlɩn wa Bulu asʋn amʋtɔ bɛɛ, “Nɩ ɔkʋ dekle ɔbɛɛ, mʋ tsiatɔ ɩwa alɛ, otsia ansigyitɔ a, mʋmʋ osi aha ɩwɩ asʋn lalahɛ blɩ, osi afunu wa.

¹¹ Osi lalahɛ bwɛ, ɔbwɛ yile. Odunka iwilwii, ogya mʋ́ ɔkpa.

¹² Tsufɛ Bulu ansɩ bʋ yile abwɛpʋsʋ. Ɔtɛyaa asʋ nu amʋ́ atɔ kʋlɩhɛ. Tamɛ ɔtɔkʋsʋ lɩɩ lalahɛ abwɛpʋsʋ.”

¹³ Ma ɔbɔ́pʋ lalahɛ gyi mlɩ, nɩ mlɩ ansɩ ɩpɛ yilebwɛsʋ?

¹⁴ Tamɛ nɩ ɩlɛba ánɩ́ mlɩdɛ ipianwun yilebwɛ sʋ kʋraa a, nwun lawa mlɩ olu. Opuni mátsii mlɩ, mlɩmánya ɔhaa ɛ ifu.

¹⁵ Mboun mlɩbɩ tsu mlɩ klʋntɔá Kristo gyi mlɩ Wie. Mʋ ɩwɩ lɛtɩn. Mlɩda ɩwɩsʋ, mɛnɩ bregyibrɛ nɩ ɔkʋ lɛfɩtɛ hogyi amʋʋ ɩbʋ mlɩtɔ amʋ ɩwɩ asʋn a, mlɛ́bɩ lɛ mʋ́ ɔnɔ wanklaan. Tamɛ mlɩnya klʋn, amlɩba ɩwɩasɩ lɛ mʋ́ ɔnɔ.

¹⁶ Mlɩ klʋn máha mlɩ pɔn tɔtɔ ɩwɩ, mɛnɩ nɩ bʋdɛ asʋn lalahɛ blɩ tsu mlɩ tsiatɔ wanklaan amʋʋ mlɩlɔpʋ mlɩbuo Kristo amʋ ɩwɩ a, pɛlɩ bɛ́kɩta amʋ́.

¹⁷ Nɩ igyi Bulu apɛá fʋwun ipian kʋraa a, ɩbʋ alɛá fówun ipian yilebwɛ sʋ, dʋn ánɩ́ fówun ipian lalahɛbwɛ sʋ.

¹⁸ Tsufɛ Kristo ɛ lowu aha lakpan sʋ ɔtsawʋlɛ pɛ. Mʋ asʋn da ɔkpa, tamɛ olowu ha lakpan abwɛpʋ fɛ́ɛ́, mɛnɩ ɔbɛ́kpa mlɩ ba Bulu wa. Bɔmɔ mʋ nyankpʋsa-oyi, tamɛ Bulu lɔkʋsʋa mʋ Ɔŋɛtɔ.

¹⁹ Ɔlɔtsʋn Ɔŋɛ amʋtɔ yɛda asʋn amʋ ɔkan ha afuli amʋʋ bʋda obu amʋ.

²⁰ Afuli amʋ gyi, aha amʋʋ bʋmobu Bulu asʋn, Bulu lenya klʋn ha amʋ́ brɛ amʋʋ anɩ nain Noa dɛ daka kpɔnkpɔɔnkpɔntɩ sre amʋ. Aha ikwe pɛ lɔtsʋn ntsubʋla amʋtɔ nya nkpa.

²¹ Ntsu anfɩ lɛlɩɩ ha asubɔ. Alɩ amʋʋ aha amʋ bɔtsʋn ntsubʋla amʋsʋ nya nkpa amʋ a, alɩ kɛn asubɔ anfɩ dɛ mlɩ nkpa hɔ nɩ. Megyi mlɩ ɩwɩ ifin asubɔ tɔfwɩ. Mboun igyi ɩpabwii ha Bulu ánɩ́ mlɩ klʋn ɩdɩ mlɩ asɩ, ɩmátra ha mlɩ pɔn. Asubɔ anfɩ lahɔ mlɩ nkpa tsʋn Yesu Kristo kʋsʋ tsu afulitɔ amʋsʋ.

²² Alayɔ ɔsʋsʋ yetsia Bulu gyɔpɩsʋ sei. Bulu-abɔpʋ, ɔŋɛtɔ awie pʋ́ tumi kugyikʋ bʋbʋ mʋ asɩ.