1 Tesalonikafɔ 5 - Bulu Ntam Pɔpwɛ mʋ́a Israel Ɩlʋ

Ɩwɩsʋda Gyo Anɩ Wie Ɩba

¹ Apio, imehian ánɩ́ abɔ́wanlɩn brɛ pʋ́ ɛkɛá asʋn anfɩ ɩbɛ́ba sɩsɩ mlɩ.

² Tsufɛ mlɩ onuto mlɩyin ánɩ́ anɩ Wie ɔbakɛ amʋ ɩbɛ́ba bofwie anɩtɔ, fɛ alɩá owikplu tɛba onye.

³ Brɛá aha bɛɛ, “Owi lata; asʋn lata.” a, alɩ brɛ amʋtɔ bɛ́hɩ nɩ. Ibófwie amʋ́tɔ fɛ alɩá ɩkwɩɩ tɛkan ɔtsɩ ɔtsawʋlɛ pɛ. Ɔhaa mɛ́ɛdalɩ mʋ́tɔ.

⁴ Tamɛ apio, mlɩ mʋ́ mlɩyin asʋn anfɩ. Mʋ́ sʋ mlɩmétsie okluntɔ, mɛnɩ ɛkɛ amʋ mɛ́ɛba bofwie mlɩtɔ fɛ owikplu.

⁵ Wankɩ mʋ́a ɔyɩkɛhɛtɔ abi mlɩ fɛ́ɛ́ mlɩgyi. Megyi onye ntɛ okluntɔ abi anɩgyi.

⁶ Mʋ́ sʋ mlɩha agyo, anɩmádɩdɩ fɛ aha bamba. Mlɩha adɩnka ansɩ ɩwɩsʋ, akɩ ɩwɩsʋ wanklaan.

⁷ Onye adɩdɩpʋ bʋtɛdɩdɩ. Onye nta abʋpʋ ɛ bʋtɔbʋ nta.

⁸ Tamɛ anɩ mʋ́ a, wankɩtɔ abi anɩgyi. Mʋ́ sʋ mlɩha agyi ɩwɩsʋ. Mlɩha Kristo hogyi pʋ́ anɩ abadwɛ ɩbwɛ kantɔ-atintɔ tin anɩ kantɔ. Mʋ ɔkpakɩá ɔbɔ́hɔ anɩ nkpa ɩbwɛ kʋtʋpa ánɩ́ ibun anɩ nwun.

⁹ Megyi alɩá Bulu obénya ɔblɔ wa anɩ, bɩtɩ anɩ ɩsʋ sʋ ɔlɛlɛ anɩ. Mboun alɩá ɔbɔtsʋn anɩ Wie Yesu Kristosʋ hɔ anɩ nkpa sʋ.

¹⁰ Kristo lowu ha anɩ, mɛnɩ mʋ babɩ a, nɩ anɩlawu o, anɩbʋ nkpa o, anɩa mʋnyɔ abétsia.

¹¹ Mlɩpʋ asʋn anfɩ kɩta klʋn wa aba ɩwɩtɔ, pʋwa aba ɔwʋnlɩn, fɛ alɩá mlɩdɛ mʋ́ bwɛ dodo.

Ɩkla

¹² Apio, abwii ɩpa ha mlɩ, mlɩbu mlɩ ɔnɔ alɩɩpʋá bʋhɩɛ bʋdɛ agyʋma yɔ mlɩtɔ, bʋdɛ mlɩ anɩ Wie tsiatɔ suna.

¹³ Gyʋma amʋʋ bʋdegyi amʋ sʋ mlɩhɩɛ bu amʋ́, amlɩdwɛ amʋ́. Iwilwii itsia mlɩa mlɩ aba nsɩnɛ.

¹⁴ Apio, anɩdɛ mlɩ ɔla da anɩaa, mlɩtɔɩ kpla awʋlɩyɔpʋ. Mlɩwa afupʋ atɛtɔ-ɔnlɩn. Mlɩbʋa amʋ́á bapɔn, amlɩnya klʋn ha ɔhagyiɔha.

¹⁵ Mlɩkɩá ɔha mɔ́ɔpʋ lalahɛ ka mʋ ba ɩkɔ. Mboun mlɩbwɛ yile ha aba pʋ́ aha fɛ́ɛ́.

¹⁶ Ansɩ igyi mlɩ,

¹⁷ amlɩbɔ mpaɩ bregyibrɛ.

¹⁸ Mlɩda Bulu ɩpan togyitɔtɔ. Mʋ́gyi tɔá Bulu dedunka tsu mlɩ wa mlɩ nkpatɔ, brɛ anfɩ mlɩa Kristo Yesunyɔ mlɩlabwɛ ɩkʋlɛ anfɩ nɩ.

¹⁹ Mlɩmákina tɔá Ɔŋɛ Wankɩhɛ amʋ tekle bwɛ.

²⁰ Mlɩmábu Bulu ɔnɔsʋ atɔɩpʋ asʋn amʋ tɔkʋ odu.

²¹ Mlɩsɔ togyitɔ kɩ, amlɩkɩta mʋ́á ɩbʋ alɛtɔ kinkiinkin.

²² Mlɩkina lalahɛ kugyikʋ.

²³ Bulu tɛha anɩ iwilwii. Ɔtɩn mlɩ ɩwɩ ɔkpagyiɔkpasʋ. Ɔkɩ mlɩ nyankpʋsa-oyi, mlɩ ɔŋɛ pʋ́ mlɩ ɔklasʋ tsu lalahɛ kugyikʋtɔ, mɛnɩ ɔlala méetsia mlɩ ɩwɩ anɩ Wie Yesu Kristo ɔbakɛ amʋ.

²⁴ Bulu lɛtɩ mlɩ. Ɔnɔkwalɩpʋ ogyi, ɔbɔ́bwɛ mʋ́.

²⁵ Apio, mlɩbɔ mpaɩ ha anɩ ɛ.

²⁶ Aha ahogyipʋ amʋ fɛ́ɛ́ itsia gyagyagya. Mlɩlata aba puta ɔdwɛsʋ.

²⁷ Ndɛ mlɩ bla anɩ Wie ɩdatɔ mbɛɛ, mlɩkla ɔwʋlʋ anfɩ suna ahogyipʋ amʋ fɛ́ɛ́.

²⁸ Anɩ Wie Yesu Kristo ogyi mlɩ bʋalɛ.