1 Tesalonikafɔ 3 - Bulu Ntam Pɔpwɛ mʋ́a Israel Ɩlʋ

Timoteo Tesalonika Yɔ

¹ Mʋ́ sʋ brɛá anɩmɛbɩ alɩá mlɩ tsiatɔ igyi, ɩdɛ anɩ han a, anɩlɔbwɛ agywɩɩn anɩaa, anɩ mʋ́ abétsia Atene wulutɔ,

² awa anɩ pio Timoteo, ogyi anɩ Bulu agyʋmayɔba Kristo asʋn wanklaan amʋ ɔkandatɔ sɩsɩ mlɩ. Ɔbɔwa mlɩ ɔwʋnlɩn, ɔtɔɩ kpla mlɩ amlɩlɩɩ kinkiinkin hogyitɔ,

³ mɛnɩ mlɩtɔ ɔkʋkʋ méeyinki ɔma asʋn wunhɛ anfɩ sʋ. Mlɩ onuto mlɩyin ánɩ́ igyi tɔá ɩda yaɩ ha anɩ Akristofɔ dodo.

⁴ Tsufɛ brɛá anɩbʋ mlɩ wa a, anɩlɛbla mlɩá bɛ́dɩnka mlɩsʋ. Lɛlɛ bɛdɩnka mlɩsʋ fɛ alɩá mlɩyin.

⁵ Ɩnɩ sʋ brɛá netsia mmetsia a, nɔwa Timoteo mlɩ wa mbɛɛ, ɔbɛ́kɩ alɩá mlɩdɛ hogyi amʋtɔ. Tsufɛ ɩbɛ́talɩ ba ánɩ́ Ɔbʋnsam lasɔ mlɩ kɩ, ha anɩ gyumagyihɛ labwɛ kpaalɩ.

⁶ Timoteo layinki pʋ asʋn wanklaan tsua mlɩ wa ba anɩ sei, tsu mlɩ hogyi pʋ́ mlɩ abadwɛ ɩwɩ. Alabla anɩ ɔbɛɛ, mlɩ ɛ mlɩdɛ anɩsʋ kaɩn dʋbɩ. Mlɩdekleá mlówun anɩ, fɛ alɩ amʋʋ anɩ ɛ anɩdekleá abówun mlɩ amʋ.

⁷ Mʋ́ sʋ apio, mlɩ hogyi lawa anɩ atɛtɔ-ɔnlɩn, anɩ ipian pʋ́ anɩ asʋn wunhɛ fɛ́ɛ́tɔ;

⁸ tsufɛ mlɩlɩɩ anɩ Wie hogyitɔ kinkiinkin. Mʋ́ sʋ anɩ klʋn ladɩ anɩ asɩ.

⁹ Ɩpan mɔmʋ abɔ́kʋkʋ da Bulu mlɩ sʋ, ansɩá ɩdɛ anɩ gyi mʋ ansɩtɔ sʋ?

¹⁰ Anɩtɛhɩɛ bɔ mpaɩ kokoli Bulu ɔpa mʋ́a onye anɩaa, ɔha ayinki bowun mlɩ, mɛnɩ abósuna mlɩ tɔá ɩbɛ́ha mlɩ hogyi bɔ́fʋn.

¹¹ Anɩ Sɩ Bulu onuto mʋa anɩ Wie Yesu bʋfinki ɔkpa ha anɩ aba mlɩ wa.

¹² Anɩ Wie ɔha mlɩ apio aba pʋ́ aha fɛ́ɛ́ dwɛ ɔnɔ ɩwa ɔnlɩn, fɛ alɩ amʋʋ anɩtɔdwɛ mlɩ amʋ.

¹³ Ɔwa mlɩ ɔwʋnlɩn, mɛnɩ anɩ Sɩ Bulu omóowun ɔlala mlɩ ɩwɩ, ifin kʋkʋ ɛ méetsia mlɩ ɩwɩ mʋ ansɩtɔ, anɩ Wie Yesu mʋa mʋ aha fɛ́ɛ́ ɔbakɛ amʋ.