1 Tesalonikafɔ 2 - Bulu Ntam Pɔpwɛ mʋ́a Israel Ɩlʋ

Paulo Tsiatɔ Tesalonika Wulutɔ

¹ Apio, mlɩ onuto mlɩyin ánɩ́ anɩ mlɩ wa ba mɔbwɛ kpaalɩ.

² Mlɩyin alɩá bɔwa anɩ amʋmʋyɔ, sʋpa anɩ Filipi wulutɔ asa anɩlɛba mlɩ wa. Mlɩyin ánɩ́ akʋ bʋmotsula, bɛhɩɛ kʋsʋ lɩɩ anɩsʋ; tamɛ anɩ Bulu lɔwa anɩ ɔwʋnlɩn, anɩlɛbla mlɩ asʋn wanklaan amʋ.

³ Tsufɛ megyi afunu asʋn anɩdɛblɩ. Mʋ́ sʋ ndɛ mlɩ kokoli. Megyi agywɩɩn lalahɛ kʋkʋ igyi, anɩmɛdɛ mlɩ mlɛ ɛ.

⁴ Bulu lɔhɔ anɩsʋ gyi, ɔlɔpʋ mʋ asʋn wanklaan amʋ wa anɩ ɩbɩtɔ. Mʋ́ anɩdɛblɩ nɩ! Megyi anyankpʋsa ansɩtɔ anɩdɛkɩ blɩ mʋ́, Bulu yin anɩ klʋntɔ.

⁵ Mlɩhɩɛ mlɩyin ánɩ́ megyi ɔnɔ dɛdɛ anɩlɔpʋ ba mlɩ. Anɩmɛba bɔwa afunu kʋkʋ ɛ suna mlɩ, pʋnya tɔkʋ tsu mlɩ wa. Bulu gyi anɩ ɔdansɩyin.

⁶ Anɩmodunka kanfʋ tsu nyankpʋsa ɔkʋkʋ, mlɩ, ntɛ ɔha bamba wa. Kristo sumbi ayɔpʋ anɩgyi. Mʋ́ sʋ tɛkɩ anɩbʋ ɔkpa si ɩwɩ tswɩ mlɩsʋ,

⁷ tamɛ anɩlolwii ha mlɩ, kɩ mlɩ fɛ alɩá abi-oyín tɛkɩ mʋ onuto abisʋ.

⁸ Anɩtɛhɩɛ kle mlɩ asʋn. Mʋ́ sʋ megyi Bulu asʋn wanklaan amʋ nkʋlɛ anɩlɔpʋ ba mlɩ, mboun anɩlesi anɩ ɩwɩ ɛ ha mlɩ, tsufɛ mlɩlamli anɩ adwɛpʋ.

⁹ Apio, yɛ mlɛ́kaɩn agyʋma ánɩ́ anɩlɔyɔ ɔpa mʋ́a onye pʋnya tɔá ilehian anɩ? Alɩá anɩméesi ipian tswɩ mlɩsʋ brɛá anɩdɛ Bulu asʋn wanklaan amʋ ɔkan da suna mlɩ sʋ anɩlɔbwɛ mʋ́ alɩ.

¹⁰ Mlɩ ahogyipʋ amʋ pʋ́ Bulu gyi anɩ adansɩfɔ alɩá anɩlɔpʋtsia mlɩtɔ. Anɩ ɩwɩ lɛtɩn, anɩ asʋn da ɔkpa, ɔlala ɛ metsia anɩ ɩwɩ.

¹¹ Mlɩyin ánɩ́ anɩlɛkpa mlɩtɔ okugyiɔkʋ fɛ alɩá abi-ɔsɩ tɛkpa mʋ abi.

¹² Anɩlɔwa mlɩ atɛtɔ-ɔnlɩn, lwii mlɩ klʋn, tɔɩ kpla mlɩ anɩaa, mlɩtsia tsiatɔá ilegyi Bulu ansɩ. Mʋlɛtɩ mlɩ ɔbɛɛ, mlɩbenya mʋ iwiegyi pʋ́ mʋ numnyam amʋ ɩkʋ.

¹³ Tɔá sʋá anɩtɛda mʋ ɩpan bregyibrɛ ɛ gyi, brɛá anɩlɔpʋ mʋ asʋn amʋ ba mlɩ a, mlɩmotsu mʋ́á nyankpʋsa wa itsu. Mboun mlɩlɔhɔ mʋ́ ánɩ́ lɛlɛ, itsu Bulu wa; tsufɛ mʋ́ Bulu dɛpʋyɔ agyʋma mlɩ ahogyipʋ amʋtɔ nɩ.

¹⁴ Apio, mlɩlamli fɛ Bulu ɔpasua ánɩ́ ɩbʋbʋ Yudea ɔmátɔ, bʋgyi Kristo Yesu klɛ amʋ. Mlɩlowun ipian mlɩ pɩ ɩbɩtɔ, fɛ alɩ amʋʋ amʋ́ ɛ bowun ipian amʋ́ pɩ Yudafɔ ɩbɩtɔ amʋ.

¹⁵ Yudafɔ lɔmɔ Bulu ɔnɔsʋ atɔɩpʋ pʋ́ anɩ Wie Yesu. Amʋ́ kɛn lagya anɩ lɛ ɔmá amʋtɔ. Bʋtamakle aha asʋn, bʋtamagyi Bulu ansɩ.

¹⁶ Bɔkʋsʋ lɩɩ anɩsʋ ka anɩ itin bɛɛ, anɩmábla aha ánɩ́ bʋmegyi Yudafɔ nkpahɔ asʋn amʋ, Bulu ɔhɔ amʋ́ nkpa. Ɩnɩ bwɛ laha amʋ́ lakpan labiayi. Mʋ́ sʋ ɩlaha Bulu lanya ɔblɔ, ɔbɛ́bɩtɩ amʋ́ ɩsʋ.

Paulo Lekleá Ɔbɛ́layɛkɩ Tesalonikafɔ

¹⁷ Apio, anɩlɛnatɩ mlɩ wa ɔpá anɩmɔkʋsi mlɩsʋ kaɩn. Mʋ́ sʋ anɩhɩɛ anɩdɛ ɔkpa dunka ánɩ́ abɛ́la bowun mlɩ ansɩtɔ, tsufɛ anɩdɛ mlɩsʋ kaɩn dʋbɩ.

¹⁸ Anɩlekleá abɛ́laba mlɩ wa. Mɩ Paulo onuto o nabwɛ agywɩɩn ánɩ́ néyinki ba ɩnʋ ɩta tsefɩnɩ, tamɛ Ɔbʋnsam mɛha ɔkpa.

¹⁹ Ma sʋ anɩ ansɩ dɩn? Megyi mlɩ sʋ ansɩ dɛ anɩ gyiá abénya ɔkpa tsu ɩwɩ anɩ Wie Yesu ansɩtɔ brɛá ɔbɛ́ba?

²⁰ Lɛlɛ mʋ́ a, mlɩgyi anɩ numnyam pʋ́ anɩ ansigyi.