1 Korintofɔ 9 - Bulu Ntam Pɔpwɛ mʋ́a Israel Ɩlʋ

Sumbi Ɔyɔpʋ Tumi Pʋ́ Mʋ Gyumagyihɛ

¹ Mlɩkɩ mlɩaa, mmetsie mɩ ɩwɩsʋ? Ntɛ megyi sumbi ɔyɔpʋ ngyi? Mmɔkʋwun anɩ Wie Yesu kɩ? Megyi mɩ gyumagyihɛ sʋ mlɩlamli anɩ Wie klɛ ndɛ?

² Nɩ mmegyi sumbi ɔyɔpʋ ha akʋ a, mlɩ mʋ́ mlɩyin ánɩ́ sumbi ɔyɔpʋ ngyi. Tsufɛ ɩnɩá mlɩgyi Akristofɔ a, ilegyi adansɩɛ ánɩ́ anɩ Wie sumbi ɔyɔpʋ ngyi.

³ Ɩnɩgyi tɔá ntɔpʋlɛ mɩ ɩwɩ ɔnɔ suna aha ánɩ́ bʋtɛlɛ mɩ ɩla nɩ.

⁴ Mɩa Barnaba mʋ́ anɩmágyi atɔ, nun ntsu?

⁵ Anɩmá ɔkpa tsia ohogyipʋ, kpa mʋ buo ɩwɩ, fɛ sumbi ayɔpʋ atrahɛ amʋ pʋ́ anɩ Wie apio mʋ́a Petro aná?

⁶ Ntɛ mɩa Barnabanyɔ mʋ́ ayɔ agyʋma kɩ anɩ ɩwɩsʋ?

⁷ Ɩsa ɔkɔpʋ onuto tɛka ɩwɩ ɩkɔ? Ɛkɛkɛɛkɛ! Ɔdɔtɔpʋ ɔmɔmʋ tamagyi mʋ ndɔtɔ-atɔ? Mbwɩ ɔyaɩpʋ ɔmɔmʋ tamagyi mʋ ɔbwɩ yaɩhɛ?

⁸ Anyankpʋsa agywɩɩn ndɛpʋblɩ ɩnɩ? Yɛ Mose Mbla o ɩlɛblɩ alɩ a?

⁹ Tsufɛ bɔwanlɩn wa Mose Mbla amʋtɔ bɛɛ, “Bʋtamawa ɔnantswieá ɔdɛ ayo da ɔnɔ ɩkan.” Fahogyi fɛɛ, nnantswie ɩwɩ dɛ Bulu hian sʋ ɔlɛblɩ asʋn anfɩ?

¹⁰ Megyi anɩ sʋ ɔdɛ asʋn anfɩ blɩ? Anɩ sʋ ɔdɛ mʋ́ blɩ a. Bɔwanlɩn wa Bulu asʋn amʋtɔ bɛɛ, “Ɩflɛ ɔwɔpʋ mʋa atɔ ɔkpɔtɩpʋ fɛ́ɛ́ bʋgyo tɔá bénya tsu agyʋma amʋʋ bayɔ amʋtɔ.”

¹¹ Nɩ anɩlabla mlɩ asʋn wanklaan amʋ, igyi ɔŋɛtɔ abiá anɩladu wa mlɩtɔ a, anɩ mʋ́ anɩmá ɔkpa nya anɩ ɔyɩtɔ atohianhɛ tsu mlɩ wa?

¹² Nɩ akʋ bʋbʋ ɔkpa nya atɔ tsu mlɩ wa a, anɩmá ɔkpa dʋn amʋ́? Tamɛ anɩmotsu kʋkʋ lɛ ɩnɩtɔ. Anɩlapʋ klʋntɔ pisii hɔ togyitɔ, mɛnɩ anɩmɔ́ɔpʋ tɔtɔɔtɔ tin Kristo asʋn wanklaan amʋ ɔkpa.

¹³ Mlɩmeyin mlɩaa, Bulu ɔtswɛkpa ɩnʋ agyʋma ayɔpʋ ɛ bʋbʋ ogyikpa ɩnʋ? Ntɛ mlɩmeyin ánɩ́ afɔdɩɛ-ɩswɩ amʋ asɩ asumpʋ bʋtegyi mʋ́ asɩ atɔ?

¹⁴ Alɩ kɛn anɩ Wie lɛhɩɛá mʋ asʋn wanklaan amʋ ɔkan adapʋ ɛ bʋgyi atɔ tsu aha ánɩ́ bʋdɛ labi nya tsu asʋn amʋtɔ wa nɩ.

¹⁵ Tamɛ mɩ mʋ́ mmɔkʋpʋ alɩ ɔkpa anfɩ mbʋ anfɩ nya tɔtɔ tsu mlɩ wa. Megyi bɛɛ, ndekleá néfi mʋ́ asɩ, sʋ ndɛ asʋn anfɩ wanlɩn sɩsɩ mlɩ. Ɩbʋ mɩ alɛá nówu, dʋn ánɩ́ nɔ́hʋlɩ ɩtɔ anfɩ nɔ́pʋtsu ɩwɩ anfɩ.

¹⁶ Tamɛ nɩ ndɛ asʋn wanklaan amʋ ɔkan da a, imegyi tɔá nɔ́pʋtsu ɩwɩ. Tsufɛ ɔhɩɛ igyi ha mɩ. Bulu ɔbɛ́bɩtɩ mɩ ɩsʋ nɩ mmɛda mʋ́ ɔkan.

¹⁷ Nɩ mɩ onuto lɛblɩ mbɛɛ nɔ́bwɛ mʋ́ a, tɛkɩ Bulu ɔbɛ́da mɩ ɩpan. Tamɛ megyi mɩ onuto apɛtɔ ndɛ mʋ́ bwɛ. Ɔkpábi ngyi, Bulu lobu mɩ ɔnɔkwalɩpʋ pʋ́ agyʋma anfɩ wa mɩ ɩbɩtɔ.

¹⁸ Ɩkɔka mɔmʋ nénya tsu mʋ́tɔ ngya? Mʋ́gyi nɛ́da asʋn wanklaan amʋ ɔkan, bʋmɛ́ɛka mɩ tɔtɔ. Tɛkɩ mbʋ ɔkpa pʋkle tɔkʋ ha mɩ ɩwɩ, tamɛ mmɔ́ɔbwɛ mʋ́ alɩ.

¹⁹ Ntsie mɩ ɩwɩsʋ. Mma ɔhaa asɩ, tamɛ nabwɛ ɩwɩ ɔkpábi ha ɔhagyiɔha, mɛnɩ nɛ́kpa aha tsɔtsɔɔtsɔ ba Kristo.

²⁰ Ntɔbwɛ ɩwɩ fɛ Yudayin nɩ mbʋ Yudafɔtɔ, mɛnɩ nɛ́talɩ nya Yudafɔ amʋ. Mma Mose mbla asɩ, tamɛ ntɔbwɛ ɩwɩ fɛ aha ánɩ́ bʋbʋ mʋ́ asɩ, mɛnɩ nɛ́talɩ nya amʋ́tɔ akʋ.

²¹ Alɩ kɛn nɩ mɩa ɔmátɔfɔá bʋma Mose mbla asɩ anɩna a, ntɔbwɛ ɩwɩ fɛ amʋ́, mɛnɩ nɛ́talɩ kpa amʋ́ ba Kristo nɩ. Ɩnɩ medesuna ánɩ́ mma Bulu mbla amʋ asɩ, tsufɛ ntobu Kristo mbla amʋ.

²² Ntɔbwɛ ɩwɩ fɛ aha ánɩ́ amʋ́ hogyi ɔnɔ ma ɔnlɩn, mɛnɩ nɛ́talɩ ha amʋ́ bɛ́dan Kristotɔ. Ntɛdamli ɩwɩ ɔkpa ɔtsan-ɔtsansʋ ha aha fɛ́ɛ́, mɛnɩ nɛ́talɩ kpa amʋ́tɔ akʋ ba Kristo.

²³ Asʋn wanklaan amʋ sʋ ntɔbwɛ ɩnɩ fɛ́ɛ́, mɛnɩ mɩ ɛ nénya ogyikpa mʋ́tɔ.

²⁴ Mlɩkaɩn ánɩ́ nɩ aha bʋsrɩ a, okugyiɔkʋ tɛyɩrɩ ɩwɩ, tamɛ ɔbakʋlɛ tegyi ɩsʋ, bʋtekie mʋ atɔ? Mlɩ ɛ mlɩyɩrɩ ɩwɩ srɩ, mɛnɩ mlégyi ɩsʋ békie mlɩ atɔ.

²⁵ Ɔsrɩ otsiipʋ okugyiɔkʋ tɛkɩta ɩwɩ, mɛnɩ ɔbɛ́srɩ pʋhɔ ɩda ánɩ́ ɩtamatsia yɔ. Tamɛ anɩ mʋ́ anɩdɛ ɩnɩ bwɛ, mɛnɩ abɔ́hɔ ɩda ánɩ́ ɩmɔ́ɔfwɩ ɛkɛkɛɛkɛ.

²⁶ Ɩnɩ sʋ megyi kpaalɩ nsrɩ. Mɩ ansɩ dɩn tɔkʋsʋ. Ntamatswɩ atswɛ wa afutɔ.

²⁷ Ntesen ansɩtɔ, bwɛ mɩ ɩwɩ ɔkpábi, mɛnɩ nɩ nɛda asʋn amʋ ɔkan suna aha ta a, Bulu mɛ́ɛbla mɩ ɔbɛɛ, nabwɛ tsitsa.