1 Korintofɔ 8 - Bulu Ntam Pɔpwɛ mʋ́a Israel Ɩlʋ

Ɔkpɩtɔ Atogyihɛ

¹ Mlɩha ablɩ ɔkpɩtɔ-atɔ gyi ɩwɩ asʋn amʋʋ mlɩlɔwanlɩn sɩsɩ mɩ amʋ. Mlɩdɛblɩ mlɩaa, “Anɩ fɛ́ɛ́ anɩyin asʋn.” Ɩbʋ mʋ́tɔ, tamɛ mlɩbɩá asʋnbɩ tɛha ɔha totsu ɩwɩ, ɔdwɛ ɛ ɩtɛha ɔha tɛdan.

² Nɩ ɔkʋ ɔbɛɛ, mʋyin asʋn dʋbɩ a, ɔmɔkʋnya bɩ tɔá idehian.

³ Ɔha ánɩ́ ɔtɔdwɛ Bulu a, Bulu ɛ yin mʋ.

⁴ Mʋ́ sʋ nkalɩ anɩdɛblɩ tsu ɔkpɩtɔ atɔ gyi ɩwɩ? Anɩ fɛ́ɛ́ anɩyin ánɩ́ ɔkpɩ megyi tɔtɔɔtɔ. Anɩyin ánɩ́ Bulu ɔkʋlɛ pɛ ɛ bʋ ɩnʋ, ɔkʋkʋ tra ɔma ɔtɩnɛtɩnɛ.

⁵ Ɩnɩá ɩkpɩ mʋ́a tumi tsɔtsɔɔtsɔ bʋbʋ ɔsʋ mʋ́a asɩ o a,

⁶ anɩ mʋ́ anɩyin ánɩ́ Bulu ɔkʋlɛ pɛ bʋ ɩnʋ. Mʋgyi anɩ Sɩ, ɔsʋ mʋ́a asɩ Ɔbwɛpʋ. Mʋ anɩtsie nkpa ha. Anɩ Wie ɔkʋlɛ pɛ ɛ bʋ ɩnʋ. Mʋgyi Yesu Kristo. Mʋsʋ Bulu lɔtsʋn bwɛ togyitɔ. Mʋ kɛn sʋ anɩtsie nkpa nɩ.

⁷ Tamɛ megyi Akristofɔ fɛ́ɛ́ yin alɩ asʋn anfɩ. Ɩkpɩsum lamanta amʋ́ dodo. Ɩnɩ sʋ nɩ begyi ɔkpɩtɔ-atɔ a, bʋdɛ mʋ́ tsuá basum ɔkpɩ amʋ nɩ. Mʋ́ sʋ ifin lada amʋ́, tsufɛ bʋmɔkʋdan hogyitɔ.

⁸ Megyi tɔá anɩtegyi sʋ anɩa Bulunyɔ nsɩnɛ bɔ́wa alɛ. Ntɔ anɩlegyi o, ntɔ anɩmegyi o, tɔtɔ meyinta anɩ ɩwɩ.

⁹ Tamɛ mlɩkɩ wanklaan ánɩ́ ɔkpa anfɩ mlɩbʋ gyi ɔkpɩtɔ-atɔ anfɩ ɩmɛ́ɛha ɔha ánɩ́ ɔmɔkʋdan hogyitɔ ɔmɛ́ɛdɩda.

¹⁰ Nɩ ɔha ánɩ́ ɔmɔkʋdan hogyitɔ owun fʋ anfɩ fɛɛ fʋyin asʋn, fʋdɛ atɔ gyi ɔkpɩtɔ a, ɩbʋ alɛ? Mʋmʋ yɛ fʋdɛ mʋ atɛtɔ-ɔnlɩn wa fɛɛ, ogyi ɔkpɩtɔ atɔ anfɩ mʋ onuto oyin ánɩ́ ɩma alɛ anfɩ nɩ o.

¹¹ Mʋmʋ fapʋ fʋ asʋnbɩ mlɛ fʋ pio wa. Faha fʋ pio anfɩ ɔmɔkʋdan hogyitɔ, Kristo lowu ha mʋ anfɩ lafwɩ.

¹² Nɩ fɔpʋ ɩla gyi fʋ pio Okristoyin ánɩ́ ɔmɔkʋdan hogyitɔ, fɛha mʋ ɔbwɛ tɔá oyin ánɩ́ ɩma alɛ a, Kristo fapʋ ɩla gyi a.

¹³ Mʋ́ sʋ nɩ tɔá négyi ɩbɛ́ha mɩ pio Okristoyin ɔbɔ́bwɛ lakpan a, mméetepi tra gyi iye ɛkɛkɛɛkɛ, mɛnɩ ɩmɛ́ɛha mʋ ɔdɩda.