1 Korintofɔ 7 - Bulu Ntam Pɔpwɛ mʋ́a Israel Ɩlʋ

Aklu Mʋ́a Aka, Akpankʋ Pʋ́ Asʋrapʋ Atosunahɛ

¹ Nayɔ asʋn fɩtɛhɛ amʋʋ mlɩlɔwanlɩn sɩsɩ mɩ amʋtɔ kɩ a, Ee! Ɩbʋ alɛá oyin mɔ́ɔpʋ ɩbɩ da ɔtsɩ.

² Tamɛ mbʋatɔ ladʋbɩ. Mʋ́ sʋ oyingyioyin onya mʋ onuto ɔka, ɔtsɩgyiɔtsɩ ɛ onya mʋ onuto oklu.

³ Ilehian ánɩ́ oklu obégyi ɔkatsia mbla fɛ́ɛ́sʋ ha mʋ ka, ɔka ɛ ɔbɔ́bwɛ mʋ́ alɩ ha mʋ klu.

⁴ Megyi ɔtsɩ bʋ mʋ ɩwɩ, mʋ klu bʋ mʋ. Alɩ megyi oyin ɛ bʋ mʋ ɩwɩ, mʋ ka bʋ mʋ nɩ.

⁵ Mʋ́ sʋ mlɩmákina aba ɔdɩkpa ha, nkɛtɩ mlɩ abanyɔ amʋ mlɩlatsula ánɩ́ mlétsia nkɛ kpalobi, mɛnɩ mlétsia bɔ mpaɩ, asa mlɛ́layɔ aba wa. Mlɩlawun aba mʋ́ ɔma, mɛnɩ Ɔbʋnsam mɛ́ɛtalɩ sɔ mlɩ kɩ, nɩ mlɩmɛtalɩ kɩta ɩwɩ.

⁶ Ɔkpa ɩda ánɩ́ mlɔ́bwɛ mʋ́ alɩ, tamɛ megyi ɔhɩɛ igyi.

⁷ Mɩ nkʋlɛ sʋ mʋ́ a, tɛkɩ mlétsia kpankʋ fɛ mɩ, tamɛ ɔhagyiɔha bʋ mʋ́á Bulu lɔpʋkie mʋ. Ɔmɔbwɛ anɩ fɛ́ɛ́ kɛkɛ. Ɔhagyiɔha mʋa mʋ klɛ.

⁸ Sei ndɛ akpankʋ mʋa asʋrapʋ bla mbɛɛ, nɩ bótsula tsia mɩ atsiabi a, tɛkɩ ɩbʋ alɛ.

⁹ Tamɛ nɩ mlɩmɛ́ɛtalɩ kɩta ɩwɩ ntɛ gyi mlɩ ɩwɩsʋ mʋ́ a, mlɩtsia aklu mʋ́a aka, dʋn ánɩ́ mlɛ́natɩ da tsʋn.

¹⁰ Tamɛ aklu mʋ́a aka awie mʋ́ a, mbla kʋ bʋ ɩnʋá megyi mɩ, mboun anɩ Wie Yesu lɔwa ha amʋ́. Ɔbɛɛ, ɔka mákina mʋ klu.

¹¹ Tamɛ nɩ ɔmaɩn mʋ klusʋ a, ɔkɩta ɩwɩ ntɛ oyinki yɔ mʋ klu wa. Oklu ɛ mákina mʋ ka.

¹² Mlɩ aha trahɛ mʋ́ a, mɩ onuto dɛ mlɩ ɩnɩ bla. Megyi anɩ Wie Yesu dɛ mʋ́ blɩ. Nɩ ohogyipʋ yinhɛ tsia ɔtsɩá omegyi ohogyipʋ, tamɛ ɔtsɩ amʋ latsula ánɩ́ mʋa mʋnyɔ bétsia a, ɔmákina mʋ.

¹³ Nɩ ohogyipʋ tsɩhɛ ɛ tsia oyin ánɩ́ omegyi ohogyipʋ, tamɛ alatsula ánɩ́ mʋa mʋnyɔ bétsia a, mʋ ɛ ɔmákina mʋ.

¹⁴ Tsufɛ ohogyipʋ tsɩhɛ amʋ sʋ Bulu ɔbɔ́hɔ mʋ klu. Alɩ kɛn ohogyipʋ yinhɛ amʋ sʋ Bulu ɔbɔ́hɔ mʋ ka ɛ nɩ. Nɩ megyi alɩ a, Bulu móotsu amʋ́ abi ánɩ́ amʋ́ asʋn da ɔkpa mʋ ansɩtɔ. Tamɛ ɩnɩ sʋ Bulu latsu amʋ́á amʋ́ asʋn da ɔkpa mʋ ansɩtɔ.

¹⁵ Tamɛ nɩ oklu ntɛ ɔka ánɩ́ omegyi ohogyipʋ dekleá obékina mʋ tsiaba ohogyipʋ a, ohogyipʋ amʋ osi mʋ ɔnatɩ. Mbla kʋkʋ mɛklɩ mʋ, tsufɛ Bulu lɛtɩ anɩ ɔbɛɛ, abétsia iwilwiitɔ.

¹⁶ Ohogyipʋ tsɩhɛ, fʋyin nɩ fʋ ɔbɔ́hɔ fʋ klu nkpa? Ntɛ ohogyipʋ yinhɛ, fʋyin nɩ fʋ ɔbɔ́hɔ fʋ ka nkpa?

Tsia Alɩá Fʋgyi

¹⁷ Mʋ́ sʋ ɔhagyiɔha ɔpʋ tɔá anɩ Wie Yesu lɛha mʋ asa Bulu lɛtɩ mʋ tsia. Mʋ́gyi tɔá ntɛbla ɔpasua kugyikʋ nɩ.

¹⁸ Nɩ ɔkʋ lɛtɩn kete asa Bulu lɛtɩ mʋ a, ɔmálayinki yɛbwɛ mʋ́ ɩwɩ tɔtɔɔtɔ. Nɩ ɔkʋ ɛ mɛtɩn kete asa Bulu lɛtɩ mʋ ɛ a, ɔmáyɛtɩn.

¹⁹ Ketetɩn ntɛ ketemátɩn megyi tɔtɔ. Bulu mbla amʋsʋ gyi mboun gyi asʋn.

²⁰ Ɔhagyiɔha otsia alɩá ogyi asa Bulu lɛtɩ mʋ.

²¹ Ɔkpábi fʋgyi asa Bulu lɛtɩ fʋ? Ɩmáhan fʋ. Tamɛ nɩ ɔkpa ɩba ánɩ́ fégyi ɩwɩ a, kʋsʋ mʋ́sʋ.

²² Tsufɛ nɩ ɔkpábi fʋgyi asa anɩ Wie lɛtɩ fʋ a, alaha fagyi ɩwɩ. Alɩ kɛn ɔha ánɩ́ otsie mʋ ɩwɩsʋ asa anɩ Wie lɛtɩ mʋ ɛ gyi ɔkpábi sei ha Kristo nɩ.

²³ Bulu lɔhɔ mlɩ ibia kpekplekpe. Ɩnɩ sʋ mlɩmábwɛ mlɩ ɩwɩ nkpábi ha anyankpʋsa.

²⁴ Mɩ apio, alɩágyialɩá ɔhagyiɔha gyi asa Bulu lɛtɩ mʋ a, ɔpʋ mʋ́ alɩ tsia.

Mbitebi Mʋ́a Asʋrapʋ

²⁵ Mlɩ mbitebiá mlɩmɔkʋtsia aklu kɩ mʋ́ a, mma mbla kʋkʋá itsu anɩ Wie wa ha mlɩ. Tamɛ anɩ Wie mʋa mʋ nwewun, alaha mɩ nyansa ánɩ́ mlɛ́talɩ hɔ mɩ gyi.

²⁶ Asʋn ánɩ́ ndɛ ha mlɩ gyi, ɔyɩtɔ lawa ɔnlɩn sei. Mʋ́ sʋ nahogyiá ɩbʋ alɛá ɔhagyiɔha obétsia alɩá otsie yaɩ.

²⁷ Nɩ fʋbʋ ɔka a, mákina mʋ. Nɩ kpankʋ fʋgyi ɛ a, mátepi tsia.

²⁸ Tamɛ nɩ fetsia ɔka a, fʋmɔkʋbwɛ lakpan. Nɩ obitebiá ɔmɔkʋtsia oklu kɩ ɛ otsia a, ɔmɔkʋbwɛ lakpan. Asʋn wunhɛá ɩbɛ́ba tɛkɩ ndetsu kʋsʋ aklu mʋ́a akasʋ. Mʋ́ sʋ ndɛ ɩnɩ blɩ.

²⁹ Mɩ apio, mʋ́á ndɛblɩ gyi, brɛ itinbi ɩlasi. Ɩnɩ sʋ tsu sei a, ɔha ánɩ́ ɔbʋ ɔka ɔbwɛ fɛ ɔha ánɩ́ ɔma.

³⁰ Ɔsɩn igyi o, ɔdwɛ igyi o, ɩwɩnya igyi o, ɔbwɛ ɩwɩ fɛ asʋansʋ mɛdɩn mʋsʋ.

³¹ Aha ánɩ́ bʋdɛ ɔyɩ anfɩtɔ atɔ pʋbwɛ tɔkʋ bʋmápʋ amʋ́ ansɩ fɛ́ɛ́ dɩnka mʋ́sʋ. Tsufɛ ɔyɩ anfɩ pʋ́ mʋ́tɔ atɔ fɛ́ɛ́ bɛ́ba bɔtsʋn.

³² Mmedekleá asʋn ɩhan mlɩ. Ɔha ánɩ́ ɔma ɔka tɔpʋ mʋ ansɩ dɩnka anɩ Wie agyʋmasʋ, mɛnɩ obégyi mʋ ansɩ.

³³ Tamɛ ɔka mʋ wie mʋ́ tɔpʋ ansɩ dɩnka ɔyɩtɔ atɔsʋ, mɛnɩ obégyi mʋ ka ansɩ.

³⁴ Mʋ́ sʋ mʋ agywɩɩn tɔbwɛ anyɔ. Alɩ kɛn ɔtsɩ kpankʋ ɛ tesi mʋ ɩwɩ ha anɩ Wie, ɔyʋlʋ mʋ́a ɔŋɛtɔ fɛ́ɛ́, mɛnɩ obégyi Bulu ansɩ nɩ. Tamɛ oklu mʋ wie mʋ́ tɔpʋ mʋ ansɩ dɩnka ɔyɩtɔ atɔsʋ, mɛnɩ obégyi mʋ klu ansɩ.

³⁵ Mlɩ yile sʋ ndɛ asʋn anfɩ blɩ. Mmɛdɛ mlɩ itin ka. Mboun ndekleá mlɩbwɛ tɔá ɩda ɔkpa, amlɩsi mlɩ ɩwɩ fɛ́ɛ́ ha anɩ Wie Yesu.

³⁶ Nɩ oyin ɔfɩtɛ ɔtsɩsʋ, owun ánɩ́ ɔmɛ́ɛtalɩ kɩta ɩwɩ, ɔtsɩ amʋ ɛ dekle ɔdan tsʋn a, ɔyɛkpaɩn mʋ. Megyi lakpan igyi.

³⁷ Tamɛ nɩ ɔlabwɛ agywɩɩn ánɩ́ oméetsia mʋ, ɔbɛ́talɩ kɩta ɩwɩ tsia kpankʋ a, ɔbʋ ɔkpa bwɛ tɔá odekle. Nɩ ɔbɛ́talɩ kɩta ɩwɩ a, mʋmʋ ɔkɩta ɩwɩ. Ɩbʋ alɛ dʋn.

³⁸ Ɩbʋ alɛá obétsia ɔka. Tamɛ nɩ ometepi tsia a, ɩbʋ alɛ dʋn.

³⁹ Mbla lɛklɩ ɔtsɩ, ánɩ́ oméekina mʋ klu yɔfʋn mʋ owukɛ. Tamɛ nɩ oyin amʋ owu a, ɔbʋ ɔkpa tsia oyin ánɩ́ odekle. Tamɛ ilehian ánɩ́ ɔha amʋ ɔbɔ́bwɛ Okristoyin.

⁴⁰ Mɩ nkʋlɛ sʋ mʋ́ a, nɩ otsie kpankʋ a, ansɩ bégyi mʋ dʋn. Nyin ánɩ́ Bulu Ɔŋɛ amʋʋ ɩbʋ mɩtɔ amʋ sʋ natalɩ ndɛ mlɩ asʋn anfɩ bla.