1 Korintofɔ 4 - Bulu Ntam Pɔpwɛ mʋ́a Israel Ɩlʋ

Kristo Sumbi Ayɔpʋ

¹ Ɩnɩ sʋ ɔhagyiɔha otsu mʋ́á Kristo asumbi kɛkɛ mɩa Apolo anɩgyi, Bulu lapʋ mʋ asʋn ŋainhɛ amʋ agyʋma wa anɩ ɩbɩtɔ.

² Tɔá ɩhɩɛ dehian gyi, ɔha ánɩ́ bapʋ agyʋma wa mʋ ɩbɩtɔ obégyi ɔnɔkwalɩ.

³ Mɩ mʋ́ a, nɩ mlɩtɔ akʋ ntɛ aha bamba bʋdɛ mɩ pɔn ha kʋraa a, imegyi tɔtɔ mɩ ansɩtɔ. Mɩ onuto o mmɔkʋha ɩwɩ pɔn ntɛ asʋ.

⁴ Nyin mɩ klʋntɔ, tamɛ imosuna ánɩ́ mɩ asʋn da ɔkpa. Anɩ Wie Yesu gyi mɩ asʋn ogyipʋ.

⁵ Ɩnɩ sʋ mlɩmákɔsɩ lɛ mlɩ aba ɩla, kpɛfʋn anɩ Wie ɔbakɛ amʋ. Mʋ ɔbɔ́wankɩ wʋlɩ okluntɔ atɔsʋ, lɛ anɩ agywɩɩn ɔwan, asa Bulu ɔbɛ́kanfʋ ɔhagyiɔha alɩá ilehian nɩ.

⁶ Mɩ apio, mlɩ sʋ ndɛpʋ mɩa Apolo tsiatɔ suna mlɩ atɔ, mɛnɩ mlónu mʋ́ amʋʋ aha bʋtɛblɩ bɛɛ, “Mlɩmányankɩ tɔá bɔwanlɩn tswɩsʋ” amʋ asɩ. Fówun mlɩmóowun ɔhaa tsu ɩwɩ.

⁷ Ma lɛbla fʋ ɔbɛɛ, fʋdʋn ɔkʋ? Ntɔ fʋbʋá imegyi Bulu lɛha fʋ? Nɩ Bulu lɛha fʋ togyitɔ a, ntogyi sʋ fʋdɛ ɩwɩ tsu fɛ megyi ha bɛha fʋ?

⁸ Mlɩdɛkɩá mlɩlamwɛ! Mlɩlanya ɩwɩ! Mlɩlawuna mlɩdɛ iwie gyi. Mɩ sʋ mʋ́ a, tɛkɩ mlɩdɛ iwie amʋ gyi lɛlɛ, mɛnɩ anɩa mlɩnyɔ abégyi iwie amʋ.

⁹ Ɩdɛ mɩ bwɛ fɛ Bulu laha anɩ sumbi ayɔpʋ anfɩ anɩlabwɛ ɔma agyapʋ fɛ ndoun bakpa bɔyɔmɔ. Tsufɛ anɩlamli atɔ kɩhɛ ha ɔyɩtɔ fɛ́ɛ́, Bulu-abɔpʋ mʋ́a anyankpʋsa fɛ́ɛ́.

¹⁰ Kristo sʋ anɩlabwɛ aha mimlahɛ, mlɩ mʋ́ mlɩlatɩn ansɩ. Anɩgyi apɔnpʋ, mlɩ mʋ́ mlɩbʋ ɔwʋnlɩn. Aha bʋdɛ mlɩ bu, anɩ mʋ́ ɔhaa tamabu anɩ. Megyi alɩ mlɩdɛ anɩ kɩ nɩ? Ntɛ megyi alɩ?

¹¹ Bɔfʋn sei a, akʋn mʋ́a ɔmɛwʋlɩ dɛ anɩ, atatidatɔ anɩda. Bʋdɛ anɩ atswɛ fʋlɩ, anɩmá ɔdɩkpa.

¹² Anɩtɛyɩrɩ ɩwɩ pʋ anɩ ɩbɩ yɔ agyʋma pʋnya anɩ atohianhɛ. Nɩ bɔlwɩɩ anɩ a, anɩtoyula amʋ́. Nɩ bʋdɩn anɩsʋ ɛ a, anɩtotomi.

¹³ Nɩ bɛblɩ anɩ ɩwɩ asʋn lalahɛ a, anɩtɔpʋ ɔdwɛ lɛ mʋ́ ɔnɔ. Bɔfʋn sei a, anɩlabwɛ wuna, bʋdɛ ipi pʋtsitsa anɩsʋ ɔyɩ anfɩtɔ.

¹⁴ Mmɛdɛ ɩnɩ wanlɩn pʋsʋpa mlɩ, mboun ndɛpʋtɔɩ kpla mlɩ fɛ mɩ abi adwɛpʋ.

¹⁵ Tsufɛ nɩ aha mpɩm-du (10,000) losuna mlɩ Kristo ɩwɩ asʋn kʋraa a, ɔbakʋlɛ pɛ abi mlɩgyi ɔŋɛtɔ. Nɔbwɛ mlɩ sɩ Kristo Yesutɔ brɛá nɛda asʋn wanklaan amʋ ɔkan suna mlɩ.

¹⁶ Mʋ́ sʋ ndɛ mlɩ kokoli, mlɩkasɩ mɩ tsiatɔ.

¹⁷ Ɩnɩ sʋ ndɛ Timoteo wa sɩsɩ mlɩ. Mɩ bi nɩ, ntɔdwɛ mʋ. Ɔbʋ ɔnɔkwalɩ Kristotɔ. Mʋ ɔbɛ́ba bɛkaɩn mlɩ tsiatɔ oduá nɔpʋ mbuo Kristo, ndɛpʋsuna ɔpasua kugyikʋá ɩbʋ ɔtɩnɛgyiɔtɩnɛ nɩ.

¹⁸ Mlɩtɔ akʋ bʋdɛ ɩwɩ tsu. Bʋkɩ bɛɛ, fialɩ mmɛ́ɛtra ba mlɩ wa ɛkɛkɛɛkɛ.

¹⁹ Tamɛ nɩ anɩ Wie Yesu lotsula a, ɩmɔ́ɔwa ɔpá kʋkʋ nɛ́ba mlɩ wa bɛkɩ bɛɛ, asʋn kɛkɛ ɩwɩ atsupʋ anfɩ bʋdɛblɩ loo, ntɛ lɛlɛ bʋbʋ Bulu tumi.

²⁰ Tsufɛ megyi asʋn blɩhɛ kɛkɛ Bulu iwiegyi amʋ igyi, mboun Bulu tumi.

²¹ Nɩ nɛba mlɩ wa a, ntɔ mpʋba? Mpʋ mplɩ ba loo, ntɛ ɔdwɛ mʋ́a ɩklʋn lwiihɛ?