1 Korintofɔ 3 - Bulu Ntam Pɔpwɛ mʋ́a Israel Ɩlʋ

Bulu Asumpʋ

¹ Apio, brɛá nɛba mlɩ wa a, mmɛtalɩ tɔɩ mlɩ ansɩtɔ fɛ aha ánɩ́ Ɔŋɛ Wankɩhɛ bʋ amʋ́tɔ. Nɛbla mlɩ asʋn fɛ aha ánɩ́ amʋ́ agywɩɩn ɩdɩn ɔyɩ anfɩtɔ atɔsʋ, bʋmɔkʋdan Kristotɔ.

² Nyɔpʋ-ntsu nɛha mlɩ. Mmɛha mlɩ atogyihɛ onuto. Alɩ brɛ amʋtɔ a, mlɩmɔkʋfʋn atogyihɛ onuto gyi.

³ Tsufɛ ɔyɩ anfɩtɔ tsiatɔ ɩtra bʋ mlɩtɔ. Mlɩdɛ aba lu, mlɩdɛtrɛ. Nɩ mlɩdɛ ɩnɩ bwɛ mɛ, imosuna ánɩ́ mlɩ agywɩɩn tra dɩn ɔyɩ anfɩtɔ atɔsʋ, mlɩgyi fɛ ɔmátɔfɔ?

⁴ Mlɩtɔ akʋ mlɩaa, “Paulo anɩbuo.” Mlɩtɔ akʋ ɛ mlɩaa, “Apolo anɩbuo.” Mbɛɛ, ɩnɩ medesuna ánɩ́ mlɩgyi fɛ ɔmátɔfɔ?

⁵ Mbɛɛ, ma gyi Apolo, ntɛ ma gyi Paulo, sʋ mlɩdɛtrɛ anɩ sʋ? Bulu asumpʋ kɛkɛ anɩgyi, mlɩlatsʋn anɩ ɩbɩtɔ mli mʋ ahogyipʋ. Anɩtɔ okugyiɔkʋ legyi gyʋma ánɩ́ Bulu lɛha mʋ.

⁶ Mɩlodu, Apolo lɔwʋlɩ mʋ́ ntsu, tamɛ Bulu lɛha mʋ́ ɩlɛdan.

⁷ Megyi odupʋ mʋ́a ntsu ɔwʋlɩpʋ lɔbwɛ tɔtɔ. Bulu nkʋlɛ tɔbwɛ, tsufɛ mʋtɛha mʋ́ ɩtɛdan.

⁸ Odupʋ mʋ́a ntsu ɔwʋlɩpʋ fɛ́ɛ́ bʋgyi kɛkɛ Bulu ansɩtɔ. Ɔbɛ́ka okugyiɔkʋ ɩkɔ mʋ bwɛhɛ ɔnɔ.

⁹ Agyʋma ayɔpʋ mɩa Apolo anɩgyi ha Bulu. Mlɩgyi Bulu ndɔ, mlɩgyi mʋ obu ɛ nɩ.

¹⁰ Bulu lɔwa awɩtɔlɛ ha mɩ, bwɛ mɩ obu oyipʋ ɔtɩansɩpʋ. Mʋ́ sʋ nɔpʋ abwi wa obu amʋ ntswɩasɩ, aha bamba bɛtalɩ bʋdɛpwɛ dɩnka mʋ́sʋ nɩ. Tamɛ ɔhagyiɔha ɔkɩ wanklaan obu amʋ pwɛtɔ.

¹¹ Tsufɛ ɔhaa mɛ́ɛtalɩ wa ntswɩasɩ bamba dʋn mʋ́ amʋʋ ɩda yaɩ, igyi Yesu Kristo amʋ.

¹² Nɩ ɔkʋ ɔpʋ sika pɛpɛ o, sika fututu o, abwiá ɩbʋ bia o, nyi o, afɩta ntɛ ipi yi dɩnka ntswɩasɩ amʋsʋ a,

¹³ ɔbɩ ánɩ́ kugyikʋ ɩbɛ́lɩn ɔwan ɛkɛ amʋʋ Bulu obégyi anɩ asʋn amʋ. Ogya ɔbɔ́pʋsɔ mʋ́ kɩ bɛɛ, ɔlɔbwɛ mʋ́ wanklaan.

¹⁴ Nɩ ogya amʋ mɔhɔ obu amʋ yinta a, Bulu ɔbɛ́da mʋ ɩpan.

¹⁵ Tamɛ nɩ obu amʋ ɩlɔhɔ a, ɔbɛ́hɩɛ hʋlɩ atɔ. Bulu ɔbɔ́hɔ mʋ nkpa, tamɛ obófuflu fɛ ɔha ánɩ́ alasrɩ dalɩ ogya plɛnplɛntɔ.

¹⁶ Mlɩmeyin ánɩ́ Bulu ɔtswɛkpa mlɩgyi, Bulu Ɔŋɛ amʋ tsie mlɩtɔ?

¹⁷ Ɔhagyiɔha ánɩ́ oleyinta mʋ ɔtswɛkpa a, Bulu ɛ obéyinta mʋ, tsufɛ Bulu ɔtswɛkpa lɔwankɩ. Mʋ ɔtswɛkpa amʋ gyi mlɩ a.

¹⁸ Ɔhaa mámlɛ mʋ ɩwɩ! Nɩ mlɩtɔ ɔkʋ dɛ mʋ ɩwɩ tɩ ɔtɩansɩpʋ ndɛ ɔyɩ anfɩtɔ a, ilehian ánɩ́ ɔbɔ́bwɛ mʋ ɩwɩ ɔha mimlahɛ, mɛnɩ ɔbɔ́bwɛ ɔtɩansɩpʋ onuto.

¹⁹ Tsufɛ ɔyɩ anfɩtɔ ansɩtɩn igyi mimlala Bulu ansɩtɔ. Fɛ alɩá bɔwanlɩn wa Bulu asʋn wanlɩnhɛ amʋtɔ bɛɛ, “Ɔtɩansɩpʋ agywɩɩn lalahɛ Bulu tɔpʋkɩta mʋ.”

²⁰ Bulu asʋn wanlɩnhɛ amʋ lɛtra blɩ ɔbɛɛ, “Bulu yin ánɩ́ ɔtɩansɩpʋ agywɩɩn itepi ma labi.”

²¹ Ɩnɩ sʋ ɔhaa mápʋ ansɩ dɩnka ɔhaasʋ tsu ɩwɩ. Mlɩbʋ togyitɔ.

²² Paulo o, Apolo o, Petro o, ɔyɩ anfɩ o, nkpa ntɛ lowu o, ndɛ o, ɔkɛ o, mlɩbʋ mʋ́ fɛ́ɛ́.

²³ Kristo bʋ mlɩ, Kristo ɛ gyi Bulu klɛ.