1 Korintofɔ 2 - Bulu Ntam Pɔpwɛ mʋ́a Israel Ɩlʋ

Kristo Da Manta Oyikpalihɛsʋ

¹ Mɩ apio, brɛá nɛba bɛda Bulu asʋn ŋainhɛ amʋ ɔkan suna mlɩ a, mmɔpʋ ɔnɔwankɩ ntɛ nyansa kʋkʋ bɛbla mlɩ Bulu asʋn amʋ.

² Tsufɛ brɛá mbʋ mlɩ wa a, nɔbwɛ agywɩɩn ánɩ́ nɔ́tɔɩ tsu Yesu Kristo pʋ́ mʋ oyikpalihɛsʋ lowu nkʋlɛ ɩwɩ.

³ Brɛá nɛba a, mɩ awutɔ yɔyɔɔyɔ. Ifu dɛ mɩ, ndɛkpɩnkɩ.

⁴ Megyi mɩ nyansa pʋ́ mɩ ɔnɔwankɩ nɔpʋda asʋn amʋ ɔkan suna mlɩ. Mboun Ɔŋɛ Wankɩhɛ amʋ tumi lɛha asʋn amʋ ɩlɔwankɩ mlɩ.

⁵ Ɩlɛba alɩ, mɛnɩ mlénya mlɩ hogyi tsu Bulu tumitɔ, megyi nyankpʋsa nyansatɔ.

Bulu Nyansa

⁶ Tamɛ nɩ nowie aha ánɩ́ badan hogyi amʋtɔ wa a, ntɔpʋ Bulu nyansa bla amʋ́ asʋn amʋ. Megyi ndɛ ɔyɩkɛhɛtɔ nyansa, ntɛ ɔyɩ anfɩtɔ ɩsʋ agyipʋá bɛ́ba bɔhʋlɩ amʋ́ tumi klɛ.

⁷ Nyansa anfɩ anɩdɛ mʋ́ ɩwɩ asʋn blɩ anfɩ igyi nyansa ánɩ́ Bulu lɔpʋŋain asa ɔyɩ lɛbɛlɩn, ánɩ́ ɔbɔ́pʋwa anɩ numnyam.

⁸ Ɔyɩ anfɩtɔ otumipʋ ɔkʋkʋ mɛbɩ nyansa anfɩ. Nɩ bɛbɩ mʋ́ a, tɛkɩ bʋmɛda anɩ Wie Onumnyampʋ amʋ manta oyikpalihɛsʋ.

⁹ Tamɛ fɛ alɩá bɔwanlɩn wa Bulu asʋn amʋtɔ a, “Tɔá ansibi mɔkʋwun kɩ, asʋ mɔkʋnu kɩ, ɩmɔkʋba nyankpʋsa agywɩɩntɔ ɛ kɩ a, mʋ́ Bulu lala yaɩ ha mʋ adwɛpʋ nɩ.”

¹⁰ Tamɛ anɩlabɩ ɩnɩ, tsufɛ alalɛ mʋ́ suna anɩ tsʋn mʋ Ɔŋɛ Wankɩhɛ amʋsʋ. Ɔŋɛ amʋ tokwi togyitɔtɔ kɩ, ɔtɛlɛ Bulu asʋn ŋainhɛá ɩbʋ ɔtɔtɔɔtɔ kʋraa suna anɩ.

¹¹ Ɔhaa tamawun mʋ ba nwuntɔ, nkɛtɩ mʋ onuto ɔŋɛ. Alɩ kɛn Bulu Ɔŋɛ amʋ nkʋlɛ towun Bulu nwuntɔ nɩ.

¹² Anɩ mʋ́ a, Bulu lɔpʋ mʋ Ɔŋɛ wa anɩtɔ, megyi ɔyɩ anfɩtɔ ɔŋɛ bʋ anɩtɔ. Mboun Ɔŋɛá itsu Bulu wa, mɛnɩ abɛ́talɩ nu ɩtɔ amʋʋ Bulu lapʋkie anɩ faan amʋ asɩ.

¹³ Mʋ́ sʋ megyi anɩ onuto nyansa asʋn anɩdɛ mlɩ bla. Mboun asʋn ánɩ́ itsu Ɔŋɛ Wankɩhɛ amʋ wa. Mʋ́ anɩdɛpʋlɛ Ɔŋɛtɔ ɔnɔkwalɩ asʋn asɩ nɩ.

¹⁴ Ɔha ánɩ́ ɔma Ɔŋɛ Wankɩhɛ mɛ́ɛtalɩ hɔ tɔá itsu Bulu Ɔŋɛ amʋ wa, tsufɛ igyi mimlala mʋ wa. Ɔha ánɩ́ Ɔŋɛ Wankɩhɛ bʋ mʋtɔ tonu asʋn ánɩ́ Ɔŋɛ amʋ dɛblɩ asɩ.

¹⁵ Mʋtɛtalɩ tɛtɛ togyitɔtɔ nu mʋ́ asɩ. Tamɛ mʋ mʋ́ a, ɔhaa mɛ́ɛtalɩ tɛtɛ mʋ asʋntɔ, nu mʋ asɩ ɛkɛkɛɛkɛ.

¹⁶ Nkalɩ ɩbɔ́bwɛ asa bɛ́talɩ nu mʋ́ asɩ? Igyi fɛ alɩá Bulu asʋn wanlɩnhɛ amʋ lɛblɩ ɔbɛɛ, “Ma ɔbɛ́talɩ bɩ anɩ Wie agywɩɩn? Ma ɔbɛ́talɩ suna mʋ asʋn?” Tamɛ Kristo agywɩɩn bʋ anɩtɔ. Mʋ́ sʋ anɩ mʋ́ abɛ́talɩ bɩ mʋ agywɩɩn.