1 Korintofɔ 16 - Bulu Ntam Pɔpwɛ mʋ́a Israel Ɩlʋ

Ɩtswɩtswɩ Ha Yerusalem Ahianfɔ

¹ Ɩtswɩtswɩ ha Bulu aha ánɩ́ bʋbʋ Yerusalem asʋn amʋ ɛ a, mlɩbwɛ mʋ́ fɛ alɩ amʋʋ nɛbla ɔpasua amʋʋ ɩbʋbʋ Galatia ɔmátɔ mbɛɛ, bʋbwɛ mʋ́ amʋ.

² Ɔhagyiɔha ɔkɩ mʋ kɔba alɩá otenya ɔnɔ, ɔlɛ kʋ yaɩ Kwasiedagyikwasieda. Mlɩmágyo mlɩaa, mba asa amlɩtswɩtswɩ mʋ́.

³ Nɩ nɛba a, nɔ́wanlɩn nwʋlʋ ha aha ánɩ́ mlɩ onuto mlɛ́lɛ mlɩaa, bʋpʋ atɔ amʋ ya Yerusalemfɔ, pʋlɛ amʋ́ suna amʋ́.

⁴ Nɩ ɩbʋ alɛá nɔ́yɔ a, mʋmʋ bóbuo mɩ yɔ.

Paulo Ɔkpatu Nhɩhɩɛ

⁵ Nɩ nɔkʋsʋ tsu Makedonia a, nɛ́ba mlɩ wa, tsufɛ ndekleá nɔ́tsʋn ɩnʋ asa nɛba.

⁶ Fialɩ nétsia mlɩ wa kpalobi. Fialɩ kʋraa nétsia ɩnʋ nyankpʋ mʋ́a atsalɩ brɛ amʋ fɛ́ɛ́, fówun mlɩlasi mɩ ɔkpa nayɔ ɔtɩnɛgyiɔtɩnɛá nɔ́yɔ.

⁷ Sei mʋ́ a, mmedekleá nɛ́ba bɛka tsʋn mlɩ wa kɛkɛ. Nɩ Bulu lotsula a, nétsia mlɩ wa kpalobi.

⁸ Tamɛ nétsia Efeso nfɩ kpɛfʋn Pentekoste ɛkɛ amʋ.

⁹ Tsufɛ ɔkpa kpɔnkpɔntɩ lafinki ha mɩá nɔ́yɔ agyʋma ánɩ́ ɩbɔ́wa labi. Ɩbʋ mʋ́tɔá mɩ alupʋ tsɔtsɔɔtsɔ bʋbʋ nfɩ mʋ́.

¹⁰ Nɩ Timoteo owie mlɩ wa a, mlɩmáha ifu ɩkɩta mʋ. Tsufɛ anɩ Wie agyʋma amʋ kɛn ɔdɛyɔ fɛ mɩ.

¹¹ Mlɩmáha ɔhaa ɔkɩ mʋ ansɩtɔ kotikoti. Mlɩsi mʋ ɔkpa wanklaan oyinki bɔtʋ mɩ, tsufɛ ntsie ngyo mʋa anɩ apio atrahɛ amʋ.

¹² Anɩ pio Apolo asʋn amʋ a, nalɩɩ mʋsʋ mbɛɛ, obuo apio amʋ ba mlɩ wa, tamɛ omedekleá ɔbɛ́ba sei. Nɩ onya ɔkpa a, ɔbɛ́ba.

Asʋn Trahɛ

¹³ Mlɩda ɩwɩsʋ, amlɩlɩɩ kinkiinkin mlɩ hogyitɔ. Mlɩwa klʋn, amlɩwa ɩwɩ ɔwʋnlɩn.

¹⁴ Mlɩpʋ ɔdwɛ bwɛ mlɩ togyitɔ.

¹⁵ Mɩ apio, mlɩyin ánɩ́ Stefana mʋa mʋ woyitɔ aha gyi agyankpapʋá bɛdamli klʋntɔ Akaia nsaɩntɔ. Basi ɩwɩ ha, bʋdɛ Bulu aha amʋ sum.

¹⁶ Nokokoli mlɩ, mlɩba ɩwɩasɩ ha amʋ́a aha ánɩ́ bɛ́ba bɛtsɩa amʋ́tɔ, bɔ́pʋ nsi yɔ agyʋma amʋ.

¹⁷ Ansɩ lagyi mɩ ánɩ́ Stefana mʋa Fortunato pʋ́ Akaiko baba mɩ wa. Tsufɛ bʋdɛ mlɩ ɔbwɛkpa bwɛ.

¹⁸ Bawa mɩ atɛtɔ-ɔnlɩn wanklaan, fɛ alɩ amʋʋ bɔwa mlɩ amʋ. Mlɩbu aha anfɩ odu.

¹⁹ Ɔpasua amʋʋ ɩbʋ Asia amʋ fɛ́ɛ́ bʋdɛ mlɩ tsia ha. Akwila mʋa Priska pʋ́ ɔpasua amʋʋ ɩbʋ amʋ́ woyitɔ amʋ ɛ bɛha mlɩ tsia wanklaan anɩ Wie ɩdatɔ.

²⁰ Apio aba amʋ fɛ́ɛ́ bɛha mlɩ itsia gyagyagya. Mlɩlata aba puta Kristotɔ.

²¹ Mɩ Paulo onuto lapʋ mɩ ɩbɩ wanlɩn ɩnɩ, ndɛpʋha mlɩ tsia.

²² Nɩ ɔkʋ tamadwɛ anɩ Wie Yesu a, ɩlwɩɩ dɩn mʋsʋ! Marana-ta! (Mʋ́ asɩ gyi, “Anɩ Wie, ba!”)

²³ Anɩ Wie Yesu Kristo ogyi mlɩ bʋalɛ.

²⁴ Anɩa anɩ Wie Kristo Yesu ɩkʋlɛbwɛ sʋ ntɛhɩɛ dwɛ mlɩ fɛ́ɛ́. Amen!