1 Korintofɔ 15 - Bulu Ntam Pɔpwɛ mʋ́a Israel Ɩlʋ

Kristo Kʋsʋ tsu Afulitɔ

¹ Mɩ apio, sei a, nkaɩn mlɩ asʋn wanklaan amʋʋ nɛda mʋ́ ɔkan suna mlɩ, mlɩlɔhɔ mʋ́sʋ gyi, mlɩ hogyi ɩlɩɩ mʋ́sʋ amʋ.

² Asʋn anfɩ ɔbɛ́ha mlɩ nkpa ánɩ́ ɩtamata, nɩ lɛlɛ mlɩlɔhɔ mʋ́sʋ gyi nɩ. Tamɛ nɩ mlekina mʋ́sʋ hogyi mʋ́ a, mlɩ hogyi labwɛ kpaalɩ!

³ Tsufɛ asʋn ánɩ́ ɩhɩɛ dehian bɔpʋha mɩ nɔpʋba mlɩ igyi. Mʋ́gyi, Kristo lobowu anɩ lakpan sʋ, fɛ alɩá Bulu asʋn wanlɩnhɛ amʋ lɛblɩ.

⁴ Bopula mʋ, Bulu lɔkʋsʋa mʋ tsu afulitɔ ɛkɛ sasɩ fɛ alɩá Bulu asʋn wanlɩnhɛ amʋ ɩlɛblɩ.

⁵ Ɔlɛlɛ ɩwɩ ɔwan suna Petro. Mʋ́ ɔma a, ɔlɛlɛ ɩwɩ ɔwan suna sumbi ayɔpʋ duanyɔ amʋ fɛ́ɛ́.

⁶ Ɩnɩ ɔma a, ɔlɛlɛ ɩwɩ ɔwan suna mʋ abuopʋ tsɔtsɔɔtsɔá bʋdʋn aha lafanu (500) ɔtsawʋlɛ. Amʋ́tɔ akʋ bawu, tamɛ ɔdʋdʋɔ bʋtra bʋtsie nkpa.

⁷ Ɔlɛlɛ ɩwɩ ɔwan suna Yakobo ɛ. Ɔma a, ɔlɛlɛ ɩwɩ ɔwan suna sumbi ayɔpʋ amʋ fɛ́ɛ́.

⁸ Ɩtrahɛ-trahɛ a, ɔlɛlɛ ɩwɩ ɔwan suna mɩ onuto anfɩ nesin ɔma ba anfɩ.

⁹ Tsufɛ mɩgyi sumbi ayɔpʋ amʋtɔ ɔkʋsʋ nɩ. Tɛkɩ mmɔfʋn ánɩ́ bɛ́tɩ mɩ sumbi ɔyɔpʋ kʋraa, tsufɛ nɛdɩnka Bulu ɔpasua amʋsʋ.

¹⁰ Tamɛ Bulu awɩtɔlɛ sʋ ndɛ namli alɩ. Mʋ awɩtɔlɛ amʋ ɩmɔbwɛ kpaalɩ. Tsufɛ nayɔ agyʋma dʋn amʋ́tɔ okugyiɔkʋ. Tamɛ megyi mɩ ɔwʋnlɩn nɔpʋyɔ mʋ́. Mʋ awɩtɔlɛ amʋ dɛ mɩ kpa.

¹¹ Ɩnɩ sʋ nɩ mɩlɛtra da asʋn amʋ ɔkan o, amʋ́ o, mʋ́á idehian gyi mlɩlɔhɔ anɩ asʋn amʋsʋ gyi.

Anɩ Kʋsʋ Tsu Afulitɔ

¹² Nɩ anɩtɛda Bulu asʋn amʋ ɔkan anɩaa, Bulu lɔkʋsʋa Kristo tsu afulitɔ a, ntogyi sʋ mlɩtɔ akʋ mʋ́ bɛɛ, awupʋ bʋmɔ́ɔkʋsʋ tsu afulitɔ?

¹³ Nɩ awupʋ bʋmɔ́ɔkʋsʋ mʋ́ a, idesuna ánɩ́ Bulu mɔkʋsʋa Kristo ɛ.

¹⁴ Nɩ Kristo mɔkʋsʋ tsu afulitɔ a, tɛkɩ anɩ asʋn wanklaan amʋ ɔkanda igyi kpaalɩ. Mlɩ mʋ́sʋ hogyi ɛ igyi kpaalɩ.

¹⁵ Nɩ Bulu tamakʋsʋa awupʋ mʋ́ a, mʋmʋ afunu anɩdɛwa tɩn Bulu ɔnɔ, blɩ anɩaa alakʋsʋa Kristo tsu afulitɔ. Nɩ ɔtamakʋsʋa awupʋ a, mʋmʋ asʋn anfɩ ɩma mʋ́tɔ.

¹⁶ Nɩ ɔmɔ́ɔkʋsʋa amʋ́ mʋ́ a, mʋmʋ ɔmɔkʋsʋa Kristo ɛ nɩ.

¹⁷ Nɩ ɔmɔkʋsʋa Kristo a, mʋmʋ kpaalɩ mlɩlahɔ mʋ gyi. Idesuna ánɩ́ mlɩlasin lakpantɔ.

¹⁸ Mʋmʋ ɩtra desuna ánɩ́ Kristo ahogyipʋá bawu ɛ bafwɩ.

¹⁹ Nɩ ɔyɩ anfɩtɔ nkpa nkʋlɛsʋ anɩ ansɩdɩn Kristosʋ mʋ́ a, mʋmʋ anɩ ɩla bʋ nwɛ dʋn ɔhagyiɔha.

²⁰ Tamɛ ɔnɔkwalɩá ɩda gyi, Bulu lakʋsʋa Kristo tsu afulitɔ. Kristo labwɛ aha ánɩ́ Bulu ɔbɔ́kʋsʋatɔ ogyankpapʋ.

²¹ Alɩ amʋʋ lowu lɛba tsʋn nyankpʋsasʋ amʋ a, alɩ kɛn kʋsʋ tsu afulitɔ ɛ ɩlɛba tsʋn nyankpʋsasʋ nɩ.

²² Tsufɛ alɩ amʋʋ aha bʋtowu amʋ́a Adam ɩkʋlɛbwɛ sʋ amʋ a, alɩ kɛn amʋ́a Kristo ɩkʋlɛbwɛ sʋ amʋ́ fɛ́ɛ́ bénya nkpa nɩ.

²³ Tamɛ anɩtɔ okugyiɔkʋ bʋ mʋ brɛ. Kristo Bulu legyankpa kʋsʋa tsu afulitɔ. Nɩ Kristo oyinki ba a, mʋ ɛ ɔbɔ́kʋsʋa mʋ aha fɛ́ɛ́.

²⁴ Mʋ́ ɔma a, Kristo obégyi ɔŋɛtɔ tumi lalahɛ, iwiegyi pʋ́ tumiá ɩdɛ ɔyɩsʋ gyi fɛ́ɛ́sʋ asa ɔyɩ ɔbɔ́mɔ ɔnɔ. Mʋ́ ɔma a, obéyinkia iwiegyi amʋ wa anɩ Sɩ Bulu ɩbɩtɔ.

²⁵ Tsufɛ ilehian ánɩ́ Kristo obégyi iwie kpɛfʋn brɛá alagyi mʋ alupʋ fɛ́ɛ́sʋ, pʋ mʋ ayabi tsa amʋ́sʋ.

²⁶ Olupʋ trahɛá ɔbɛ́hɩ gyi lowu.

²⁷ Tsufɛ Bulu asʋn wanlɩnhɛ amʋ ɩlɛblɩ ɔbɛɛ, “Bulu lɔpʋ togyitɔ wa mʋ asɩ.” Ɩnɩ imosuna ánɩ́ Bulu bʋ Kristo asɩ.

²⁸ Nɩ Kristo ogyi togyitɔsʋ ta a, ɔbɔ́pʋ ɩwɩ wa Bulu asɩ. Mʋlɛha mʋ tumi dɩnka togyitɔsʋ, fówun Bulu ɛ obégyi togyitɔá ɩbʋ ɔtɩnɛgyiɔtɩnɛsʋ.

²⁹ Nɩ Bulu mɔ́ɔkʋsʋa awupʋ a, ntogyi sʋ aha bʋdɛ asu bɔ ha aha ánɩ́ bawu? Ntogyi sʋ bɛ́ha bɔ́bɔ amʋ́ asu ha amʋ́?

³⁰ Ntɛ ntogyi sʋ anɩ mʋ́ abɔ́pʋ anɩ nkpa plei bregyibrɛ?

³¹ Mɩ apio, nɛkasɛ, ntefia alowusʋ ekekegyiɛkɛ! Igyi tɔá ntɔpʋtsu ɩwɩá mlɩa anɩ Wie Kristo Yesu mlɩlabwɛ ɩkʋlɛ.

³² Mʋ́ sʋ kpaalɩ nɔkɔ Efesofɔá bʋgyi fɛ mbwɩkɩta-atɔ? Nɩ Bulu mɔ́ɔkʋsʋa awupʋ mʋ́ a, “Mʋmʋ mlɩha agyi, awɩ, anun, tsufɛ ɔkɛ sɛsɛbrɛ anɩlawu.” Fɛ alɩá bɔwanlɩn wa Bulu asʋn amʋtɔ.

³³ Mlɩmáha aha ánɩ́ bʋtɛblɩ asʋn anfɩ odu abʋmlɛ mlɩ! Tsufɛ ahandɛ bɛɛ, “Mba lalahɛ gyi teyinta ɔha.”

³⁴ Mlɩlabwɛ agywɩɩn wanklaan, amlɩsi lakpan bwɛ. Tsufɛ mlɩtɔ akʋ bʋtepi bʋmeyin Bulu. Ndɛ asʋn anfɩ wanlɩn sɩsɩ mlɩ pʋsʋpa mlɩ.

Ɔyʋlʋá Abɔ́pʋkʋsʋ Tsu Afulitɔ

³⁵ Ɔkʋ ɔbɛ́fɩtɛ ɔbɛɛ, “Nkalɩ Bulu ɔbɔ́kʋsʋa awupʋ? Ɔyʋlʋ mɔmʋ bɔ́pʋkʋsʋ?”

³⁶ Ɔha mimlahɛ! Bɩá nɩ fodu atɔ-abi a, ɩtɔplɔ asa ɩtɔkwɛ.

³⁷ Megyi itobi amʋʋ fɔpʋwa ɔsʋlʋtɔ amʋ gyi ɔban amʋʋ ɩtɛdan amʋ.

³⁸ Bulu tɛha mʋ́ ɔyʋlʋ pɔpwɛá mʋ onuto odekle. Ɔtɛha atɔ-abi kugyikʋ mʋ́ ɔyʋlʋ ɔtsan.

³⁹ Alɩ amʋʋ atɔ-abi ɔtsan-ɔtsan bʋ ɩnʋ amʋ a, alɩ togyitɔ ɔyʋlʋ igyi ɔtsan nɩ. Anyankpʋsa, mbwɩ, mbubwi pʋ́ ntsutso aye fɛ́ɛ́tɔ okugyiɔkʋ ɔyʋlʋ ɔtsan.

⁴⁰ Ɔsʋsʋ-atɔ bʋ ɩnʋ, ɔsʋlʋsʋ-atɔ ɛ bʋ ɩnʋ. Mʋ́ fɛ́ɛ́ ɩbʋ ɔyʋlʋ ɔtsan-ɔtsan. Ɔsʋsʋ klɛ numnyam ɔtsan, ɔsʋlʋsʋ klɛ ɛ numnyam ɔtsan.

⁴¹ Owi numnyam igyi ɔtsan ha ɔtsra. Ɔtsra klɛ ɛ igyi ɔtsan ha ntsrakpabi. Ɔtsrakpabi kugyikʋ na ɔtsan, mʋ́ numnyam ɛ ɩna ɔtsan ha mʋ́ ba.

⁴² Alɩ ɩbɔ́bwɛ brɛá Bulu ɔbɔ́kʋsʋa awupʋ nɩ. Anɩ ɔsʋlʋsʋ-ɔyʋlʋ anfɩ itowu, plɔ anfɩ ɩbɔ́tsʋn ɔtsan ha mʋ́á Bulu ɔbɔ́kʋsʋa tsu afulitɔ, tsufɛ mʋ́ mʋ́ imóowu ɛkɛkɛɛkɛ.

⁴³ Anɩ ɔyʋlʋ anfɩ tɔpɔn brɛá bopula mʋ́, tamɛ nɩ Bulu ɔkʋsʋa mʋ́ a, itenya ɔwʋnlɩn, wa numnyam.

⁴⁴ Ɔsʋlʋsʋ-ɔyʋlʋ igyi sei, tamɛ nɩ Bulu ɔkʋsʋa mʋ́ a, ɩbɔ́bwɛ ɔŋɛtɔ ɔyʋlʋ. Tsufɛ alɩ amʋʋ ɔsʋlʋsʋ-ɔyʋlʋ bʋ ɩnʋ amʋ a, alɩ ɔŋɛtɔ klɛ ɛ bʋ ɩnʋ nɩ.

⁴⁵ Bulu asʋn wanlɩnhɛ amʋ lɛbla anɩ ɔbɛɛ, “Adam gyankpapʋ amʋ lɔbwɛ ɔkɩankpapʋ.” Tamɛ Adam trahɛ, ogyi Kristo amʋ mʋ́ gyi Ɔŋɛá ɔtɛha nkpa.

⁴⁶ Ɔsʋlʋsʋ-ɔyʋlʋ anɩtegyankpa nya asa anɩtebenya ɔŋɛtɔ klɛ.

⁴⁷ Ɔsʋlʋtɔ-ɩsɩ Bulu lɔpʋpwɛ nyankpʋsa gyankpapʋ, ogyi Adam amʋ. Kristo, amʋʋ obuo amʋ mʋ́ otsu ɔsʋsʋ.

⁴⁸ Nyankpʋsa okugyiɔkʋ bʋ ɔsʋlʋsʋ-ɔyʋlʋ fɛ Adam, tamɛ anɩ ɔsʋsʋ-ɔyʋlʋ mʋ́ ɩbɔ́bwɛ fɛ Kristo klɛ.

⁴⁹ Alɩ amʋʋ anɩgyi fɛ ɔsʋlʋsʋ Adam amʋ a, alɩ kɛn abɔ́bwɛ fɛ Kristo amʋʋ otsu ɔsʋsʋ amʋ ɛ ɛkɛkʋ nɩ.

⁵⁰ Apio, tɔá ndɛblɩ gyi, anɩ ɔyʋlʋ anfɩ igyi ɔyʋlʋ mʋ́a obugya anfɩ iméenya ogyikpa Bulu iwiegyi amʋtɔ. Tɔá iteyinta ɩmɛ́ɛtalɩ nya ogyikpa tɔá ɩtamayintatɔ.

⁵¹ Tamɛ mlɩyaa asʋ amlɩnu asʋn ŋainhɛ kʋá Bulu lalɛ suna mɩ. Ɔbɛɛ, megyi anɩ fɛ́ɛ́ obówu, tamɛ anɩ fɛ́ɛ́ ɔyʋlʋ ɩbɛ́tsɛ.

⁵² Nɩ ɔkpɛ trahɛ ɩfʋlɩ pɛ a, anɩ fɛ́ɛ́ abɛ́tsɛ ɔtsawʋlɛ pɛ. Bulu ɔbɔ́kʋsʋa awupʋ amʋ. Amʋ́ ɔyʋlʋ ɩmɛ́ɛtra yinta, ɔbɛ́tsɛ anɩ nkpa atsiapʋ ɛ fɛ́ɛ́.

⁵³ Tsufɛ ilehian ánɩ́ Bulu ɔbɛ́tsɛ anɩ ɔyʋlʋ anfɩ itowu plɔ anfɩ, ha anɩ ɔyʋlʋá ɩtamawu, ɩtamaplɔ.

⁵⁴ Nɩ ɩba mʋ́tɔá Bulu latsɛ tɔá itowu, bwɛ mʋ́ tɔá ɩtamawu, tɔá ɩtɔplɔ ɛ labwɛ tɔá ɩtamaplɔ a, ɩnʋ Bulu asʋn wanlɩnhɛ anfɩ ɩbɛ́ba mʋ́tɔ nɩ. Ɔbɛɛ, “Batu lowu asɩ plɩplɩplɩplɩ. Ɩsʋgyi onuto laba.”

⁵⁵ Bulu asʋn wanlɩnhɛ kʋ ɛ lɛblɩ ɔbɛɛ, “Oo lowu, nkʋnʋ fʋ ɔkpɛ bʋ? Nkʋnʋ fʋ ɩsʋgyi bʋ?”

⁵⁶ Lakpan igyi ɔkpɛá ɩtɔmɔ, Mose mbla amʋ ɛ ɩtɛha lakpan tumi.

⁵⁷ Nkalɩ kʋraa abɔ́kʋkʋ da Bulu ɩpan? Mʋlaha anɩlatsʋn anɩ Wie Yesu Kristosʋ gyi asʋ.

⁵⁸ Mʋ́ sʋ apio adwɛpʋ, mlɩlɩɩ kinkiinkin, mlɩmákpɩnkɩ. Mlɩsi mlɩ ɩwɩ fɛ́ɛ́ ha Bulu agyʋma bregyibrɛ, tsufɛ mlɩyin ánɩ́ mlɩ gyumagyihɛ mɔ́ɔbwɛ kpaalɩ.