1 Korintofɔ 14 - Bulu Ntam Pɔpwɛ mʋ́a Israel Ɩlʋ

Ɔŋɛ Wankɩhɛ Atokiehɛ Bamba

¹ Mlɩdunka ɔdwɛ ɔkpa, amlɩdunka ɔŋɛtɔ atokiehɛ ɛ. Mʋ́á ɩdʋn a, Bulu ɔnɔ asʋnblɩ.

² Tsufɛ nɩ ɔkʋ dɛ ɔblɩ bamba blɩ a, megyi anyankpʋsa ɔdɛbla, Bulu ɔdɛbla. Ɔhaa tamanu mʋ́ asɩ, tsufɛ mʋ ɔŋɛ dɛ asʋn ŋainhɛ blɩ.

³ Tamɛ ɔha ánɩ́ ɔdɛ Bulu ɔnɔ asʋn blɩ mʋ́ a, aha ɔdɛbla, ɔdɛpʋbʋa amʋ́ abʋdan hogyitɔ. Ɔdɛpʋwa amʋ́ ɔwʋnlɩn, ɔdɛpʋlwii amʋ́ ɩklʋn ɛ.

⁴ Ɔha ánɩ́ ɔdɛ ɔblɩ bamba blɩ nkʋlɛ tenya ɔwʋnlɩn Bulusumtɔ. Tamɛ ɔha ánɩ́ ɔdɛ Bulu ɔnɔ asʋn blɩ mʋ́ tɔwa ɔpasua amʋ ɔwʋnlɩn.

⁵ Tɛkɩ ndekleá mlɩ fɛ́ɛ́ mlɛ́blɩ ɔblɩ bamba, tamɛ nɩ mlɩdɛ Bulu ɔnɔ asʋn blɩ a, ɩbʋ mɩ alɛ dʋn. Tsufɛ Bulu ɔnɔsʋ ɔtɔɩpʋ dʋn ɔblɩ bamba ɔblɩpʋ. Nkɛtɩ nɩ ɔblɩ bamba ɔblɩpʋ amʋ tɛtalɩ lɛ mʋ́ asɩ, mɛnɩ ɔpasua amʋ bénya tɔkʋ tsu mʋ́tɔ.

⁶ Mɩ apio, nɩ naba mlɩ wa sei bɛblɩ ɔblɩ bamba kʋ, mmɛlɛ mʋ́ asɩ a, labi mɔmʋ ɩbɔ́wa ha mlɩ? Tamɛ nɩ nɛblɩ asʋn, nɛ́ha mlɛbɩ asʋn, ntɛ nɛblɩ asʋn lɛsunahɛ kʋ, ntɛ nɛblɩ Bulu ɔnɔ asʋn kʋ, ntɛ suna mlɩ atɔ a, ɩbɔ́wa labi ha mlɩ dʋn.

⁷ Mlɩpʋkɩ ɩtɔá fɛda mʋ́ itotsula, fɛ ɩkwɛ, ɔtɛntɛ ntɛ ɔkpɛ aná. Nɩ fʋmɛda mʋ́ itsula wanklaan a, bʋtamanu mʋ́ asɩ.

⁸ Nɩ klunsi ɔdapʋ mɛbɩ da mʋ́ a, ɔhaa tamanu mʋ́ asɩ, dɩda atɔ yɔ ɩsa.

⁹ Alɩ kɛn nɩ mlɩdɛ ɔblɩá ɔhaa mɛdɛ mʋ́tɔ nu blɩ a, mlɩdɛtɔɩ wa afutɔ nɩ.

¹⁰ Ɔblɩ tsɔtsɔɔtsɔ bʋ ɔyɩtɔ. Kugyikʋ ɩlɔfʋn, ɩbʋ mʋ́ ablɩpʋ anulɛ.

¹¹ Tamɛ nɩ ɔkʋ dɛ ɔblɩ kʋ blɩ, mɩ ɛ mmɛdɛ mʋ́tɔ nu a, ntamanu mʋ asɩ, mʋ ɛ ɔtamanu mɩ asɩ.

¹² Mʋ́ sʋ ɩnɩá mlɩhɩɛ mlɩdɛ Ɔŋɛ Wankɩhɛ atokiehɛ amʋ dunka a, mlɩkʋlɩ mʋ́á ɩbɔ́wa ɔpasua amʋ ɔwʋnlɩn.

¹³ Ɩnɩ sʋ ɔha ánɩ́ ɔtɛblɩ ɔblɩ bamba ɔkʋlɩ Bulu mʋ́ asɩnu, mɛnɩ ɔbɛ́talɩ lɛ mʋ́ asɩ suna mʋ́ anupʋ.

¹⁴ Tsufɛ nɩ ndɛpʋ ɔblɩ bamba bɔ mpaɩ a, mɩ ɔŋɛ dɛ mʋ́ bɔ, tamɛ mmɛdɛ asʋn ánɩ́ ndɛblɩ asɩ nu.

¹⁵ Nkalɩ mɛɛ nɔ́bwɛ? Nɔ́bɔ mpaɩ ɔŋɛtɔ brɛ kʋtɔ, pʋ mɩ agywɩɩn ɛ bɔ mʋ́ brɛ bambatɔ. Alɩ kɛn nɔ́wa ɩlʋ ɔŋɛtɔ, pʋ mɩ agywɩɩn wa mʋ́ brɛ kʋtɔ ɛ nɩ.

¹⁶ Tsufɛ nɩ fʋdɛ Bulu kanfʋ ɔŋɛtɔ pɛ a, nkalɩ ɩbɔ́bwɛ ɔha ánɩ́ ɔmɛdɛ mʋ́ asɩ nu ɔbɛ́tsa fʋ? Nkalɩ bɛ́tsa fʋ Bulu ɩpan da nɩ bʋmɛdɛ asʋn ánɩ́ fʋdɛblɩ asɩ nu?

¹⁷ Fialɩ fʋdɛ Bulu ɩpan da wanklaan, tamɛ ɩtamawa fʋ ba ɔwʋnlɩn.

¹⁸ Nɛda Bulu ɩpan ánɩ́ ntɛblɩ ɔblɩ bamba dʋn mlɩtɔ okugyiɔkʋ.

¹⁹ Tamɛ nɩ afia a, ntekleá nɛ́blɩ asʋn anu pɛá ɔhagyiɔha obónu mʋ́ asɩ, ɩbɔ́bʋa amʋ́ ɛ dʋn ánɩ́ nɛ́blɩ asʋn mpɩm-du (10,000) ɔblɩ bambatɔá ɔhaa monu mʋ́ asɩ.

²⁰ Mɩ apio, mlɩmábwɛ agywɩɩn fɛ nyebi. Mlɩbwɛ ɩwɩ fɛ kebi-bɔbwɛ lakpanbwɛtɔ, tamɛ mlɩgywɩɩn fɛ ɔhandɛ.

²¹ Bɔwanlɩn wa Bulu asʋn amʋtɔ bɛɛ, “Nɔ́tɔɩ tsʋn afɔɔsʋ, bɛ́bla mɩ aha ɔblɩ bamba. Mʋ́ o a, mɩ aha bʋmóonu mɩ ɔmɛ.” Anɩ Wie lɛblɩ.

²² Ɩnɩ sʋ ɔblɩ bamba blɩ igyi osuna ha ɔmátɔfɔ, megyi ahogyipʋ. Bulu ɔnɔ asʋn blɩ ɛ igyi osuna ha ahogyipʋ, megyi ɔmátɔfɔ.

²³ Nɩ ɔpasua amʋ ifia, ɔhagyiɔha dɛ ɔblɩ bamba blɩ, ɔha bamba pʋ́ ɔmátɔyin bɛba mlɩtɔ a, bʋmɛ́ɛblɩ bɛɛ, mlɩ nwun layinta?

²⁴ Tamɛ nɩ mlɩ fɛ́ɛ́ mlɩdɛ Bulu ɔnɔ asʋn blɩ, ɔmátɔfɔ ntɛ aha ánɩ́ bʋtamanu mʋ́tɔ bɛba mlɩtɔ a, amʋ́ onuto bɔ́yɔ asʋn amʋtɔ, nu ɩwɩasɩá babwɛ lakpan.

²⁵ Ɩbɛ́ha amʋ́ klʋntɔ asʋn bɛ́lɩn ɔwan. Bɛ́da akpawunu, kanfʋ Bulu bɛɛ, “Lɛlɛ, Bulu bʋ mlɩtɔ.”

Ɔpasua Amʋtɔ Nhɩhɩɛ

²⁶ Mɩ apio, nɩ mlɛba befia Bulu osumkpa, mlɩtɔ ɔkʋ tɔwa ɩlʋ, ɔkʋ tosuna atɔ, ɔkʋ towun atɔ, ɔkʋ tɛblɩ ɔblɩ bamba, ɔkʋ ɛ tonu mʋ́ asɩ a, bʋbwɛ mʋ́ pʋwa ɔpasua amʋ ɔwʋnlɩn.

²⁷ Nɩ akʋ bɛblɩ ɔblɩ bamba a, bʋbwɛ aha abanyɔ. Nɩ bʋtsɔ kʋraa a, abasa. Bʋblɩ mʋ́ ɩkʋlɛ-kʋlɛ, mɛnɩ ɔkʋ ɔbɛ́lɛ mʋ́ asɩ.

²⁸ Nɩ ɔhaa má ofiakpa ɩnʋá ɔbɛ́lɛ mʋ́ asɩ mʋ́ a, bʋkpa ɔnɔ bun, amʋ́a amʋ́ Bulu abʋtɔɩ nklobitɔ.

²⁹ Bulu ɔnɔsʋ atɔɩpʋ abanyɔ ntɛ abasa bʋtɔɩ, atrahɛ abʋyɔ amʋ́ asʋn blɩhɛ amʋtɔ.

³⁰ Tamɛ nɩ Bulu ɔlɛ atɔ suna ɔkʋá otsie ofiakpa ɩnʋ a, Bulu ɔnɔsʋ ɔtɔɩpʋ amʋ osi tɔɩ, ɔha amʋ ɔblɩ tɔá alawun.

³¹ Mlɩ fɛ́ɛ́ mlɛ́talɩ blɩ Bulu ɔnɔ asʋn amʋ ɩkʋlɛ-kʋlɛ, mɛnɩ mlɩ fɛ́ɛ́ mlósuan tɔkʋ tsu mʋ́tɔ pʋwa ɩwɩ ɔwʋnlɩn.

³² Bulu ɔnɔsʋ atɔɩpʋ amʋ bʋnya tumi ɔŋɛ amʋʋ ɩdɛ amʋ́ kpa amʋ́sʋ, mɛnɩ bɔ́tɔɩ ha amʋ́ aba ɔkpa.

³³ Tsufɛ Bulu asʋn lolwii, omegyi basabasa.

³⁴ Nɩ ɔpasua amʋ ifia a, atsɩ bʋbwɛ diin. Bʋma ɔkpa tɔɩ. Bʋba ɩwɩasɩ fɛ alɩá Mose Mbla lɛblɩ.

³⁵ Nɩ bʋdekleá bónu asʋankʋtɔ a, bʋfɩtɛ amʋ́ aklu woyitɔ, tsufɛ ɩbʋ pɛlɩá ɔtsɩ ɔbɔ́tɔɩ ofiakpa.

³⁶ Mlɩlahogyi mlɩaa, mlɩ wa Bulu asʋn amʋ ilotsua asɩ? Ntɛ mlɩ nkʋlɛ latsɔ mʋ́ nu?

³⁷ Nɩ ɔkʋ dɛkɩá Bulu ɔnɔsʋ ɔtɔɩpʋ mʋgyi, ntɛ ɔbʋ Ɔŋɛtɔ atokiehɛ kʋ a, ɩwankɩ mʋá anɩ Wie onuto mbla igyi ndɛwanlɩn sɩsɩ mlɩ.

³⁸ Nɩ ɔmɔhɔ asʋn anfɩ a, mlɩ ɛ mlɩmáhɔ mʋ asʋn.

³⁹ Mɩ apio, ɩnɩ sʋ mlɩprɩá mlɛ́blɩ Bulu ɔnɔ asʋn, tamɛ mlɩmábla ɔhaa mlɩaa, ɔmáblɩ ɔblɩ bamba.

⁴⁰ Mlɩbwɛ togyitɔ dɩnka mʋ́ ɔkpasʋ wanklaan, ɩfʋn.