1 Korintofɔ 13 - Bulu Ntam Pɔpwɛ mʋ́a Israel Ɩlʋ

Ɔdwɛ

¹ Nɩ ntɛtalɩ blɩ anyankpʋsa pʋ́ Bulu-abɔpʋ ɔblɩ fɛ́ɛ́, tamɛ ntamadwɛ mɩ aba a, ngyi fɛ ɔkan ntɛ gbɛmgblɛɩn ánɩ́ bʋdɛ mʋ́ da, ɩdɛlɩn kʋklʋkʋʋ.

² Nɩ mbʋ Bulu ɔnɔ asʋnblɩ, Bulu asʋn ŋainhɛbɩ pʋ́ hogyi kpɔnkpɔntɩá ntɛtalɩ pʋpuli abʋ, tamɛ mma mɩ ba ɩwɩ ɔdwɛ a, mʋmʋ mma labi kʋkʋ.

³ Nɩ nɔpʋ mɩ atɔ fɛ́ɛ́ kie ahianfɔ, nɔpʋ mɩ ɩwɩ ha mbɛɛ bʋwa mɩ ogya, tamɛ mma mɩ ba ɩwɩ ɔdwɛ a, mma labi ha ɔhaa.

⁴ Aha ɔdwɛpʋ tenya ɩklʋn, ɔbʋ awɩtɔlɛ. Ɔma olu, ɔtamaka ɔnɔtɔ, ɔtamatsu ɩwɩ.

⁵ Otobu atɔ, ɔma ɔnsɩpɛ. Ɔtamakɔsɩ nya ɔblɔ, ɔtamahɔ asʋn wa ɩwɩtɔ.

⁶ Ɔtamatsula asʋkpan, ɔnɔkwalɩ otobuo.

⁷ Otenya klʋn ha togyitɔ, ɔtɔhɔ asʋnsʋ gyi. Mʋ ansɩ tɛdɩnka asʋnsʋ, ototomi ɛ.

⁸ Ɔdwɛ mʋ́ ɩtamata, tamɛ Bulu ɔnɔ asʋnblɩ bɔ́mɔ ɔnɔ. Ɔblɩ bamba blɩ bɛ́ka itin, asʋnbɩ ɛ ɩbɛ́ba bɔtsʋn.

⁹ Tsufɛ anɩmɔkʋnya bɩ togyitɔ ta, anɩmɔkʋnya blɩ Bulu ɔnɔ asʋn ɛ yi.

¹⁰ Tamɛ ɔŋɛtɔ atokiehɛ anfɩ fɛ́ɛ́ ɩmɔfʋn. Nɩ mʋ́á ɩlɔfʋn yi ɩba a, ɩnɩ fɛ́ɛ́ bɔ́fwɩ.

¹¹ Igyi fɛ ɩnɩ. Brɛá ngyi kebi a, nɔtɔɩ fɛ kebi. Mɩ atɔ bwɛhɛ pʋ́ mɩ asʋn susuhɛ fɛ́ɛ́ lɔbwɛ fɛ kebi. Tamɛ sei anfɩ nadan a, nasi nyebitɔ bwɛhɛ amʋ fɛ́ɛ́ bwɛ.

¹² Sei a, anɩdɛ atɔ kɩ fulaa fɛ ogyasitɔ anɩdɛ mʋ́ kɩ. Brɛ ɩkʋ bɛ́ba a, abówun mʋ́ wanklaan. Sei a, anɩ atɔbɩ mɔfʋn. Ɔma a, abɛ́ba bɛbɩ mʋ́ fɛ alɩá Bulu yin anɩ.

¹³ Ɔnɔkwalɩ a, atoku asa anfɩ obétsia nɩ. Hogyi, ɔkpakɩ pʋ́ ɔdwɛ, tamɛ ɔdwɛ dʋn mʋ́ fɛ́ɛ́.