1 Korintofɔ 12 - Bulu Ntam Pɔpwɛ mʋ́a Israel Ɩlʋ

Ɔŋɛ Wankɩhɛ Atokiehɛ

¹ Sei a, apio, ndekleá nɛ́lɛ Ɔŋɛ Wankɩhɛ atokiehɛ asʋn amʋ asɩ wanklaan suna mlɩ.

² Mlɩyin ánɩ́ brɛá mlɩgyi ɔmátɔfɔ a, bosuna mlɩ asunakpan, ɩlɛha mlɩlɔyɔ mlɩdɛ ɩkpɩá bʋtamatɔɩ sum.

³ Mʋ́ sʋ ndekleá mlɩbɩ mʋ́á itsu Bulu wa. Ɔhagyiɔha ánɩ́ ɔdɛpʋ Ɔŋɛ Wankɩhɛ tɔɩ mɛ́ɛtalɩ lwɩɩ anɩ Wie Yesu. Ɔha ánɩ́ Ɔŋɛ Wankɩhɛ dɛ mʋ kpa nkʋlɛ ɔbɛ́talɩ blɩ ɔbɛɛ, “Yesu gyi mɩ Wie.”

⁴ Bulu atokiehɛ ɔtsan-ɔtsan bʋ ɩnʋ, tamɛ Ɔŋɛ Wankɩhɛ amʋ kɛn teye mʋ́ fɛ́ɛ́.

⁵ Bulusum agyʋma igyi ɔtsan-ɔtsan, tamɛ anɩ Wie amʋ kɛn anɩ fɛ́ɛ́ anɩdesum.

⁶ Ɔkpa ɔtsan-ɔtsansʋ Bulu tɔyɔ agyʋma tsʋn anɩsʋ, tamɛ Bulu amʋ kɛn dɛ mʋ́ fɛ́ɛ́ bwɛ tsʋn anɩ fɛ́ɛ́sʋ.

⁷ Bulu tɛlɛ mʋ Ɔŋɛ amʋ ɔwan tsʋn ɔkpa ɔkʋsʋ anɩtɔ okugyiɔkʋtɔ, mɛnɩ abɔ́pʋkpa aba.

⁸ Ɔŋɛ Wankɩhɛ tɛha ɔkʋ tɔpʋ nyansa tɔɩ kpla aha, ɔtɛha ɔkʋ ɛ tɛbɩ asʋn.

⁹ Ɔtɛha ɔkʋ tɛhɩɛ hɔ Bulu gyi, ɔtɛha ɔkʋ ɛ tɛtsa aha ɩlɔ.

¹⁰ Ɔŋɛ Wankɩhɛ amʋ kɛn tɛha ɔkʋ tumi ɔtɔpʋbwɛ ofula, ɔtɛha ɔkʋ ɛ tɛblɩ asʋn ánɩ́ Bulu lɔpʋwa mʋ ɔnɔ. Ɔtɛha ɔkʋ tɛtalɩ bɩ ɔŋɛá itsu Bulu wa pʋ́ mʋ́á itsu ɔŋɛ lalahɛ wa. Ɔtɛha ɔkʋ tɛblɩ ɔblɩ bamba, ɔkʋ ɛ tonu mʋ́ asɩ.

¹¹ Ɔŋɛ Wankɩhɛ amʋ nkʋlɛ tɔbwɛ ɩnɩ fɛ́ɛ́, oteye atokiehɛ anfɩ ha ɔhagyiɔha alɩá odekle.

Ɔpasua Amʋ Igyi Nyankpʋsa-oyi Ɔkʋlɛ

¹² Nyankpʋsa-oyi ɩwɩ atɔ ɩtsɔ, tamɛ mʋ́ fɛ́ɛ́ lɔbwɛ nyankpʋsa amʋ. Alɩ kɛn igyi Kristo ɛ nɩ. Mʋ ɔpasua amʋ gyi mʋ nyankpʋsa-oyi amʋ nɩ.

¹³ Anɩtɔ akʋ anɩgyi Yudafɔ, akʋ Grikifɔ, akʋ nkpábi ntɛ adɩhɩɛ, tamɛ bɔpʋ Ɔŋɛ Wankɩhɛ amʋ bɔ anɩ fɛ́ɛ́ asu wa Kristo ɔyʋlʋ kʋlɛ amʋtɔ, Bulu lɔpʋ Ɔŋɛ amʋ kɛn nuna anɩ fɛ́ɛ́.

¹⁴ Tamɛ megyi toku kʋlɛ lɔbwɛ nyankpʋsa-oyi amʋ, mboun ɩwɩ atɔ ɔtsan-ɔtsan.

¹⁵ Nɩ yabi ɔblɩ ɔbɛɛ, “Mma nyankpʋsa-oyi amʋ ɩwɩ, tsufɛ megyi ɩbɩ ngyi” a, ilosuna ánɩ́ megyi nyankpʋsa-oyi amʋ ɩwɩ atɔ ogyi?

¹⁶ Nɩ ɩsʋ ɛ ɔblɩ ɔbɛɛ, “Mma nyankpʋsa-oyi amʋ ɩwɩ, tsufɛ megyi nsibi ngyi” a, ilosuna ánɩ́ megyi nyankpʋsa-oyi amʋ ɩwɩ atɔ ogyi?

¹⁷ Nɩ nsibi nkʋlɛ gyi nyankpʋsa-oyi amʋ fɛ́ɛ́ a, nkalɩ ɔbɔ́bwɛ obónu asʋn? Ntɛ nɩ ɩsʋ nkʋlɛ gyi nyankpʋsa-oyi amʋ fɛ́ɛ́ a, nkalɩ ɔbɔ́hɔ atɔ afu?

¹⁸ Tamɛ Bulu lɔpʋ ɩwɩ atɔ tsɔtsɔɔtsɔ bwɛ nyankpʋsa-oyi amʋ, ɔlɔpʋ kugyikʋ yi ɔtɩnɛá odekle.

¹⁹ Nɩ ɩwɩ ntobi amʋ igyi toku kʋlɛ a, nkalɩ nyankpʋsa-oyi amʋ ɩbɔ́bwɛ?

²⁰ Ɩwɩ ntobi amʋ ɩtsɔ mʋ́, tamɛ mʋ́ fɛ́ɛ́ lɔbwɛ nyankpʋsa-oyi amʋ nɩ.

²¹ Mʋ́ sʋ nsibi mɛ́ɛtalɩ bla ɩbɩ ɔbɛɛ, “Fʋma labi ha mɩ!” ɛkɛkɛɛkɛ. Nwun ɛ mɛ́ɛtalɩ bla yabi ɔbɛɛ, “Fʋma labi ha mɩ!”

²² Nɩ akɩ a, ɩwɩ atɔ amʋʋ anɩdɛkɩ anɩaa ɩlɔpɔn amʋ ɩwɩ tehian nɩ.

²³ Mʋ́ amʋʋ anɩdɛkɩá obú ɩma mʋ́sʋ amʋ anɩtobu dʋn nɩ. Ɔtɩnɛ amʋʋ anɩtamakleá aha bʋwun amʋ ɛ anɩtɔpʋ atɔ tin nɩ.

²⁴ Tamɛ anɩtamapʋ atɔ tin anɩ ɩwɩ ntobi amʋʋ ɩbʋ akɩlɛ amʋ. Bulu lɔbwɛ anɩ ɩwɩ atɔ amʋ alɩ, mɛnɩ abóbu mʋ́ amʋʋ ɩma numnyam amʋ, kɩ mʋ́sʋ wanklaan.

²⁵ Fówun ɩkʋlɛbwɛ bétsia amʋ́tɔ, mɛnɩ gyɔpɩ okpita bɩna a, bɩna ɛ lakpita gyɔpɩ.

²⁶ Nɩ nyankpʋsa-oyi amʋ ɩwɩ tɔkʋ dɛ ɔsɩn wun a, nyankpʋsa-oyi amʋ fɛ́ɛ́ towun mʋ́. Nɩ bɛkanfʋ mʋ́tɔ kʋ ɛ a, ansɩ tegyi nyankpʋsa amʋ.

²⁷ Yoo, ayɔ nkpa. Kristo ɔyʋlʋ kʋlɛ amʋ mlɩ fɛ́ɛ́ mlɩgyi. Mlɩgyi mʋ ɔpasua amʋ nɩ. Mlɩtɔ okugyiɔkʋ gyi mʋ nyankpʋsa-oyi amʋ ɩwɩ tɔkʋ.

²⁸ Bulu lɛhɩhɩɛ ɩnɩ fɛ́ɛ́ wa mʋ ɔpasua amʋtɔ. Gyankpapʋ, sumbi ayɔpʋ. Nyɔsɩ, Bulu ɔnɔsʋ atɔɩpʋ, sasɩ, atɔ asunapʋ. Mʋ́ ɔma a, ofula abwɛpʋ. Amʋ́á bʋbʋ ɩlɔtsa tumi, bʋalɛ agyipʋ, ahandɛ pʋ́ ɔblɩ bamba ablɩpʋ.

²⁹ Amʋ́ fɛ́ɛ́ gyi sumbi ayɔpʋ? Ɛkɛkɛɛkɛ! Amʋ́ fɛ́ɛ́ gyi Bulu ɔnɔsʋ atɔɩpʋ, ntɛ atɔ asunapʋ, ntɛ ofula abwɛpʋ? Ɩmɛ́ɛba mʋ́tɔ alɩ!

³⁰ Amʋ́ fɛ́ɛ́ bʋ ɩlɔtsa atokiehɛ? Amʋ́ fɛ́ɛ́ tɛblɩ ɔblɩ bamba, ntɛ amʋ́ fɛ́ɛ́ tɛtalɩ nu ɔblɩ bamba amʋ asɩ?

³¹ Mlɩbɔ mbɔdɩ amlɩdunka atokiehɛ amʋtɔ mʋ́á idehian dʋn. Nɛlasuna mlɩ ɔkpa ánɩ́ ɩdʋn ɩnɩ tsɩa mʋ́tɔ.