1 Korintofɔ 11 - Bulu Ntam Pɔpwɛ mʋ́a Israel Ɩlʋ

¹ Mlɩkasɩ mɩ tsiatɔ, fɛ alɩá mɩ ɛ nɛkasɩ Kristo klɛ.

Alɩá Atsɩ Bɔ́pʋtsia Ɔpasuatɔ

² Mɩ apio, ntɛkanfʋ mlɩ, tsufɛ mlɩ ansɩ dɩn mɩsʋ. Mlɩdɛbwɛ dɩnka Kristo atosunahɛ amʋʋ nɔpʋha mlɩ amʋ sʋ.

³ Tamɛ ndekleá mlɩnu mʋ́ asɩ ánɩ́ oyingyioyin bʋ Kristo asɩ, ɔtsɩgyiɔtsɩ bʋ oyin asɩ, fɛ alɩá Kristo ɛ bʋ Bulu asɩ.

⁴ Ɩnɩ sʋ oyingyioyin ánɩ́ obun atɔ nwun asa ɔdɛ mpaɩ bɔ ntɛ ɔdɛ asʋn ánɩ́ Bulu lapʋwa mʋ ɔnɔ blɩ mɛdɛ Kristo bu.

⁵ Tamɛ ɔtsɩgyiɔtsɩá ɔmɛklɩ nwun asa ɔdɛ mpaɩ bɔ ntɛ ɔdɛ asʋn ánɩ́ Bulu lapʋwa mʋ ɔnɔ blɩ ɛ mɛdɛ mʋ klu bu. Igyi fɛ alakpa nwun.

⁶ Nɩ ɔmɔ́ɔpʋ atɔ klɩ nwun a, mʋmʋ ɔkpa mʋ́. Tamɛ nɩ ɔtsɩ ɔkpa nwun, ɩbʋ mʋ pɛlɩ a, ɔpʋ atɔ klɩ mʋ́sʋ.

⁷ Bulu lɔbwɛ oyin fɛ mʋ ɩwɩ, pʋwa mʋ ɩwɩ numnyam. Mʋ́ sʋ mehian ánɩ́ ɔbɔ́pʋ atɔ bun nwun asa obósum Bulu. Tamɛ ɔtsɩ mʋ́ a, Bulu lɔbwɛ mʋ pʋwa oyin numnyam.

⁸ Tsufɛ oyin mɛdalɩ tsu ɔtsɩtɔ, ɔtsɩ mboun lɛdalɩ tsu oyintɔ.

⁹ Megyi ɔtsɩ sʋ Bulu lɔpwɛ oyin, mboun oyin sʋ ɔlɔpwɛ ɔtsɩ.

¹⁰ Ɩnɩ sʋ ilehian ánɩ́ ɔtsɩ ɔbɛ́klɩ nwun, pʋsuna ánɩ́ ɔbʋ tumi asɩ, tsufɛ Bulu-abɔpʋ bʋdɛ mʋ kɩ.

¹¹ Ɩnɩá anɩa Kristonyɔ anɩlabwɛ kʋlɛ sʋ a, ɔtsɩ lehian oyin, oyin ɛ lehian ɔtsɩ.

¹² Tsufɛ alɩ amʋʋ ɔtsɩ gyankpapʋ lɛdalɩ tsu oyintɔ amʋ a, alɩ kɛn ɔtsɩ ɛ lɔkwɩɩ oyin nɩ. Tamɛ Bulu lɔbwɛ togyitɔ.

¹³ Mlɩ onuto mlɩyɔ asʋn anfɩtɔ amlɩkɩ. Ɩbʋ alɛá ɔtsɩ mɛ́ɛklɩ nwun asa ɔbɔ́bɔ mpaɩ ha Bulu?

¹⁴ Fɛ alɩá Bulu lɛlɛ ɔyɩtɔ a, ɩma alɛá oyin obési mʋ imi ɩbɔ́wa ɩswɩ fɛ ɔtsɩ klɛ.

¹⁵ Imi tɩntɩn igyi numnyam ha ɔtsɩ, tsufɛ Bulu lɔpʋ mʋ́ ha mʋ fɛ nwun-abuntɔ.

¹⁶ Tamɛ nɩ ɔkʋ dɛ mʋ́ ɩwɩ nwɛn gyi a, asʋn ánɩ́ mbʋ blɩ gyi, mmotsula dɩnka kʋkʋsʋ dʋn ɩnɩ. Alɩ kɛn Bulu ɔpasua atrahɛ fɛ́ɛ́ bʋmotsula dɩnka mʋ́sʋ nɩ.

Ɔpʋnʋasɩyɔ

¹⁷ Mmɛ́ɛkanfʋ mlɩ asʋn anfɩ nɛba bɛbla mlɩ anfɩ mʋ́tɔ. Tsufɛ yile kʋkʋ tamadalɩ tsu mlɩ ifiatɔ. Lalahɛ koun ɩtɛtɩ ha mlɩ.

¹⁸ Gyankpapʋ a, babla mɩ bɛɛ mlɩtamabwɛ kʋlɛ nɩ ɔpasua amʋ befia. Nahogyiá asʋn anfɩ kʋ bʋ mʋ́tɔ.

¹⁹ Lɛlɛ mʋ́ a, ilehian ánɩ́ nwɛngyi bétsia mlɩtɔ, mɛnɩ mlówun ɔnɔkwalɩá ɩbʋ mʋ́tɔ.

²⁰ Tamɛ bɛblɩ bɛɛ, nɩ mlefia a, megyi ɔpʋnʋasɩyɔ sʋ mlɩtefia.

²¹ Tsufɛ mlɩtamagyo aba. Akʋ bʋtegyi amʋ́ atɔ, bʋtamaha aba. Mʋ́ sʋ akʋ bʋtonun bʋ, akʋ ɛ bʋtsie akʋn.

²² Mlɩ onuto mlɩmá woyiá mlɩtegyi atɔ, nun nta mʋ́tɔ? Ntɛ mlɩdekleá mlɔ́sʋpa Bulu ɔpasua amʋ, amlɩwa ahianfɔ amʋ pɛlɩtɔ? Amansʋ mblɩ tsu ɩnɩ ɩwɩ? Nkanfʋ mlɩ? Ɩnɩtɔ mʋ́ a, ɛkɛkɛɛkɛ, mmɛ́ɛkanfʋ mlɩ!

²³ Tsufɛ tɔá nosuan tsu anɩ Wie wa kɛn ndɛ mlɩ bla a. Anɩ Wie Yesu lɛlɛ bodobodo ipin onye amʋʋ bɛlɛ mʋ ha amʋ,

²⁴ ɔlɛda Bulu ɩpan, biabia mʋ́tɔ, blɩ ɔbɛɛ, “Mɩ ɔyʋlʋá ndɛpʋha mlɩ nɩ. Mlɩtsia bwɛ ɩnɩ pʋkaɩn mɩsʋ.”

²⁵ Alɩ kɛn atogyihɛ amʋ ɔma a, olotsu nta-ɛwɛ amʋ blɩ ɔbɛɛ, “Nta-ɛwɛ anfɩ gyi mɩ obugya ánɩ́ Bulu dɛpʋsi ntam pɔpwɛ amʋʋ ɩbʋ mlɩa mʋnyɔ nsɩnɛ amʋsʋ nɩ. Bregyibrɛá mlónun mʋ́ a, mlɩnun mʋ́ pʋkaɩn mɩsʋ.”

²⁶ Tsufɛ bregyibrɛá mlɩdɛ bodobodo anfɩ gyi, nun nta tsu ɛwɛ anfɩtɔ a, mlɩdɛ anɩ Wie lowu amʋ ɔkan da kpɛfʋn brɛá obéyinki ba.

²⁷ Mʋ́ sʋ ɔha ánɩ́ obégyi alɩ bodobodo anfɩ, nun nta tsu anɩ Wie ɛwɛ anfɩtɔ mábu ɔkpasʋ a, alagyi anɩ Wie ɔyʋlʋ pʋ́ mʋ obugya amʋ ɩwɩ pɔn.

²⁸ Ɩnɩ sʋ ilehian ánɩ́ mlɔ́yɔ mlɩ nwuntɔ wanklaan, asa mlégyi bodobodo anfɩ, nun nta ɛwɛ anfɩtɔ.

²⁹ Tsufɛ nɩ mlɩmobu anɩ Wie Kristo ɔyʋlʋ, mlɩlegyi bodobodo amʋ, nun nta amʋ ɛ dɩnka ifinsʋ a, Bulu ɔbɛ́ha mlɩ ɩpɔn mʋ́ sʋ.

³⁰ Mʋ́ sʋ mlɩtɔ aha tsɔtsɔɔtsɔ bapɔn, akʋ bʋdɛlɔ, akʋ mʋ́ kʋraa bawu nɩ.

³¹ Nɩ anɩtɔyɔ anɩ nwuntɔ wanklaan asa a, tɛkɩ Bulu mɛ́ɛha anɩ pɔn.

³² Tamɛ nɩ anɩ Wie ɔlɛ anɩ ɩla, bɩtɩ anɩ ɩsʋ a, ɔmɛ́ɛha anɩa ɔyɩtɔ aha fɛ́ɛ́ ɩpɔn kʋlɛ.

³³ Ɩnɩ sʋ mɩ apio, nɩ mleyefia ɔpʋnʋ amʋ asɩ a, mlɩtsia gyo aba.

³⁴ Nɩ akʋn dɛ ɔkʋ a, ogyi atɔ tsu woyitɔ asa ɔba, mɛnɩ mlɩ ifia amʋ ɩmɛ́ɛtɩ ɩsʋbɩtɩ ha mlɩ. Mɩ onuto nɛ́ba bɛbla mlɩ tɔá mlɩbwɛ tsu asʋn trahɛ amʋ ɩwɩ.