1 Korintofɔ 10 - Bulu Ntam Pɔpwɛ mʋ́a Israel Ɩlʋ

Ɩkpɩsum Ɩwɩ Ɔlada

¹ Mɩ apio, ndekleá mlɩbɩ tɔá Bulu lɔbwɛ ha anɩ anain amʋ fɛ́ɛ́ bɩmbɩ amʋ. Ɔlɛha agyinde lobun amʋ́ fɛ́ɛ́sʋ, ɔlɛha Ɔpʋ Pɛpɛ bʋnkpatɔ lɛsɛ, ɔlɛkpa amʋ́ fɛ́ɛ́ tsʋn ɔpʋ amʋtɔ.

² Bulu lɔpʋ agyinde mʋ́a ɔpʋ amʋ bɔ amʋ́ fɛ́ɛ́ asu, pʋsuna ánɩ́ bʋgyi Mose abuopʋ.

³ Amʋ́ fɛ́ɛ́ begyi ɔŋɛtɔ atogyihɛ oloku ɔkʋlɛ amʋ.

⁴ Bonun ɔŋɛtɔ ntsu oloku ɔkʋlɛ amʋ tsu bʋta amʋʋ ɩlɛkpa amʋ́ amʋtɔ. Kristo gyi bʋta amʋ nɩ.

⁵ Tamɛ ɩnɩ fɛ́ɛ́ ɔma a, Bulu ansɩ megyi amʋ́ ɔdʋdʋɔ ɩwɩ. Ɔlɛhɩ amʋ́ ɔsʋlʋkpan amʋsʋ ɩnʋ.

⁶ Ntobi anfɩ ɩlɛba amʋ́sʋ anfɩ fɛ́ɛ́ igyi atosuanhɛ ha anɩ, mɛnɩ amʋ́ lalahɛ amʋ odu bwɛ mɛ́ɛdɩnka anɩ ɔwɔlɩ,

⁷ anɩmóosum ɩkpɩ ɛ fɛ amʋ́. Tsufɛ Bulu asʋn wanlɩnhɛ amʋ ɩlɛblɩ ɔbɛɛ, “Aha amʋ betsia asɩ gyi atɔ, nun nta, kʋsʋ kɔm.”

⁸ Mlɩmáwa atsɩ mʋ́a ayin asʋn fɛ alɩá amʋ́tɔ akʋ bɔbwɛ, ɩlɛha amʋ́tɔ mpɩm adʋanyɔ-sa (23,000) benya lowu ɛkɛwʋlɛ.

⁹ Mlɩmáha asɔ Kristo kɩ fɛ alɩ amʋʋ amʋ́tɔ akʋ bɔbwɛ, awɔ bodundun amʋ́ mɔ amʋ.

¹⁰ Mlɩmálɛ Bulu ɩla fɛ alɩá amʋ́tɔ akʋ bɔbwɛ, Bulu lɔpʋ ɔbɔpʋ sɩsɩ, ɔlɔbɔmɔ amʋ́.

¹¹ Ntobi anfɩ ɩlɛba amʋ́sʋ fɛ́ɛ́ igyi atosuanhɛ ha anɩ. Bɔwanlɩn mʋ́ tswɩ, pʋda anɩ aha anfɩ ɔyɩ ɔnɔmɔbɩ latʋ anɩ anfɩ ɔla.

¹² Mʋ́ sʋ nɩ fʋkɩ fɛɛ, fʋlɩɩ kinkiinkin Kristo hogyitɔ a, kɩ wanklaan, mɛnɩ fʋmɛ́ɛdɩda.

¹³ Bɩá fʋ ɩsɔkɩ amʋ mɔtsʋn ɔtsan ha aha trahɛ klɛ. Ɔnɔkwalɩpʋ Bulu gyi. Ɔmɛ́ɛha ɩsɔkɩá ɩdʋn fʋ ɩba fʋsʋ. Tamɛ nɩ fowie ɩsɔkɩtɔ a, Bulu obósuna fʋ ɔkpa ánɩ́ fɔ́tsʋn mʋ́sʋ talɩ lɩɩ mʋ́ ɔnɔ, mɛnɩ fɛ́dalɩ mʋ́tɔ.

¹⁴ Mʋ́ sʋ apio adwɛpʋ, mlɩmáwa ɩwɩ ɩkpɩsumtɔ ɛkɛkɛɛkɛ.

¹⁵ Atɩansɩpʋ mlɩgyi. Mʋ́ sʋ mlɩ onuto mlɩyɔ asʋn anfɩtɔ amlɩkɩ.

¹⁶ Nɩ ada Bulu ɩpan, anun anɩ Wie Yesu ɔpʋnʋasɩ ɛwɛ amʋtɔ nta a, imosuna ánɩ́ anɩa Kristo obugya labwɛ kʋlɛ? Nɩ abia bodobodo amʋ ɛ ye aba a, mʋ́ ɛ imosuna ánɩ́ anɩa mʋ ɔyʋlʋ labwɛ kʋlɛ?

¹⁷ Ɩnɩá anɩ tsɔ o a, bodobodo ipin kʋlɛ anɩtegyi. Mʋ́ sʋ anɩ fɛ́ɛ́ anɩlabwɛ ɔyʋlʋ kʋlɛ fɛ bodobodo ipin amʋ.

¹⁸ Mlɩpʋkɩ Israelfɔ, megyi aha amʋʋ bʋtegyi afɔdɩɛ atɔ amʋ tɔbwɛ kʋlɛ afɔdɩɛ amʋ bɔtɔ?

¹⁹ Mʋ́ sʋ nkalɩ mɩ asʋn anfɩ desuna? Blɩ ndɛblɩ mbɛɛ, ɩkpɩ ntɛ atogyihɛ amʋʋ bapʋha amʋ́ igyi amʋ ɩbʋ labi?

²⁰ Ɛkɛkɛɛkɛ! Tɔá ndɛblɩ gyi, nɩ akpɩpʋ bɛha ɩkpɩ igyi a, ɔŋɛ lalahɛ bɔpʋha, megyi Bulu. Mʋ́ sʋ mmedekleá mlɩa ɔŋɛ lalahɛ mlɔ́bwɛ kʋlɛ.

²¹ Mlɩmɛ́ɛtalɩ pʋ anɩ Wie ɛwɛ tin ɔnɔ, layɔpʋ ɔŋɛ lalahɛ ɛwɛ ɛ tin ɔnɔ. Mlɩa Kristo mlɩmɛ́ɛtalɩ wa ɩbɩ gyi atɔ, mlɩa ɔŋɛ lalahɛ ɛ amlɩwa ɩbɩ gyi atɔ.

²² Nɩ abwɛ mʋ́ alɩ a, anɩmɔ́ɔwa Bulu ɔblɔ fɛ Israelfɔ? Ntɛ anɩkɩá anɩbʋ ɔwʋnlɩn dʋn Bulu?

²³ Aha bʋtɛblɩ bɛɛ, “Anɩbʋ ɔkpa bwɛ togyitɔ.” Ɩbʋ mʋ́tɔ alɩ, tamɛ megyi mʋ́ fɛ́ɛ́ bʋ labi. Fʋdɛblɩ fɛɛ, “Anɩbʋ ɔkpa bwɛ togyitɔ.” Tamɛ megyi mʋ́ fɛ́ɛ́ tɔbʋa anɩ.

²⁴ Mlɩmákɩ mlɩ nkʋlɛ klɛ, mboun mlɩkɩ mlɩ aba ɛ klɛ.

²⁵ Tɔá mlɩbwɛ gyi, mlɩwɩ ibiasʋ iye kugyikʋ. Mlɩmáfɩtɛ mʋ́ ɩwɩ asʋansʋ, mlɩ klʋn ɛ ɩmáha mlɩ pɔn.

²⁶ Tsufɛ bɔwanlɩn wa Bulu asʋn amʋtɔ bɛɛ, “Bulu bʋ ɔyɩ mʋ́a mʋ́tɔ atɔ fɛ́ɛ́.”

²⁷ Nɩ ɔmátɔyin ɔtɩ fʋ atɔ ogyikpa, iletsia fʋ a, fayɔ. Tamɛ nɩ fɔyɔ a, máfɩtɛ mʋ́ ɩwɩ asʋansʋ, fʋ klʋn ɛ ɩmáha fʋ ɩpɔn.

²⁸ Tamɛ nɩ ɔkʋ ɔbla fʋ ɔbɛɛ, “Ɔkpɩtɔ-atɔ igyi” a, alɩá ɩmɛ́ɛhan ɔha amʋ sʋ mágyi atɔ amʋ.

²⁹ Megyi alɩá ɩbɛ́han fʋ sʋ, mboun ɔha amʋ sʋ. Mʋʋ ntogyi sʋ tɔá ɔkʋ desusu ibétin mɩ ɩwɩgyi ɔkpa?

³⁰ Nɩ ntɛda Bulu ɩpan atogyihɛsʋ asa ntegyi mʋ́ a, ntogyi sʋ ɔkʋ ɔbɛ́lɛ mɩ ɩla atɔ amʋ sʋ?

³¹ Mʋ́ sʋ nɩ fʋdegyi o, fʋdenun o, bwɛ mʋ́ fɛ́ɛ́ pʋwa Bulu numnyam.

³² Mlɩmáha mlɩ tsiatɔ itin Yudafɔ pʋ́ Grikifɔ ntɛ Bulu ɔpasua amʋ Kristo wa ba ɔkpa.

³³ Ntamakle mɩ nkʋlɛ yile. Togyitɔá ntɔbwɛ a, ntɔbɔ mbɔdɩá nɛ́ha aha ansɩ bégyi amʋ́, mɛnɩ Kristo ɔbɔ́hɔ amʋ́ nkpa.