Zakariyya 9 - NABUWWA KEE MALIKWA

YALLIH COKMI ISRAAYIL-NAQBOYTIITIL OOBELE

¹ YALLI ruube farmo ah teeti. YALLI yok iyyemii, «Israayil kedooda kee baadal yan mari inkih yoo fan wagita. Cadrak deqsita rasu kee Damaskoh magaalal ruubu waa digaalah eyyeeqe madqa tan.

² Cammat deqsita rasuy cuduuduh Cadrak deqsita rasut raaqahiyya kaadu digaaleyyo. Tonnah kaadu Suur kee Sayda deqsitta magaala kee teetil yan maray kaxxa kas lehiyya digaaleyyo.

³ Suur magaalah mari isi dacayrih megdeb xisen. Mangah loowo num akak duude waa lakqo kee dahab koboxsiteenih yanin.

⁴ Takkay immay, anu YALLA kinniyo, lon gaddaliino kee midir ken waysiiseyyo. Ken maraakib badat finqa akkeleeh; Suur-qarwa cararteh gombod akkele.

⁵ Askalon magaalah mari taham yabalu waa waqdi, cunxo keenit heele. Gaadâ-magaalah mari aham yabalu waa waqdi, kaadu cunxok gexxaamah araadaqiselon. Ekron magaalah mari luk sugen niya luk maraaqaanaay meysitelon. Gaadâ-magaalah malik rabele; Askalon magaala abur akkele.

⁶ Mango kabuk yemeete mari Asdood deqsitta magaalal dabaaqah titta lih gacelon. *Filistiinih yooboke maray kaxxa kaxxiina lehiyya qawratak qideyyo.

⁷ Qabal tif hayta cadoh makumuk raaqelon. Caraamak tan maaqo mayakman. Raqqa 'ye mari yi mara akkeleeh, Yuudah yooboke marih gexsot gexelon. Ekron mari, Yabuusah yooboke marak kaxxih, yi mara akkele.

⁸ Inni baaxo innih dacriseyyooh; qaskar mattaaqatta akki tet mahaa. Ahaysa inni mara racmatta sinni abbobtih gabat biyaaki mahaa. Yi mari biyaakak abeh gide ubleh an» 'yaanam iyye.

SARRA YAMAATU WAA MALIKI

⁹ YALLI iyyeemih, «Siyon maraw, afracuk ifrica! Yarusalaam maraw, qililisa! Sin malik sin fanah yamaateh yanik wagita! Sin malik qadaalat leeh; nasri luk yamaateh yan. Takkay immay qunxa num tikka 'yeh dananal gaceh yamaateh yan; oklô-baxih amol gacca 'yeh yamaateh yan.

¹⁰ Israayil mari le faaris-gaariiray carbi edde abaanahiyya keenik bukkuseyyo. Yarusalaamak carbi edde aban faroosa kaleyyo. Carbi edde aban gayse kee gaysê-xaylo ken waysiiseyyo. Sin malik baadal tan ummat wagrisele. Kay abbootan badak a af kee woo af takke baaxo duudusele. Furaat weeqaytuk xabba haanam kee baaxô-maggaraqah amma yaanam duudusele» iyye.

¹¹ YALLI iyyeemih, «Yi maraw, qabal fidah akah caxitta 'ye xaganay sin kee yi fanal yanihiyyah taagah, sin maray casbit yani currih ayyaaqeeyyo. Oson elle yanin aracay keenih lee sinni qeelih inna lek ken kaleyyo.

¹² Yol kibaal haa maraw, ahaysa reebu edde geytan arac fan uduura. Taqabik abba hayteenih gidek muxxi barkat siinit heeyyo.

¹³ Yuudâ mara gayse abeyyo. Israayilih yooboke mara gaysê-baxa abeyyo. Siyon-mara seef abeyyooh; Giriik-marat qeebi abelon» iyye.

YALLIH UMMAT AYSUK AYSELE

¹⁴ YALLI isi marak daga raaqa aracal gacca 'yeh, cankaxi innah isi gaysê-baxa ruubele. YALLAY Mulki lehiyya baanta kaayisak, gabbi qaxak caacoh addat amaatuk qeebi abele.

¹⁵ YALLAY Nabaamak Naba isi ummat umaanek catele. Kay ummat naqboytiitik aysele. Qinabak bicsen kamrik cayyeh yiskire numih innah, qeebi booxal tirtiriselon. Naqboytiitik qabala caxelon. Ken naqboytiitih qabal, sadgatah qiden saqih qabalay sacnik sadgat elle aban mansaf bagul caxaanahiyyah innah caxitele.

¹⁶ Illi dacrisa loyni saq alak elle cata innal, YALLAY ken Dageltah yani isi mara isih iyye ayro wonnal catele. Kay mari kay baaxol jawharatak bicsen kalabtah innah ifele.

¹⁷ Baaxo too saaku kaxxam amqele. Baxuw kee furrayna inkih, mango daro kee qusbih bicsen qinab kamrik adoobitak ariiqo baahelon.