Zakariyya 8 - NABUWWA KEE MALIKWA

YALLI YARUSALAAM-MAGAALAT BARKAT HEELE

¹ YALLAY Nabaamak Nabahiyya farmo yol oobise. Yok iyyeemih,

² «Yarusalaam magaala kaxxam kiciyyooh; teetih liyo kaxxa kacanih sabbatah teetil umam baaha mara anqibeh.

³ Yarusalaam yi magaalay taahirik taniiy; ahaysa kalbi tet fan gacseyyo. Innih teetil gaceyyo. Ahaysa Yarusalaam Imaan-Yallal-le-Magaala deqsitele. Anu YALLAY Nabaamak Naba; yi qale taahirik tan qale akkele.

⁴ Ahak sarra qagitak kaxxam bar naba idoolay caxxal dokkoowak gexxahiyya Yarusalaam magaalah gitittel daffeyak sugele.

⁵ Gititte kaadu qunxa urruy digrahiyyak amaggele.

⁶ Taham away raaqe marat numma macelta'mmay, tahat yabtam yoo YALLAY Nabaamak Nabahiyya. Yoh akke waytam matanaay, anu affarem mayyum yaaxigeenimi.

⁷ Inni mara seewah been baaxok gacseyyo. Ayrô-culma kee ayrô-mawqak ken baaxo fanah ken gacseyyooh,

⁸ Yarusalaamal ken nookiseyyo. Yi mara akkeloonuuh, anu amo keenik wagta Dagelta keenih akkeyyo. Qadaalat leeh, digga le xintoh ken xiiniseyyo.

⁹ «Yi Qibaadah Qari nammeyhaak xisoonuh rakiibô-xaa heen saaku, nabuwwa sin lih edde yabteh sugte yab a saaku nammey haak yaabbe maraw, agiira takkeenim siinil taniih, niya siinik fayya 'tay. Tah intam yoo YALLAY Nabaamak Nabahiyya.

¹⁰ Ahak duma ummat fanal tittin way kee naqabu ruubeh eneeh; naqboytak isi rooci catam duuda num ken fanat musuginna. Sahda lakqoh tamsiisaanam kee saq kirah geyaanamih dudda le num masuginna.

¹¹ A saakuh tu gactek, away saaboh raaqe marak, dumî marak abak sugem maaba.

¹² Awayî-mari isi buqre amaanah abqurele. Qinab coox mango xaylo keenih xalele; baaxol mango daro keenih aabukeleeh, qaraanak rob radele. Ahaysa yi marak raqte saaboh too niqmat aceeyyo.

¹³ Yuuda kee Israayil maraw, duma yan saaku allî-baaxoh mari titta abaara waqdi, ‹Yuuda kee Israayil tibbixe bala sin tabbaxay› 'yaanam tittak axcuk sugen. Takkay immay a saaku tohuk sin cateyyo. Toh axcuk suge mari, ‹Yalli Yuuda kee Israayilit hee barkat siinit haay› akak inxicca iyyan barkat siinit heeyyo. Tonna kinnuk agiira takkeeniih meysi cabtaanam siinil tan» iyye.

¹⁴ YALLAY Nabaamak Nabahiyya iyyeemih, «Sin kaxxa abbobtiy isin akak raddeenihiyya dumî-dabaanal yoo bagcarrisseeh; tonna-leemiik bala keenil oobisaamal gaba kale. Too bala fanat mayseediyyoy keenil oobiseh.

¹⁵ Awayah tu gactek, Yarusalaam kee Yuudâ marak, barkat siinit haam faxa. Tahaysa akak meysittaanam manton.

¹⁶ Tonna'mmay isin abeh meqeemiy siinil tanihiyya siinih warisu waa. Numma titta lih yaaba. Cokmi aracal amaanah sitta xiinissaana'gidih qadaalatat uckuma.

¹⁷ Titta edde biyaktoonu waytan mala tittah mamalsina. Xiibitak able wayteenimil masumaaqitina. Anu diraabat yaabaanam kee qadaalat makot beyaanam kee umaanet asaanam makiciyyo. Toh intam yooy YALLA» iyye.

¹⁸ YALLAY Nabaamak Nabahiyya qagseh farmo yol oobise. Yok iyyeemih,

¹⁹ «Sanatak fereyhaytooy, konoyhaytooy, malcinhayto kee tabanhaytoh alsat abtan soom, Yuudâ marah farcat kee rufto le ayroora akkeleeh; tassa axcuk qiid abetton. Tonna'mmay isin numma kee wagari kicna mara takkeenimi» iyye.

²⁰ YALLAY Nabaamak Nabahiyya iyyeemih, «Mango mari mango magaalak Yarusalaam fan edde yamaatu waa wakti xayyooweh.

²¹ Inki magaalah mari aki magaala fan gexxa axcuk, ‹Kay barkat geyna'gidiiy, YALLAY Nabaamak Nabahiyya naqbude'gidih, Yarusalaam genxu waynak, ne'lih gexa› edde iyyan wakti amaatele.

²² Mango mara kee cayla leelah tan doolatwa Yarusalaam fanah YALLAY Nabaamak Nabahiyya yaqbudeeni'gidiiy YALLIH barkatah kallacaana'gidih amaatelon.

²³ Too saaku Yahuuduh aabuke wee marak tabna num, Yahuuduh yooboke marak numuk teenal amma 'yeenih, ‹Yalli sin lih yani 'yaanam noobbeeh; tohuk gexxaamah sin lih gacnam fanxa› siinik axcelon» iyye.