Zakariyya 7 - NABUWWA KEE MALIKWA

YALLI BAGUUK ABE WAAN SOOM ILAAQEH

¹ Daryawes tu edde taade malik edde yekke fereyhaytô sanatak, Kislaw deqsita alsay sanatak sagalhaytoh yamaatehiyyak fereyhaytoh ayrot, YALLI farmo yol oobise.

² Beetal deqsitta magaalal yen mari, Sarxer kee Ragemmelek deqsita marih nammay kee woo marih mara, YALLAY Nabaamak Nabahiyyah Qibaadah Qari fan ruuben. Ken akah ruubeenim, seeka kee nabuwwa dooqa keenih abta'gidik ten.

³ Tohuk kalah kaadu, seeka kee nabuwwa essero esseraana'gidik ten. «Taham maa esserooy?» inteenik, «Dumaak mango sanatah akah abak sugne innah, konoyhaytoh alsat soom maay abnoo?» 'yaanam esseraana'gidik ten.

⁴ Too waqdi YALLAY Nabaamak Nabahiyya farmo yol ruubeeh; iyyeemih,

⁵ «Seeka kee ummattak inkih intaamah: ‹A dabaanah malcina-tabanih liggidih gide, kulli sanatak konoyhaytoh alsa kee malcinhaytoh alsih addat abak sugten inki-inki ayroh soom akah abak sugteenim, yi nabna hinna.

⁶ Tonnah kaadu makum kee maqub akah abak sugteenim, sinni nabsih taaga› keenik inxic» yok iyye.

⁷ Aham dumî-dabaanal sugte nabuwwal YALLI ruube farmo. Too waktit Yarusalaamal ummat cayit teneeh; Yarusalaam kee tet dariifal ten mandarwal mango ummat dabaaqah ten saakuk ten. Too dabaanal ummat kaadu gabbi-qaxat raqta Yuudâ-baaxo kee ayrô-culmat raqta mango koomaami le baaxol inkih ten.

YALLIH AMRIH CINA ANKILIQIYYA XALTE

⁸ YALLIH farmo Zakariyyal obte.

⁹ Kaak iyyeemih, «Yabtam yoo YALLAY Nabaamak Nabahiyya. Anu dumaak inni marah amri eceeh en. Keenik exceemih: ‹Qadaalatah tanim abaay, meqem tittah abaay, tittah racmata.

¹⁰ Gubun kee xaleena akak rabte qayxiixaay, marin baaxoh maray sin addal yanii kee tu sinni masaakiinah emeqa. Isinnih kaadu umam tittah mamalsina› keenik exceh en.

¹¹ «Takkay immay yi mari yi yab cineeh, darre yot cabba haak misinkaca isinnik alfeenih.

¹² Afqado keenik gibdah, xaa tekke. Oson anu ruube nabuwway yi Roocaaniyya cato leeh, yi xinto barissahiyyah yab cineeniih; tohih sabbatah ken inqibeh suge.

¹³ Anu ken lih yaabe waqdi, yoo aabbe cineenimih sabbatah, ken dooqa moggoliyyo. Tah intam yoo YALLAY Nabaamak Nabahiyya.

¹⁴ Kaxxa caacay guddaafa duufut elle beya'nnal, ken baaxok eyyeqqa ken heeh, marin baaxo fan ken iskiliqe. Tonnal a xaqan le baaxo dibuk raqteeh, dibu tekkeeh; a saaku num teetil mayan» kaak iyye.