Zakariyya 6 - NABUWWA KEE MALIKWA

AFFARA FARAS-GAARI WACYIH UBLE

¹ Tohuk lakal kaadu gersi wacyi yoh yumbulle. Namma qaley nacaasak bicseenihiyyak fan fan, affara faras-gaariy tamaatehiyya uble.

² Naharsi gaari beyta faroosa qasuk ten. Nammeyhaytô gaari beyta faroosa datuk ten.

³ Sidochaytô gaari beyta faroosa qaduk ten. Fereyhaytô gaari beyta faroosa gayrinuk ten.

⁴ Tah uble waqdi yo'lih yaabak suge malaykattuk, «Yi amoytaw, ah macaay?» exce.

⁵ Too malaykatti yok iyyemii, «Ah, affara caacayay qaraanak yemeete kinni. Yallay inkih yan baadak amoytah yanihiyyah foocah yemeetek lakal, away abam fooriyya.

⁶ Woo data faaris beyta gaari kilbat fan gexxaah; qado faaris beyta gaari ayrô-culma fan gexxa. Gayrin faaris beyta gaari gabbi-qaxat raqta baaxo fanah gexxa» yok iyye.

⁷ Taaxige faaris yemeete waqdi, gexaanamih fayxih qambaxxaagiteenih; baaxo elle tan innih adda yasmiteenim faxen. Too waqdi malaykatti, «Gexay baaxo elle tan innih adda wagita» keenik iyye. Gexeenih.

⁸ Sarrak malaykatti anay fayya haak yok iyyeemih, «Woo kilbat fan gexe faaris YALLIH naqabu xabbacooseh» yok iyye.

YOOSUWAH YECEEN DARDAARINNI KALABTA

⁹ Tohuk lakal YALLIH farmo yol obte.

¹⁰ YALLI yok iyyeemih, «Sissikuk Xafanyâ-Yoosiyaahuh buxah fan gex. Tokkel, marin rasuk yemeete Celday kee Tobyaahu kee Yadaqya acwah koh tacayu wayta duyye gabat loonuh; keenik bey. A sidooca num a saaku Baabeloonul yan seewah been marih xaquk yuduuren.

¹¹ Oson koh yacoonu waan lakqo kee dahabak kalabta bicisaay woo kaxxa seekih yan Yahuuxadák-Yoosuwak amot hayis.

¹² Too waqdi kaak intaamah, ‹Ludda deqsita num saadeleeh, abinnaanim gabal kaak bicele. YALLIH Qibaadah-Qari nammeyhaak xisele.

¹³ YALLIH Qibaadah-Qari nammeyhaak xissu waytam kaay; malikih taguude nabna geytu waytam kaa. Isi ummatak abba tikka 'yeh xiinisele. Malik dardaarinnih korsil gacele. Kay dardaarinnih korsih xaquk seekih yan num sooleleeh; too sek kee kaa abinnaanim titta lih abeloonuuh, muquk, wagarit titta xiiniselon. Toh intam YALLAY Nabaamak Nabahiyya› kaak inxic.

¹⁴ Kalabtay bicissu waytahiyya YALLIH Qibaadah-Qarih addal Celday kee Tobyaahu kee Yadaqya le nabnah kassitih anele. Tonnah kaadu, Yoosiyaahu abe maqaaneh kassitih akkele» yok iyye.

¹⁵ YALLIH Qibaadah-Qarih xisneh allal yan mari amaateleeh, xisnet gaba assagallelon. YALLAY Nabaamak Nabahiyya sin fanah yoo ruubem too saaku aaxigetton. Tonna'mmay tah inkih takku waytam, isin YALLAY sin Dagelta kinnihiyya aba iyyem dudda luk abtoonu waytan saaku.