Zakariyya 5 - NABUWWA KEE MALIKWA

ZAKARIYYA XAMBABBAQUT YAN WARKAT WACYIH YUBLE

¹ Kaadu wagga hee waqdi, xambabbaqut tan warkat qaraanak bagul caacay beyah uble.

² Too waqdi malaykatti «Maca tablee?» yok iyye. «Xambabbaqen warkat qaraanal caacay beyah ableeh, too warkat xexxaarah sagla mitri yakkeh yan. Affara mitri kee garab baguh yakkeh yan» kaak exce.

³ Too waqdi malaykatti yok iyyeemih, «Ama table xambabbaqut yan warkat, a addunyal obtu wayta bala elle tunkuttube warkata. Tama warkatak exxak teenal tan kutbe intaamah, ‹Garqa abta garoqti a baaxol bayele› intaah, gersi exxal tan kutbe kaadu, ‹Xiibitak diraabat yaaba mari kaadu a baaxol bayele› 'yaanam inta.

⁴ YALLAY Nabaamak Nabahiyya bala ruubeleeh, too bala inkih tan garoqti kee xiibitak diraabat yabba 'ya marak buxaaxi culele. Too bala too marih buxak magexxaay, buxaaxi abur keenik abele» yok iyye.

KAFAQ ADDAT TAN BARRA UBLE

⁵ Malaykatti kaadu qagteh yoh yumbulleeh, «Ama tamaatem maay table?» yok iyye.

⁶ «Ah macaay?» kaak exce. «Amah kafaqaay; ama kafaq a baaxol yan marih ceelallo» yok iyye.

⁷ Woo kafaq alifih qararak bicsen birta luk yen. Wagga hee waqdi woo kafaq fakeeniih; too waqdi barra addak bukku akak 'te.

⁸ Too waqdi malaykatti yok iyyeemih, «A barra umaaneh ceelallo» yok iyye. Sarrak barrat xukku 'yeh edde sugte kafaqah tet gacseeh, kafaqat alif hee.

⁹ Dagah wagga hee waqdi, namma barray caacay gutqot haadak yi fanah tamaatehiyya uble. Too namma barra qande le galway koxxali galwah gurral tanihiyya luk ten. Sarrak kafaq ukkuqqu heenih luk haaden.

¹⁰ Malaykattuk, «Away kafaq beyaanam ankeey?» exce.

¹¹ «Kafaq Baabelon fan beyaanaah, tokkel tama tuble kafaqah qibaadâ-qari xiselon. Xisnek gaba kalan saaku, tama kafaq addal akak heelon» yok iyye.