Zakariyya 3 - NABUWWA KEE MALIKWA

KAXXA SEEKIH GIDDINAAMAK WACYI UBLE

¹ Sarrak Yalli aki wacyi yoo yuybulle. Tohuu, kaxxa seekih yen Yoosuwa YALLIH malaykattih foocal soolah uble. Yoosuwak migdi tattabat Seetan soolah uble. Seetan Yoosuwa yastikiyuh bical gaceh yen.

² Too waqdi YALLI Seetanak iyyeemih, «Seetanow, YALLI koo yaynaaqalay! YALLAY Yarusalaam doorehiyya koo yaynaaqalay! A num girah addak handifen bocoytih gide. Kaxxa gadaamah addak handifeenih yeyyeeqen numih gide» kaak iyye.

³ Yoosuwa too waqdi wasak le sarat anuk, wokkel malaykattih foocal soolak yen.

⁴ Sarra woo malaykatti woo waqdi foocal kaak soolak sugte malaykak iyyeemih, «A num edde yan wasak le sara kaak kala» iyye. Yoosuwak kaadu iyyeemih, «Luk sugte dambi kok kaleeh, edde gactu wayta qusba saroy saytuni koh aceeyyo» kaak iyye.

⁵ Too waqdi «Away kaadu amot qumaamat kaah hoonay» exce. Too malayka qumaamat amot kaah hayte. Sarrak sekti sarat kaa heen. Tohuk gaba kalaanam fanah YALLIH malaykatti solla 'yeh wagitak suge.

⁶ Sarrak too malaykatti YALLAY Nabaamak Nabahiyya Yoosuwa giddinaamak iyyeemit yaabe.

⁷ Iyyeemihii, «Yoosuwaw! YALLI, ‹Yi xintol tanim abteeh, kol eceeh an taama duudussu haytek, yi qari kee yi qarih daaratak abba koo abeyyooh; a yi garil tan malayka yol elle xayyowta'nnal, atu kaadu yol xayyowta'gidih idni koh aceeyyo.

⁸ Kaxxa sek kinnitok, ko'lih yaaba yab ankacca hay. Isin kaadu kaa'lih tan seekay ankacisa. Sarra takku wayta maqaaneh asta kinniton. Anu faxa taamah taamitu waa numuy migaaqah Dawud Luddal muggaaqisaanahiyya ruubeyyo.

⁹ Yoosuwak foocal inki xaay malcina fooca lehiyya heeyyo. Too xaak bagul kutbe heeyyo. A baaxol tikka 'ya dambik, ummat inki ayroh addat kaqliseyyo.

¹⁰ Too ayro kulli num siinik qinab coox kee salfa le caxâ-miru xala cooxih gubal gacca 'teenih, cuggaaneh siinik yan marah qibnaytiinoh isinni buxal xigla abettoonuuh; amaanah xiinetton. Tah intam yoo YALLAY Nabaamak Nabahiyya› 'yaanam iyyah yan» iyye.