Zakariyya 14 - NABUWWA KEE MALIKWA

YARUSALAAM KEE DOOLATWA

¹ YALLI cokmi edde abu waa ayro amaatelek ixiga. Too ayro Yarusalaam magaala buubelon. Siinik been duyye siinik foocal kurraasitelon.

² YALLI Yarusalaamat qeebi abaana'gidih doolatwa inkih gaabossu heeh, baahele. Yarusalaam carbit abbixelon. Qarwat sugga 'te duyye buubelon. Agabu cayliselon. Ummatak garab seewah beelon. Garab magaalal elle cabelon.

³ Tohuk lakal YALLI dumî-dabaanal akah abak suge innah, too doolatwat qeebi abuh ugtele.

⁴ Too ayro YALLI Yarusalaamak ayrô-mawqa le kabut raqta Madeera-li deqsitta qalel gacele. Too qale ayrô-mawqaak ayrô-culma fan namma ikkel kurruumeleeh, fanal kaxxa daqar akak awqele. A qalek garab kilbat fanah angayyeleeh, garab gabbi-qaxal angayyele.

⁵ Too ayro isin, ta daqaaray namma qalek fan gexak Aaxal deqsita arac gufahiyyak addah gacca 'teenih asillimetton. Sin kaxxa abbobti malik Quddiyya deqsita num Yuudâ-rasul malikih yen saakuy baaxo tengeyyehiyya elle tisillime innal asillimetton. Too waqdi YALLAY yi Dagelta kinni isi malaykoota inkih gabat luk akke fanah amaatele.

⁶ Too ayro qaraanal ayro mifta'mmay, wac magacaay baaxol barad marada.

⁷ Dite magacta. Bar kinni way ifi gaceleeh, kulli way ifuk sa bari magaca. Taham edde takku wayta ayroy rikeek tani taaxigem YALLA.

⁸ Taham takku wayta ayro, Yarusalaamak addal sila le lee darah innah caxitele. Too leek garab Rabe Bad deqsita bad fan caxitele. Aki garab Maditraaniyah Badat angalele. A lee cagayaay, karma, way mataggiriqay darah oobele.

⁹ Tohuk lakal YALLI, inkih yan baadal malikih anuk, baaxo xiinisele. YALLAK sah yaqbudeenim ane waytam kulli num aaxigele. Kaak sah tu mayaqbudan.

¹⁰ Gabaq deqsita aracay kilbat le kabut raaqak xabba haanamaay, Rimmon deqsita aracay gabbi le qaxat raaqahiyyah amma 'yaanam fan booxa akkele. Yarusalaam magaala dariifal teetik tan baaxok fayya axcuk raaqele. Magaalak exxa Benyam-Culma deqsitta afak xabba haanamaay, duma magaala akak culak sugen af elle suge arac fan gexak, Rukni-Afah deqsita arac fan gufele. Sahda akak yabloonuh xisen Cananal-Qariy amo-xeerik, malik buxah marih qinab kamri axmuumuk elle bicisak yenen arac fan gufele.

¹¹ Yarusalaam magaala tahak wadir mabaataay; ummat tet addal amaanah xiinele.

¹² Yarusalaamat qeebi aba marat YALLI dalka ruubele. Rooci keenit anuk, arab kee cado keenik abicele. Namma inti elle tan aracal abiceleeh; arraaba afak addal keenik kafele.

¹³ Too ayro too marat YALLI badit kee meysi ruubeleeh; tohuk gexxaamah kulli num isik cuggaaneh aninnaan numut qeebi abele.

¹⁴ Yuudâ mari, Yarusalaam marat qeebi aba marat qeebi abelon. Keenik dariifal tan ummat luk sugga 'te duyye keenik buubeloonuuh; mango dahab kee lakqo kee sartan keenik beelon.

¹⁵ Too dalkay YALLI sinaamat ruubehiyya, ken naqboytit elle yan guubul tan faroosa kee bakilwaay, gaalaay, danoonal oobele. Faxinnaan alay naqboytit lehiyyal too dalka oobele.

¹⁶ Yarusalaamat qeebi abe marak saaboh raaqe mari, wohuk wadir YALLAY Nabaamak Nabaah Malik kinni yaqbudeeni'gidih, kulli sanatal Yarusalaam amaatelon. Tokkel Iraawô-Dabih Qiid assakaxxelon.

¹⁷ YALLAY Nabaamak Nabahiyya isinni malikih intit able waah, Yarusalaamal kaa aqbude waa marih baaxol, rob marada.

¹⁸ Masri mari, «Iraawô Dabih Qiidih masna» iyyeenik, tonnal Yalli, «A qiidih magenxa» iyya maral ruube dalka keenil ruubele.

¹⁹ Taham, Masri mara kee wohuk kalah yan maray «Iraawô Dabih Qiidih magenxa» iyyu waahiyyat obtu wayta digaala kinni.

²⁰ Too saaku faarisik fillat haan baadontak bagul, «YALLAH rikeek heenimi» 'yaanam kutbeh heelon. YALLIH Qibaadah Qarih addal maaqo addat akak alaysan buutitte, sadgat elle aban aracal tan sacnittek kaxxih, taahirik gacele.

²¹ Yarusalaam kee Yuudâ rasul maaqo addat akak alaysan buutitte, YALLAY Nabaamak Nabahiyyah qibaadah aban sadgatih taamah, gersi duyyek baxissa heenih rikeek heelon. Sadgat baaha mari baahah yan saqih cado too buutittel alayselon. Tohuk wadir Nabaamak Naba YALLIH Qibaadah-Qarih addal tellemmo aba mari maraaqa.