Zakariyya 13 - NABUWWA KEE MALIKWA

¹ YALLAY Nabaamak Nabahiyya iyyaamah, «Too ayro Yarusalaam ummat kee Dawuduk rade mari abak suge caraamu kee uma-taamak edde taahirroowoonuh, edde kaqalan buyyi keenih racele.

² «Too ayro Yalla axcuk aqbuduk sugen duyyey xeet kee cooxuk bicseenihiyyah migooqa baaxok bayseyyo. Tohuk wadir too duyye num kassitak maraaqa. ‹Nabi kinniyo› iyya mara bayseyyooh; nadaasak tan roocaaniyyay ken yaabissahiyya baaxok ayyaaqeyyo.

³ Tahak wadir ‹Nabi kinniyooh wacyi ubleeh, wonnah tanim akkele› iyya num yenek, kay ina kee kay abba, ‹YALLI edde yaabe wee yaabat yabteeh, dirab teceeh; tonna leemiik rabtam kol tan› kaak axcelon. Tonnah yan diraabat yaabah kaa yoobben waqdi, kay xaleena kinni way seefit kaa qidele.

⁴ Too ayro ‹Anu nabi kinniyooh, wacyi uble› axcuk kaxxiinita mara matablan. Nabî-ceelot gacaah, nabi edde gaca sartanay gibdi dagooruk bicseenit gacca 'yeenih sinam duquurusaanamak raaqelon.

⁵ ‹Nabuwwa hinninooy buqre-aba kinnino; noobokeemih buqrek sah gersim maabinnino› axcelon.

⁶ ‹Hay, masangalet siinik tanim macâ mudumu?› keenik iyyoonu waan waqdi, ‹Ah kataysâ-buxal net yekke mudumu» axcelon.

YALLIH DUWEENA QIDA YAANAMIH AMRI YONTOCOWWE

⁷ YALLAY Nabaamak Nabahiyya iyyeemih, «Seefow, ama illi loynay yoh taamitahiyyat rad. Seefow, kaa qid; illi fixixele. Qunxa illit qeebi abeyyo.

⁸ Inkih tan baaxol yi marak sidooca afak namma af ambaxele. Takkay immay sidooca afak, afak teeni saaboh raaqele.

⁹ Too maray saaboh raaqu waahiyya yakke mara keenik able'gidih, dahab kee lakqo girat elle yasiffiyen innah, girat asiffiyeyyo. Tohuk lakal dooqah gaba yol ruubelon; anu too dooqa keenik oggoleyyo. Yi mara kinnoonum keenih warseyyooh; oson kaadu ‹Atu ni Dagelta kinnito› axcelon» iyye.