Zakariyya 12 - NABUWWA KEE MALIKWA

YARUSALAAM SARRÎ DABAANAL WADDIIMELE

¹ YALLI ruube farmo ah teeti. YALLAY qaran fidiseeh baaxo gineeh sahdaytut rooci heehiyya Israayil marak iyyeemih:

² «Yarusalaam qinabak bicsen kamri abeyyo. Yarusalaam magaalah dariifal tan doolatwah yooboke mari too kamrik aaqubeloonuuh, sakraan innah lagaggaq axcelon. Too mari Yarusalaamat maro hayu waa waqdi, Yuudâ magaaloolik raqqa 'te magaaloolit kaadu maro gacele.

³ Too ayro Yarusalaam kaxxam qilsa le xaa abeyyo. Too xaa ugsa'gidih yamaatu waa mari biyaakitele. Kulli baaxoh mari teetit qeebi aba'gidih titta geyya heeh amaatele.

⁴ Too ayro too mari edde yamaatu waa faarisit cunxo ruubeyyo; amot akak yamaatu waa marat moyya ruubeyyo. Yuudâ mara dacriseyyooh; keenit qeebi aba'gidih yamaatu waa marih faaris inti waysiiseyyo.

⁵ Too waqdi Yuudâ-kedoh abbobti isinni bagul, ‹YALLAY Nabaamak Nabahiyya Yarusalaamal yan isi marat qande heeh yaniimih sabbatah, nanu qande bahne› 'yaanam axcelon.

⁶ «Too ayro Yuudâ-kedoh abbobti caffa takme gira abeyyo. Axaw axawah heen qaysot gexxa gira ken abeyyo. Dariifal keenik enna 'ta doolat inkih bayselon. Yarusalaam marah tu gactekiiy amaanah raaqelon.

⁷ «Dawuduk rade mara kee Yarusalaamal yan mari, Yuudah yooboke maray raqqa 'yehiyyak nabnah ayse waana'gidih, yooy YALLAH yani naharsi nasri Yuudâ marah aceeyyo.

⁸ Yooy YALLA kinni Yarusalaamal yan mara too ayro dacriseyyooh; gacca 'yaah, kaxxa boola keenik le num Dawud gide qandek aallele. Dawuduk rade mari yoo kee yi malaykattih innah ken miraacisele.

⁹ Too ayro Yarusalaamat qeebi abta'gidih tamaatu wayta doolatwa baysaamal malseh an» iyye.

MUDDUUME NUMIH ABEN ROOKA

¹⁰ «Dawuduk rade mara kee Yarusalaam marat racmatta tacee roocaaniyya heeyyo. Dooqa ken absissa roocaaniyya keenit heeyyo. Yooy mudeenihiyya wagtoonu waan waqdi, inki baxa xale num woo baxih rabah rookah yassaalle'nna assaallelon. Naharsi-baxi akak rabe num kaxxa weeqah elle weeqa'nnal weeqelon.

¹¹ Too ayro Yarusalaam mari, Hadad-Rimmon deqsittaamah Magiddo deqsitta booxal rookah ummat akah gacte innah, gacelon.

^12-14 «Too rasul yan mari gulub-gulubuh kurrumma 'yeenih rookitelon. Dawuduk rade maraay, Naatanak rade maraay, Leewik rade maraay, Simqik rade mara kee wohuk kalah yan maray raqqa 'yehiyya, gulubuh kurrumma 'yeenih rookitelon. Baxsah gacca 'yeenih mariiy isi ikkel keenik rookitelon. Labha agabuk baxsimma 'teh rookitele» iyye.